ຈີນຫວັງວ່າການຢ້ຽມຢາມຂອງທ່ານເຈືອງເຕີນຊ່າງ ປະທານປະເທດຫວຽດນາມຈະຊຸກຍູ້ໃຫ້ການພົວພັນຈີນຫວຽດນາມໄດ້ຮັບຄວາມຄືບຫນ້າໃຫມ່
ຕາມຂ່າວສານຊິນຮວາ:ວັນທີ14 ມິຖຸນານີ້,ໃນກອງປະຊຸມຂ່າວປະຈຳທີ່ຈັດຂຶ້ນຢູ່ປັກກິ່ງ,ທ່ານນາງຮວາຊຸ່ນຢິງ,ໂຄສົກກະຊວງການຕ່າງປະເທດຈີນກ່າວວ່າ, ຈີນຫວັງວ່າ ຜ່ານການຢ້ຽມຢາມຂອງທ່ານເຈືອງເຕີນຊ່າງ, ປະທານປະເທດຫວຽດນາມຈະຊຸກຍູ້ໃຫ້ການພົວພັນຈີນຫວຽດນາມໄດ້ຮັບຄວາມຄືບຫນ້າໃຫມ່.
ທ່ານນາງຮວາຊຸ່ນຢີງກ່າວວ່າ,ໂດຍຕອບສະຫນອງຕາມຄຳເຊີນຂອງທ່ານສີຈິ້ນຜິງ,ປະທານປະເທດຈີນ,ທ່ານເຈືອງເຕີນຊ່າງ,ປະທານປະເທດຫວຽດາມຈະຢ້ຽມຢາມຈີນທາງລັດຖະກິດນັບແຕ່ວັນທີ19 ຫາວັນທີ21 ມິຖຸນານີ້.
ທ່ານນາງກ່າວວ່າ,ປະຈຸບັນ,ການພົວພັນຈີນຫວຽດນາມໄດ້ຮັກສາທ່າອຽງການພັດທະນາຢ່າງຫມັ້ນທ່ຽງ.ເດືອນມີນາປີນີ້,ທ່ານສີຈິ້ນຜິງ,ເລຂາທິການໃຫຍ່ໄດ້ໂທລະສັບກັບທ່ານຫງວຽນຟູຈອງ,ເລຂາທິການໃຫຍ່ສູນກາງພັກຄອມມູນິດຫວຽດນາມ,ເພື່ອກ້າວເຖິງຂັ້ນມີຄວາມເຫັນທີ່ເປັນເອກະສັນກັນອັນສຳຄັນກ່ຽວກັບການປັບປຸງແລະຂະຫຍາຍການພົວພັນຄູ່ຮ່ວມມືຍຸດທະສາດຮອບ ດ້ານລະຫວ່າງຈີນກັບຫວຽດນາມຕື່ມອີກ.ເດືອນພຶດສະພາແລ້ວນີ້,ຄະນະກຳມະການຊີ້ນຳການຮ່ວມມືລະຫວ່າງສອງຝ່າຍຈີນຫວຽດນາມເທື່ອທີ6 ໄດ້ຈັດຂຶ້ນຢູ່ນະຄອນຫຼວງປັກກິ່ງ,ເພື່ອກຳນົດມາດຕະການລະອຽດທີ່ຊຸກຍູ້ການຮ່ວມມືແບບຕ່າງຝ່າຍຕ່າງທີ່ມີຜົນປະໂຫຍດລະຫວ່າງສອງປະເທດໃນຂົງເຂດຕ່າງໆໃນໄລຍະຕໍ່ໄປ.
ນາງກ່າວວ່າ,ພວກຂ້າພະເຈົ້າເຫັນວ່າ,ຈີນກັບຫວຽດນາມແມ່ນປະເທດໃກ້ຄຽງແລະປະເທດຄູ່ຮ່ວມມືທີ່ສຳຄັນ,ສອງປະເທດລ້ວນແຕ່ຢູ່ໃນໄລຍະທີ່ເປັນຂໍກະແຈໃນການປະຕິຮູບແລະການພັດທະນາ, ການພົວພັນຈີນຫວຽດນາມທີ່ຫມັ້ນທ່ຽງແລະປອດໃສລ້ວນແຕ່ມີຜົນດີຕໍ່ສອງຝ່າຍ.ພວກຂ້າພະເຈົ້າຫວັງວ່າ ການຢ້ຽມຢາມຂອງທ່ານປະທານເຈືອງເຕີນຊ່າງເທື່ອນີ້ຈະເພີ່ມທະວີຄວາມໄວ້ເນື້ອເຊື່ອໃຈກັນທາງການເມືອງກັບຫວຽດນາມຕື່ມອີກ,ຊຸກຍູ້ການຮ່ວມມືກັນຢ່າງແທ້ຈິງ,ເພີ່ມທະວີການແລກປ່ຽນແລະປະສານສົມທົບກັນໃນວຽກງານຫຼາຍຝ່າຍ,ເພື່ືອຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານຈີນຫວຽດນາມໄດ້ຮັບຄວາມຄືບຫນ້າໃຫມ່.
