ພັນລະຍາທ່ານເອກອັກຄະລັດຖະທູດລາວປະຈຳນະຄອນຫລວງປັກກິ່ງເປັນເຈົ້າພາບຈັດງານນ້ຳຊາແມ່ຍິງອາຊຽນ
(ທ່ານນາງຄັດທະອຸດອນ ບຸນຄຸ້ມຕ້ອນຮັບແຂກທີ່ມາຮ່ວມງານນ້ຳຊາ)
ຕອນບ່າຍວັນທີ 31 ພຶດສະພາຜ່ານມານີ້, ທ່ານນາງຄັດທະອຸດອນ ບຸນຄຸ້ມ ພັນລະຍາຂອງທ່ານເອກອັກຄະລັດຖະທູດແຫ່ງສາທາລະນະນະລັດປະຊາທິປະໄຕປະຊາຊົນລາວປະຈຳນະຄອນຫລວງປັກກິ່ງສາທາລະນະລັດປະຊາຊົນຈີນໄດ້ເປັນເຈົ້າພາບຈັດງານນ້ຳຊາແມ່ຍິງບັນດາປະເທດສະມາຊິກອາຊຽນເຊິ່ງກິດຈະກຳນີ້ໄດ້ເຄີຍປະຕິບັດມາໃນບັນດາແມ່ຍິງອາຊຽນເຊິ່ງແຕ່ລະເດືອນໄດ້ຜັດປ່ຽນກັນເປັນເຈົ້າພາບໂດຍລຽງຕາມຕົວອັກສອນພາສາອັງກິດ,ງານນ້ຳຊາຂອງແມ່ຍິງບັນດາປະເທດສະມາຊິກອາຊຽນຈັດຂຶ້ນເພື່ອເປັນການພົບປະ, ແລະປ່ຽນວັດທະນະທຳແລະຊິມລົດຊາດອາຫານຂອງແຕ່ລະປະເທດສະມາຊິກທັງເປັນການຮັດແຫນ້ນຄວາມສາມັກຄີໃນບັນດາແມ່ຍິງຈາກແຕ່ລະສະຖານທູດຂອງປະເທດອາຊຽນ.
ໃນງານຄັ້ງນີ້ບໍ່ພຽງແຕ່ໄດ້ເຊີນບັນດາພັນລະຍາທູດແລະແມ່ຍິງຈາກສະຖານທູດຕ່າງໆຂອງປະເທດອາຊຽນທີ່ປະຈຳຢູ່ນະຄອນຫລວງປັກກິ່ງເທົ່ານັ້ນ, ແຕ່ຍັງໄດ້ເຊີນບັນດາແມ່ຍິງເພື່ອນມິດຈາກສະຫະພັນແມ່ຍິງຈີນເຂົ້າຮ່ວມນຳອີກ.
ໃນງານຄັ້ງນີ້, ທ່ານນາງຄັນທະອຸດອນ ບຸນຄຸ້ມ ພັນລະຍາທ່ານສົມດີ ບຸນຄຸ້ມ ເອອກອັກຄະລັດຖະທູດລາວປະຈຳສ. ປ. ຈີນໄດ້ກ່າວສະແດງຄວາມຍິນດີແລະຕ້ອນຮັບແຂກທີ່ເຂົ້າຮ່ວມໃນງານພ້ອມທັງໄດ້ສະແດງຄວາມຂອບໃຈຕໍ່ການສະຫລະເວລາອັນມີຄູນຄ່າມາຮ່ວມງານໃນພ້ອມກັນນັ້ນກໍ່ໄດ້ຊົມການສະແດງສິລະປະລາຍການຕ່າງໆຈາກເອື້ອຍນ້ອງແມ່ຍິງລາວແລະຊິມອາຫານພື້ນເມືອງລາວຈຳນວນຫນຶ່ງເຊັ່ນ:ເຂົ້າຫນຽວ,ຕຳຫມາກຮຸ່ງ, ເຂົ້າປຸ້ນແລະຊົມການສາທິດການເຮັດອາຫານລາວຈຳນວນຫນຶ່ງ.
