ປະທານປະເທດຫວຽດນາມຢ້ຽມຢາມຈີນຈະມີຜົນດີຕໍ່ການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ
ຕາມຂ່າວ CRI: ໂດຍຕອບສະໜອງຕາມຄຳເຊີນຂອງທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ, ທ່ານເຈື່ອງເຕີນຊ່າງ, ປະທານປະເທດຫວຽດນາມຈະເດີນທາງມາຢ້ຽມຢາມຈີນທາງລັດຖະກິດແຕ່ວັນທີ 19-21 ມິຖຸນານີ້, ເຊິ່ງຈະເປັນການຢ້ຽມຢາມຈີນທາງລັດຖະກິດເປັນຄັ້ງທຳອິດ ນັບແຕ່ທ່ານດຳລົງຕຳແໜ່ງປະທານປະເທດຫວຽດນາມເປັນຕົ້ນມາ, ກໍແມ່ນຜູ້ນຳຂັ້ນສູງຂອງຫວຽດນາມມາຢ້ຽມຢາມຈີນເປັນຄັ້ງທຳອິດພາຍຫຼັງການນຳຊຸດໃໝ່ຂອງຈີນໄດ້ຂຶ້ນບໍລິຫານປະເທດ. ວັນທີ 17 ມິຖຸນານີ້, ຂ່າວສານຫວຽດນາມໄດ້ລາຍງານຂ່າວກ່ຽວກັບທ່ານເຈື່ອງເຕີນຊ່າງ, ປະທານປະເທດຈະໄປຢ້ຽມຢາມຈີນຢ່າງຫຼວງຫຼາຍ, ບົດລາຍງານຂ່າວຂຽນວ່າ: ການໄປຢ້ຽມຢາມຈີນຂອງທ່ານເຈື່ອງເຕີນຊ່າງເທື່ອນີ້ ໄດ້ສະແດງໃຫ້ເຫັນເຖິງນະໂຍບາຍແລະຈຸດຢືນຂອງພັກແລະລັດຫວຽດນາມໃນການຊຸກຍູ້ແລະຂະຫຍາຍການພົວພັນລະຫວ່າງຫວຽດນາມ-ຈີນ, ຈະມີຜົນດີຕໍ່ການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ.
ບົດແຈ້ງຂ່າວເຫັນວ່າ: ຫວຽດນາມແລະຈີນແມ່ນສອງປະເທດທີ່ມີແມ່ນ້ຳລຳເຊແລະສາຍພູຕິດຈອດກັນ, ການພົວພັນມິດຕະພາບແລະການຮ່ວມມືໃນຂົງເຂດຕ່າງໆລະຫວ່າງຫວຽດນາມ-ຈີນພວມຂະຫຍາຍຕົວກວ້າງອອກແລະເຂົ້າສູ່ລວງເລິກ, ໄດ້ສ້າງຜົນປະໂຫຍດອັນແທ້ຈິງໃຫ້ແກ່ສອງປະເທດ.
ຕໍ່ການຈະໄປຢ້ຽມຢາມຈີນຂອງທ່ານເຈື່ອງເຕີນຊ່າງເທື່ອນີ້, ທ່ານຂົງສວນໂຢ້ວ, ເອກອັກຄະລັດຖະທູດຈີນປະຈຳຫວຽດນາມໄດ້ໃຫ້ສຳພາດຕໍ່ສື່ມວນຊົນຫວຽດນາມໃນຫວ່າງມໍ່ໆນີ້ວ່າ: ທ່ານປະທານເຈື່ອງເຕີນຊ່າງໄປຢ້ຽມຢາມຈີນເທື່ອນີ້ມີຄວາມໝາຍເປັນພິເສດ. ຈີນຫວັງວ່າການຢ້ຽມຢາມຈີນຂອງທ່ານປະທານເຈື່ອງເຕີນຊ່າງເທື່ອນີ້, ຈະເປັນການເພີ່ມທະວີຄວາມໄວ້ເນື້ອເຊື່ອໃຈທາງການເມືອງເຊິ່ງກັນແລະກັນກັບຫວຽດນາມຕື່ມອີກ, ຊຸກຍູ້ການຮ່ວມມືທີ່ແທ້ຈິງ, ເພີ່ມທະວີການແລກປ່ຽນປະສານງານກັນໃນວຽກງານຫຼາຍຝ່າຍ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ຫວຽດນາມໃຫ້ໄດ້ຮັບຄວາມຄືບໜ້າໃໝ່.
