ທ່ານປະທານປະເທດຫວຽດນາມອວຍພອນໃຫ້ການພົວພັນມິດຕະ ພາບແລະການຮ່ວມມືຮອບດ້ານລະ ຫວ່າງຫວຽດນາມ-ຈີນຈົ່ງໄດ້ຮັບການສືບທອດກັນໄປໃນທຸກເຊັ່ນຄົນ
ໂດຍຕອບສະໜອງຕາມຄຳເຊີນຂອງທ່ານສີຈິ້ນຜິງ, ປະທານປະເທດຈີນ, ທ່ານເຈື່ອງເຕີນຊ່າງ, ປະທານປະເທດຫວຽດນາມໄດ້ເດີນທາງມາຢ້ຽມຢາມຈີນທາງລັດຖະກິດແຕ່ວັນທີ 19-21 ມິຖຸນານີ້. ກ່ອນອອກເດີນທາງ, ທ່ານເຈື່ອງເຕີນຊ່າງ ໄດ້ໃຫ້ສຳພາດຕໍ່ສື່ມວນຊົນຈີນຢູ່ນະຄອນຫຼວງຮາໂນຍໃນວັນທີ 18 ມິຖຸນານີ້ ໂດຍກ່າວວ່າ: ຫວຽດນາມແລະຈີນແມ່ນປະເທດບ້ານໃກ້ເຮືອນຄຽງທີ່ດີຕໍ່ກັນ, ປະຊາຊົນສອງຊາດມີໄມຕີຈິດມິດຕະພາບອັນເປັນມູນເຊື້ອມາແຕ່ດົນນານ, ຂໍອວຍພອນໃຫ້ການພົວພັນມິດຕະພາບແລະການຮ່ວມມືຮອບດ້ານລະ ຫວ່າງຫວຽດນາມ-ຈີນຈົ່ງໄດ້ຮັບການສືບທອດກັນໄປໃນທຸກເຊັ່ນຄົນ.
ທ່ານເຈື່ອງເຕີນຊ່າງ ກ່າວຕື່ມວ່າ: ໃນຫຼາຍປີມານີ້, ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ-ຈີນ ໄດ້ຮັບການປັບປຸງແລະຂະຫຍາຍຕົວຢ່າງບໍ່ຢຸດຢັ້ງ, ການແລກປ່ຽນ, ການຢ້ຽມຢາມ ແລະ ການຮ່ວມມືດ້ານການເມືອງລະຫວ່າງສອງຝ່າຍໄດ້ມີຄວາມຄືບໜ້າເລື້ອຍໆ, ການຮ່ວມມືໃນຂົງເຂດເສດຖະກິດ, ການຄ້າ, ການລົງທຶນ, ການທ່ອງທ່ຽວ ແລະອື່ນໆລະຫວ່າງສອງປະເທດ ກໍມີຄວາມຄືບໜ້າໃໝ່ເລື້ອຍໆ. ການແລກປ່ຽນກັນລະຫວ່າງບັນດາພາກສ່ວນ, ຂະແໜງການ, ທ້ອງຖິ່ນ ແລະ ອົງການຈັດຕັ້ງມະຫາຊົນຂອງສອງປະເທດ ໄດ້ຂະຫຍາຍຕົວກວ້າງອອກແລະເຂົ້າສູ່ລວງເລິກຢ່າງບໍ່ຢຸດຢັ້ງ.
ທ່ານເຈື່ອງເຕີນຊ່າງ ກ່າວວ່າ: ແນ່ນອນແລ້ວ, ໃນຂະນະທີ່ການພົວພັນລະຫວ່າງຫວຽດນາມ-ຈີນໄດ້ຮັບການຂະຫຍາຍຕົວຢ່າງສະດວກນັ້ນ, ການພົວພັນລະຫວ່າງສອງປະເທດກໍປະເຊີນກັບບັນຫາທີ່ສັບສົນແລະມີຄວາມຫຍຸ້ງຍາກເຊັ່ນກັນ.
ທ່ານກ່າວວ່າມີຄວາມຄອງຄອຍຕໍ່ການໄປຢ້ຽມຢາມຈີນເທື່ອນີ້ທີ່ຈະມີການແລກປ່ຽນກັບຜູ້ນຳຈີນທ່ານຕ່າງໆຢ່າງເປີດອົກເປີດໃຈແລະກົງໄປກົງມາ, ສືບຕໍ່ເພີ່ມຕື່ມວິທີໃໝ່ໃນການແກ້ໄຂບັນຫາເທິງທະເລລະຫວ່າງສອງປະເທດຢ່າງເໝາະສົມ, ປະກອບສ່ວນເຂົ້າໃນການພັດທະນາການພົວພັນລະຫວ່າງສອງພັກ-ລັດຢ່າງປອດໃສ, ໝັ້ນທ່ຽງ ແລະ ຍາວນານ, ແລະປະກອບສ່ວນເຂົ້າໃນການປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້.
