ປະທານປະເທດຈີນພົບປະເຈລະຈາກັບປະທານປະເທດຫວຽດນາມ
ທ່ານສີຈິ້ນຜິງ ປະທານປະເທດຈີນຈັດພິທີເພື່ອເປັນກຽດໃຫ້ແກ່
ທ່ານເຈື່ອງເຕີນຊ່າງ ປະທານປະເທດວຽດນາມຢູ່ສະໜາມຫຼວງນອກປະຕູຕາເວັນອອກຂອງຫໍສະພາປະຊາຊົນ.
ວັນທີ 19 ມິຖຸນານີ້ ຢູ່ຫໍສະພາປະຊາຊົນທີ່ປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານເຈື່ອງເຕີນຊ່າງ ປະທານປະເທດຫວຽດນາມ. ໃນທ່າມກາງບັນຍາກາດທີ່ມີໄມຕີຈິດມິດຕະພາບແລະເປີດອົກເປີດໃຈ, ປະມຸກລັດສອງປະເທດໄດ້ລົງເລິກແລກປ່ຽນຄວາມຄິດຄວາມເຫັນກ່ຽວກັບການລົງເລິກການຮ່ວມມືຍຸດທະສາດຮອບດ້ານລະຫວ່າງຈີນກັບຫວຽດນາມພາຍໃຕ້ສະຖານະການໃໝ່, ແລະໄດ້ມີຄວາມຮັບຮູ້ທີ່ເປັນເອກະສັນກັນຢ່າງກວ້າງຂວາງ. ປະມຸກລັດສອງປະເທດເປັນເອກະສັນກັນເຫັນວ່າ: ຈີນແລະຫວຽດນາມລ້ວນແຕ່ຢູ່ໃນໄລຍະສຳຄັນແຫ່ງການພັດທະນາເສດຖະກິດສັງຄົມ, ສອງຝ່າຍຖືການພັດທະນາຂອງຝ່າຍກົງກັນຂ້າມເປັນໂອກາດຂອງການພັດທະນາຕົນເອງ, ຕ້ອງລົງເລິກການຮ່ວມມືຍຸດທະສາດຮອບດ້ານຕື່ມອີກ.
ໃນການພົບປະເຈລະຈາ, ທ່ານສີຈີ້ນຜິງຊີ້ອອກວ່າ, ຈີນກັບຫວຽດນາມແມ່ນປະເທດໃກ້ຄຽງແລະຄູ່ຮ່ວມມືທີ່ສຳຄັນ. ຂະບວນການຂອງການພົວພັນລະຫວ່າງສອງປະເທດເປັນເວລາ 60 ກວ່າປີມານີ້ໄດ້ເປີດຂໍ້ຄິດທີ່ສຳຄັນທີ່ສຸດໃຫ້ພວກເຮົາ, ນັ້ນກໍຄື: ບໍ່ວ່າຈະພົບບັນຫາແລະສິ່ງລົບກວນໃດໆກໍຕາມ, ຈີນແລະຫວຽດນາມລ້ວນແຕ່ຕ້ອງເດີນຕາມເສັ້ນທາງທີ່ມີໄມຕີຈິດຕໍ່ກັນແລະຮ່ວມມືກັນຢ່າງເດັດດ່ຽວ.
ທ່ານເຈື່ອງເຕີນຊ່າງກ່າວວ່າ, ພັກ, ລັດ ແລະປະຊາຊົນຂອງຫວຽດນາມຈະບໍ່ລືມການສະໜັບສະໜູນແລະຄວາມຊ່ອຍເຫຼືອຂອງຈີນ, ຍິນດີເພີ່ມທະວີມິດຕະພາບຖານບ້ານໃກ້ເຮືອນຄຽງແລະການຮ່ວມມືຮອບດ້ານກັບຈີນ, ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນ, ແກ້ໄຂຄວາມຂັດແຍ້ງກັນຢ່າງເໝາະສົມ, ສືບທອດແລະເສີມຂະຫຍາຍມິດຕະພາບອັນເປັນມູນເຊື້ອ, ເຮັດໃຫ້ການພົວພັນລະຫວ່າງຫວຽດນາມກັບຈີນໄດ້ຮັບການພັດທະນາໃຫ້ດີກວ່າເກົ່າ.
ກ່ຽວກັບບັນຫາທະເລຈີນໃຕ້, ທ່ານສີຈິ້ນຜິງກ່າວເນັ້ນວ່າ, ຈີນແລະຫວຽດນາມຕ້ອງມີນ້ຳໃຈທີ່ຮັບຜິດຊອບຕໍ່ປະຫວັດສາດແລະປະຊາຊົນ, ຖືມິດຕະພາບແລະການພັດທະນາຂອງສອງປະເທດເປັນເລື່ອງສຳຄັນ, ຕັດສິນໃຈຊີ້ນຳແລະຊຸກຍູ້ການແກ້ໄຂບັນຫາທະເລຈີນໃຕ້ດ້ວຍວິທີການເມືອງ, ປ້ອງກັນບໍ່ໃຫ້ລົບກວນການພົວພັນສອງປະເທດ. ສອງຝ່າຍຄວນຍຶດໝັ້ນຊຸກຍູ້ການເຈລະຈາສອງຝ່າຍແລະການປຶກສາຫາລືດ້ວຍໄມຕີຈິດ, ບໍ່ໃຊ້ການເຄື່ອນໄຫວຝ່າຍດຽວໃດໆທີ່ອາດຈະເຮັດໃຫ້ຄວາມຂັດແຍ້ງສັບສົນກວ່າເກົ່າແລະຮ້າຍແຮງຂຶ້ນ, ແລະປ້ອງກັນບໍ່ໃຫ້ບັນຫາທະເລຈີນໃຕ້ຫັນເປັນບັນຫາສາກົນ.
ທ່ານເຈື່ອງເຕີນຊ່າງກ່າວວ່າ, ຫວຽດນາມຍິນດີຕັ້ງໜ້າຜັນຂະຫຍາຍຄວາມຮັບຮູ້ທີ່ເປັນເອກະກັນກັນລະຫວ່າງສອງປະເທດ, ຜ່ານຈາກການປຶກສາຫາລືດ້ວຍໄມຕີຈິດ, ແກ້ໄຂບັນຫາທີ່ກ່ຽວຂ້ອງຢ່າງເໝາະສົມ, ຕັ້ງໜ້າເຈລະຈາກັນກ່ຽວກັບການຂີດແບ່ງຊາຍແດນແລະຮ່ວມກັນພັດທະນາຢູ່ນອກປາກອ່າວເປີຍປູ້, ຮ່ວມກັນປົກປັກຮັກສາສັນຕິພາບແລະສະຖຽນລະພາບເທິງທະເລ, ບໍ່ເຮັດໃຫ້ບັນຫາທະເລຈີນໃຕ້ກະທົບກະເທືອນເຖິງການພົວພັນສອງປະເທດ.
