ຈີນຍິນດີຮ່ວມກັບ ສປຊ ຊຸກຍູ້ໃຫ້ບັນຫາຈຸດສຸມໃນພາກພື້ນ ເຊັ່ນ ບັນຫາຊີຣີເປັນຕົ້ນ ໃຫ້ໄດ້ຮັບການແກ້ໄຂຢ່າງເໝາະສົມ
ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ພົບປະທ່ານບັນກີມູນ, ເລຂາທິການໃຫຍ່ສະຫະປະຊາຊາດ ຢູ່ທີ່ນະຄອນຫຼວງປັກກິ່ງໃນວັນທີ 20 ມິຖຸນານີ້, ໂດຍກ່າວວ່າ: ຈີນມີຈຸດຢືນມາໂດຍຕະຫຼອດແລະຕັ້ງໜ້າສະໜັບສະໜູນສະຫະປະຊາຊາດເສີມຂະຫຍາຍບົດບາດຫຼາຍ ກວ່າເກົ່າໃນວຽກງານສາກົນ, ຍິນດີເຂົ້າຮ່ວມວຽກງານໃນຂົງເຂດຕ່າງໆຂອງສະຫະປະຊາຊາດຢ່າງຕັ້ງໜ້າ, ຮ່ວມກັນຊຸກຍູ້ໃຫ້ບັນຫາຈຸດສຸມໃນພາກພື້ນ ເຊັ່ນ ບັນຫາຊີຣີເປັນຕົ້ນ ໃຫ້ໄດ້ຮັບການແກ້ໄຂຢ່າງເໝາະສົມ.
ທ່ານຫຼີເຄີ້ສຽງ ກ່າວວ່າ: ໃນ 60 ກວ່າປີຜ່ານມານີ້, ສະຫະປະຊາຊາດໄດ້ເສີມຂະຫຍາຍບົດບາດອັນສຳຄັນໃນການປົກປັກຮັກສາສັນຕິພາບຂອງໂລກ ແລະຊຸກຍູ້ຄວາມຈະເລີນຮຸ່ງເຮືອງຮ່ວມກັນ. ວັດຖຸປະສົງແລະຫຼັກການຂອງກົດບັດສະຫະປະຊາຊາດແມ່ນພື້ນຖານອັນໝັ້ນແກ່ນຂອງການພົວພັນລະຫວ່າງຊາດໃນຍຸກປັດຈຸບັນ, ຕ້ອງໄດ້ຮັບການປົກປ້ອງຢ່າງເດັດດ່ຽວ. ທ່ານຫຼີເຄີ້ສຽງ ກ່າວຕື່ມວ່າ: ການພັດທະນາກັບບັນຫາການພັດທະນາແບບຍືນຍົງມີການພົວພັນຢ່າງແໜ້ນແຟ້ນ, ຈີນໃນຖານະເປັນປະເທດພັດທະນາທີ່ໃຫຍ່ທີ່ສຸດ, ໄດ້ຖືການພັດທະນາໄວ້ຢູ່ຖານະສຳຄັນອັນດັບໜຶ່ງໂດຍຕະຫຼອດ, ຂະນະດຽວກັນກໍຍິ່ງເອົາໃຈໃສ່ນຳການພັດທະນາແບບຍືນຍົງ. ຈີນຍິນດີຮ່ວມກັບສະຫະປະຊາຊາດຊຸກຍູ້ການບັນລຸເປົ້າໝາຍສະຫະສະວັດດ້ານການພັດທະນາ, ເຮັດໃຫ້ມວນມະນຸດໄດ້ຮັບຜົນປະໂຫຍດຈາກການພັດທະນາ.
ທ່ານບັນກີມູນ ກ່າວວ່າ: ຈີນໄດ້ໃຫ້ການສະໜັບສະໜູນແກ່ສະຫະປະຊາຊາດຢ່າງຫຼວງຫຼາຍ, ໄດ້ເສີມຂະຫຍາຍບົດບາດອັນສຳຄັນໃນການຮັບມືກັບສິ່ງທ້າທາຍທົ່ວໂລກ, ຊຸກຍູ້ການພັດທະນາແບບຍືນຍົງ, ແລະຊຸກຍູ້ການແກ້ໄຂບັນຫາຈຸດສຸມໃນພາກພື້ນ. ສະຫະປະຊາຊາດຍິນດີເພີ່ມທະວີການຮ່ວມມືກັບຈີນ, ເພື່ອບັນລຸເປົ້າໝາຍສະຫັດສະວັດດ້ານການພັດທະນາໂດຍໄວ, ປົກປັກຮັກສາຄວາມສຸກຂອງປະຊາຊົນຈີນແລະປະຊາຊົນໂລກຢ່າງມີປະສິດຜົນກວ່າເກົ່າ.
