ທ່ານຮາຊັນ ຣູຮານີໄດ້ຮັບເລືອກຕັ້ງເປັນປະທານາທິບໍດີອີຣານ ປະຊາຄົມໂລກມີປະຕິກິລິຍາທີ່ແຕກຕ່າງກັນ
ຕາມຂ່າວ CRI: ການເລືອກຕັ້ງປະທານາທິບໍດີຂອງອີຣານ ໄດ້ສະເຫຼີຍຜົນໃນຕອນຄ່ຳວັນທີ 15 ມິຖຸນານີ້ຕາມເວລາທ້ອງຖິ່ນ, ທ່ານຮາຊັນ ຣູຮານີ, ອະດີດຫົວໜ້າຜູ້ແທນການເຈລະຈາບັນຫານິວເຄຼຍອີຣານ, ຜູ້ສະໝັກຮັບເລືອກຕັ້ງຈາກພັກຝ່າຍອະນຸລັກນິຍົມທີ່ມີນະໂຍ ບາຍນິ້ມນວນພຽງຄົນດຽວ ໄດ້ຮັບໄຊຊະນະໃນການເລືອກຕັ້ງເທື່ອນີ້, ກາຍເປັນປະທານາທິບໍດີຄົນໃໝ່ຂອງອີຣານ. ປະຊາຄົມໂລກມີປະຕິກິລິຍາທີ່ແຕກຕ່າງກັນຕໍ່ການໄດ້ຮັບໄຊຊະນະໃນການເລືອກຕັ້ງຂອງທ່ານຣູຮານີ.
ວັນທີ 15 ມິຖຸນານີ້, ທ່ານບັນກີມູນ, ເລຂາທິການໃຫຍ່ອົງການສະຫະປະຊາຊາດ ໄດ້ຜ່ານໂຄສົກຂອງທ່ານອອກຖະແຫຼງການ, ສະແດງຄວາມຊົມເຊີຍຕໍ່ທ່ານຣູຮານີ. ທ່ານບັນກີມູນກ່າວວ່າ: ທ່ານເອງໄດ້ຕິດຕາມຢ່າງໃກ້ຊິດຕໍ່ການເລືອກຕັ້ງປະທານາທິບໍດີຂອງອີຣານມາໂດຍຕະຫຼອດ, ແລະສະແດງຄວາມເພິ່ງພໍໃຈຕໍ່ການເລືອກຕັ້ງເທື່ອນີ້ທີ່ມີອັດຕາການປ່ອນບັດລະດັບສູງ.
ຕໍ່ເລື່ອງທີ່ທ່ານຣູຮານີໄດ້ຮັບເລືອກຕັ້ງເປັນປະທານາທິບໍດີອີຣານ, ອາເມລິກາ ກ່າວວ່າ: ຈະເຄົາລົບການເລືອກເຟັ້ນຂອງປະຊາຊົນອີ ຣານ, ແລະກ່າວຢ້ຳວ່າຍິນດີຜ່ານຊ່ອງທາງການຕ່າງປະເທດໃນການແກ້ໄຂບັນຫານິວເຄຼຍຂອງອີຣານ.
ທ່ານເບັນຈາມິນ ເນທັນຢາຮູ, ນາຍົກລັດຖະມົນຕີອິສຣາແອນ ກ່າວວ່າ: ສິ່ງທີ່ອິສຣາແອນສົນໃຈທີ່ສຸດນັ້ນແມ່ນແຜນການນິວເຄຼຍຂອງອີຣານ. ທ່ານກ່າວຕໍ່ໄປວ່າ: ຜູ້ຕົກລົງແຜນການນິວເຄຼຍຂອງອີຣານແມ່ນທ່ານແກຣນ ອາຢາໂຕລາ ເຊອິດ ອາລີ ຮາເມເນອີ(Grand Ayatollah Seyyed Ali Khamenei), ຜູ້ນຳສູງສຸດຂອງອີຣານ, ຫາກບໍ່ແມ່ນປະທານາທິບໍດີຂອງອີຣານເປັນຜູ້ຕົກລົງ. ຂະນະດຽວກັນ ທ່ານກໍຮຽກຮ້ອງໃຫ້ປະຊາຄົມໂລກສືບຕໍ່ໃສ່ຄວາມກົດດັນຕໍ່ອີຣານໃນບັນຫານິວເຄຼຍ.
ວັນທີ 16 ມິຖຸນານີ້, ກົມຖະແຫຼງຂ່າວປະທານາທິບໍດີຣົດເຊຍ ຖະແຫຼງວ່າ: ທ່ານວຼາດີເມຍ ປູຕິນ, ປະທານາທິບໍດີຣັດເຊຍໄດ້ສົ່ງໂທລະເລກໄປຍັງທ່ານຣູຮານີ ເພື່ອຊົມເຊີຍທ່ານໄດ້ຮັບເລືອກຕັ້ງເປັນປະທານາທິບໍດີຄົນໃໝ່ຂອງອີຣານ. ທ່ານປູຕິນ ກ່າວໃນໂທລະເລກວ່າ: ເຊື່ອວ່າພາຍຫຼັງທ່ານຣູຮານີດຳລົງຕຳແໜ່ງປະທານາທິບໍດີອີຣານແລ້ວ, ຄົງຈະຊຸກຍູ້ຄວາມຈະເລີນຮຸ່ງເຮືອງແລະການພັດທະນາຂອງອີຣານ, ແລະຈະເພີ່ມທະວີການຂະຫຍາຍການພົວພັນລະຫວ່າງຣັດເຊຍກັບອີຣານຕື່ມອີກ.
ທ່ານນາງຄາເທີຣິນ ອາສທອນ, ຜູ້ຕາງໜ້າສູງສຸດດ້ານວຽກງານການຕ່າງປະເທດແລະຄວາມໝັ້ນຄົງຂອງສະຫະພາບເອີຣົບ ໄດ້ອອກຖະແຫຼງການ ໂດຍກ່າວວ່າ: ຄອງຄອຍດຳເນີນການຮ່ວມມືກັບການນຳຊຸດໃໝ່ຂອງອີຣານ, ແກ້ໄຂບັນຫານິວເຄຼຍຂອງອີຣານໂດຍຜ່ານຊ່ອງທາງການຕ່າງປະເທດໂດຍໄວ. ແຕ່ການປະຕິກິລິຍາຂອງອັງກິດມີຄວາມຈືດຈາງໂດຍທຽບຖານ.
ບາງປະເທດຕາເວັນອອກກາງທີ່ມີການພົວພັນສະໜິດແໜ້ນກັບອີຣານ ໄດ້ມີທ່າທີເບິ່ງໄປໃນແງ່ດີຕໍ່ທ່ານຣູຮານີໄດ້ຮັບເລືອກຕັ້ງເປັນປະທານາທິບໍດີອີຣານ. ມີຜູ້ນຳຂອງປະເທດຕາເວັນອອກກາງຫຼາຍປະເທດ ໄດ້ສົ່ງໂທລະເລກໄປຍັງທ່ານຣູຮານີຢ່າງວ່ອງໄວ, ເພື່ອຊົມເຊີຍທ່ານໄດ້ຮັບເລືອກຕັ້ງເປັນປະທານາທິບໍດີຄົນໃໝ່ຂອງອີຣານ.
