ການພົບປະຮອບທີສອງລະຫວ່າງປະມຸກລັດຈີນ-ອາເມລິກາ
ຕາມຂ່າວ CRI: ວັນທີ 8 ມິຖຸນານີ້, ທ່ານສີຈິ້ນຜິງ, ປະທານປະເທດຈີນ ແລະ ທ່ານບາຣັກ ໂອບາມາ, ປະທານາທິບໍດີອາເມລິກາໄດ້ພົບປະກັນຮອບທີສອງຢູ່ເຮືອນພັກອັນເນນເບິກ ລັດກາລີຟໍເນຍອາເມລິກາ. ປະມຸກລັດຂອງສອງປະເທດຕ່າງໄດ້ແຈ້ງສະພາບເສດຖະກິດແລະນະໂຍບາຍເສດຖະກິດຂອງປະເທດຕົນໃຫ້ກັນຊາບ, ແລະແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບການພົວພັນດ້ານເສດຖະກິດລະຫວ່າງຈີນ-ອາເມລິກາ.
ທ່ານສີຈິ້ນຜິງ ຊີ້ອອກວ່າ: ການພົວພັນດ້ານເສດຖະກິດແມ່ນພື້ນຖານອັນສຳຄັນຂອງການພົວພັນລະຫວ່າງຈີນ-ອາເມລິກາໂດຍຕະຫຼອດ ມາ. ຈີນຫວັງໃຫ້ອາເມລິກາປະຕິບັດນະໂຍບາຍເສດຖະກິດມະຫາພາກທີ່ມີຄວາມຮັບຜິດຊອບ, ຍຶດໝັ້ນການຄ້າເສລີ, ຕ້ານລັດທິປົກປ້ອງການຄ້າ, ຜ່ອນຄາຍຄວາມຈຳກັດໃນການສົ່ງອອກດ້ານເຕັກໂນໂລຊີກ້າວໜ້າຕໍ່ຈີນ, ສະໜອງສະພາບແວດລ້ອມທີ່ຍຸຕິທຳໃຫ້ແກ່ວິສາຫະກິດຈີນໃນການໄປລົງທຶນຢູ່ອາເມລິກາ, ຮັບປະກັນຄວາມປອດໄພທາງດ້ານຊັບສິນຂອງຈີນຢູ່ອາເມລິກາ, ຮ່ວມກັນກັບຈີນສ້າງສະຖານະການໃໝ່ຂອງການພົວພັນດ້ານເສດຖະກິດລະຫວ່າງຈີນ-ອາເມລິກາ. ທ່ານສີຈິ້ນຜິງ ສະເໜີໃຫ້ສອງຝ່າຍເພີ່ມທະວີການຮ່ວມມືໃນຂົງເຂດຕ່າງໆທີ່ມີຄວາມໝາຍລັກສະນະໂດຍລວມແລະລັກສະນະຍຸດທະສາດຕໍ່ການພັດທະນາເສດຖະກິດຂອງສອງປະເທດ, ເປັນຕົ້ນແມ່ນ ການລົງທຶນຕໍ່ກັນ, ພະລັງງານ, ການກໍ່ສ້າງພື້ນຖານໂຄງລ່າງ ແລະ ການຮ່ວມມືລະຫວ່າງທ້ອງຖິ່ນຂອງສອງປະເທດ.
ທ່ານສີຈິ້ນຜິງ ກ່າວຕື່ມວ່າ: ການພົບປະຄັ້ງນີ້ ແມ່ນການກະທຳທີ່ມີລັກສະນະປະດິດສ້າງໃນການໄປມາຫາສູ່ກັນລະຫວ່າງການນຳຂັ້ນສູງຂອງສອງປະເທດ ພາຍຫຼັງຈີນແລະອາເມລິກາໄດ້ສ້າງຕັ້ງລັດຖະບານຊຸດໃໝ່. ໄດ້ແຈ້ງຂໍ້ມູນຂ່າວສານອັນຕັ້ງໜ້າຕໍ່ປະຊາຊົນສອງຊາດ ແລະ ປະຊາຄົມໂລກ ທີ່ຈີນແລະອາເມລິກາສຸມໃສ່ເພີ່ມທະວີການແລກປ່ຽນປະສານງານທາງດ້ານຍຸດທະສາດ, ເພີ່ມທະວີຄວາມໄວ້ເນື້ອເຊື່ອໃຈທາງດ້ານຍຸດທະສາດ, ຊຸກຍູ້ການສ້າງການພົວພັນແບບໃໝ່ລະຫວ່າງປະເທດໃຫຍ່, ຮ່ວມກັນຊຸກຍູ້ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນອາຊີປາຊີຟິກແລະຂອງໂລກ. ການພົບປະຄັ້ງນີ້ ໄດ້ຮັບໝາກຜົນອັນອຸດົມສົມບູນ.
ທ່ານໂອບາມາ ກ່າວວ່າ: ການພົວພັນດ້ານເສດຖະກິດທີ່ກວ້າງຂວາງລະຫວ່າງອາເມລິກາ-ຈີນ ມີຄວາມສຳຄັນຫຼາຍຕໍ່ສະຖຽນລະພາບແລະຄວາມຈະເລີນຮຸ່ງເຮືອງຂອງສອງປະເທດ, ກໍຈະມີຜົນສະທ້ອນທີ່ສຳຄັນແລະຕັ້ງໜ້າຕໍ່ເສດຖະກິດໂລກເຊັ່ນດຽວກັນ. ອາເມລິກາສົ່ງເສີມວິສາຫະກິດຈີນໄປລົງທຶນຢູ່ອາເມລິກາ, ຍິນດີໃຊ້ມາດຕະການເພື່ອຊຸກຍູ້ການຜ່ອນຄາຍການສົ່ງອອກຜະລິດຕະພັນເຕັກໂນໂລຊີກ້າວໜ້າຕໍ່ຈີນ, ຫວັງວ່າຈະສາມາດເພີ່ມທະວີການຮ່ວມມືດ້ານເສດຖະກິດການຄ້າ, ພະລັງງານ ແລະຂົງເຂດອື່ນໆກັບຈີນ.
