ທ່ານຊີຈິ້ນຜິງພົບປະກັບທ່ານໂອບາມາ ເນັ້ນໜັກຈີນ-ອາເມລິກາດຳເນີນ "ການຮ່ວມມືຂ້າມມະຫາສະໝຸດປາຊີຟິກ"
ວັນທີ 7 ມິຖຸນານີ້, ທ່ານຊີຈິ້ນຜິງ ປະທານປະເທດຈີນໄດ້ພົບປະກັບທ່ານບາຣັກ ໂອບາມາ ປະທານາທິບໍດີອາເມລິກາຢູ່ທີ່ສວນນິຄົມອັນເນນເບີກຂອງລັດກາລີຟໍເນຍອາເມລິກາ.
ໃນເວລາພົບປະກັນ, ທ່ານຊີຈິ້ນຜິງຊີ້ອອກວ່າ, ປັດຈຸບັນ, ການພົວພັນລະຫວ່າງຈີນກັບອາເມລິກາໄດ້ຢູ່ໃນຈຸດເລີ່ມຕົ້ນທາງປະຫວັດສາດອັນໃຫມ່ອີກຈຸດຫນຶ່ງແລ້ວ. ຈາກການພັທະນາເສດຖະກິດຂອງປະເທດຕົນເອງຕະຫລອດເຖິງການຊຸກຍູ້ໃຫ້ເສດຖະກິດທົ່ວໂລກມີຄວາມຫມັ້ນທ່ຽງແລະຟື້ນຕົວຄືນ, ຈາກການແກ້ໄຂບັນຫາສາກົນແລະພາກພື້ນທີ່ເປັນຈຸດສຸມຮອດການຮັບມືກັບສິ່ງທ້າທາຍຕ່າງໆໃນທົ່ວໂລກ, ສອງປະເທດລ້ວນແຕ່ມີຈຸດຢືນຮ່ວມກັນທາງດ້ານຜົນປະໂຫຍດອັນສຳຄັນ, ລ້ວນແຕ່ຕ້ອງການເພີ່ມທະວີການແລກປ່ຽນແລະຮ່ວມມືກັນ.
ທ່ານຊີຈິ້ນຜິງກ່າວເນັ້ນວ່າ, ພາຍໃຕ້ສະຖານະການໃຫມ່, ພວກເຮົາຄວນລົງເລິກພິຈາລະນາເຖິງການພົວພັນລະຫວ່າງສອງປະເທດ.ພວກເຮົາຕ້ອງການການພົວພັນລະຫວ່າງຈີນກັບອາເມລິກາແນວໃດ?ຈີນກັບອາເມລິກາຄວນຮ່ວມມືກັນແນວໃດເພື່ອບັນລຸຜົນປະໂຫຍດຮ່ວມກັນ?ຈີນກັບອາເມລິກາຄວນຮ່ວມມືແນວໃດເພື່ອຊຸກຍູ້ສັນຕິພາບກັບການພັດທະນາຂອງໂລກ?ນີ້ບໍ່ພຽງແຕ່ແມ່ນເລື່ອງທີ່ປະຊາຊົນທັງສອງປະເທດໄດ້ເອົາໃຈໃສ່ເທົ່ານັ້ນ,ແຕ່ຍັງແມ່ນເລື່ອງທີ່ທົ່ວປະຊາຄົມໂລກໃຫ້ຄວາມສົນໃຈຄືກັນ.ພວກເຮົາຄວນເລີ່ມຈາກຜົນປະໂຫຍດພື້ນ ຖານຂອງປະຊາຊົນສອງປະເທດ, ເລັ່ງໃສ່ການຊຸກຍູ້ການພັດທະນາຂອງມະນຸດ,ປະດິດສ້າງແນວຄວາມຄິດ, ແລະມີການເຄື່ອນໄຫວຢ່າງຕັ້ງຫນ້າ, ຮ່ວມກັນຊຸກຍູ້ການສ້າງການພົວພັນລະຫວ່າງປະເທດໃຫຍ່ແບບໃຫມ່.
ທ່ານຊີຈິ້ນຜິງກ່າວວ່າ, ຂ້າພະເຈົ້າຄອງຄອຍຈະຮ່ວມກັບທ່ານປະທານາທິບໍດີໂອບາມາລົງເລິກແລກປ່ຽນກັນຢ່າງກວ້າງຂວາງກ່ຽວກັບບັນຫາສຳຄັນທີ່ມີລັກສະນະຍຸດທະສາດທີ່ທັງສອງຝ່າຍໃຫ້ຄວາມສົນໃຈຮ່ວມກັນ,ເພື່ອເພີ່ມຄວາມເຂົ້າໃຈເຊິ່ງກັນແລະກັນແລະຊຸກຍູ້ການຮ່ວມມືຮອບດ້ານ.ເຊື່ອວ່າພາຍໃຕ້ຄວາມພະຍາຍາມຮ່ວມກັນລະຫວ່າງສອງຝ່າຍ, ການພົບປະເທື່ອນີ້ຈະໄດ້ຮັບຫມາກຜົນທີ່ສຳຄັນ,ສາມາດເພີ່ມພະລັງແຮງອັນໃຫມ່ເຂົ້າໃນການຂະຫຍາຍຕົວຂອງການພົວພັນລະຫວ່າງຈີນອາເມລິກາໃນອະນາຄົດ.
ທ່ານບາຣັກ ໂອບາມາ ສະແດງຄວາມຍິນດີຕ້ອນຮັບທ່ານສີຈິ້ນຜິງ, ແລະກ່າວວ່າ: ການພົວພັນລະຫວ່າງອາເມລິກາ-ຈີນມີຄວາມສຳຄັນຫຼາຍຕໍ່ທັງສອງປະເທດອາເມລິກາແລະຈີນ, ຕໍ່ພາກພື້ນອາຊີປາຊີຟິກ ແລະທົ່ວໂລກ. ການພົບປະເຈລະຈາລະຫວ່າງຂ້າພະເຈົ້າກັບທ່ານປະທານສີຈິ້ນຜິງໄດ້ມີຂຶ້ນໃນເວລາອັນສັ້ນໆ ພາຍຫຼັງການສ້າງຕັ້ງລັດຖະບານຊຸດໃໝ່ຂອງສອງປະເທດ, ນີ້ກໍສະແດງໃຫ້ເຫັນວ່າ, ອາເມລິກາເອົາໃຈໃສ່ໃນລະດັບສູງຕໍ່ການພົວພັນລະຫວ່າງສອງປະເທດ, ສອງປະເທດອາເມລິກາ-ຈີນດຳເນີນການແລກປ່ຽນກັນດ້ວຍຄວາມຈິງໃຈແລະມີລັກສະນະສ້າງສັນ ຈະມີຄວາມສຳຄັນຫຼາຍຕໍ່ການຂະຫຍາຍຕົວຂອງການພົວພັນລະຫວ່າງສອງປະເທດ. ການຈັດວາງທີ່ພິເສດໃນມື້ນີ້ ກໍສະແດງໃຫ້ເຫັນເຖິງຄວາມສຳຄັນຂອງການພົວພັນລະຫວ່າງອາເມລິກາ-ຈີນ, ເຮັດໃຫ້ສອງຝ່າຍມີໂອກາດດຳເນີນການປຶກສາຫາລືກັນໃນຫຼາຍຫົວຂໍ້, ຊອກຄົ້ນແລະສ້າງຮູບແບບໃໝ່ຂອງການຮ່ວມມືລະຫວ່າງປະເທດກັບປະເທດ ບົນພື້ນຖານທີ່ຕ່າງຝ່າຍຕ່າງມີຜົນປະໂຫຍດແລະເຄົາລົບເຊິ່ງກັນແລະກັນ.
