ຈີນແລະຣັດເຊຍຈັດການຊ້ອມຮົບຮ່ວມທີ່ມີຂະໜາດໃຫຍ່ທີ່ສຸດໃນປະຫວັດສາດ
ອີງຕາມຄວາມຮັບຮູ້ທີ່ເປັນເອກະສັນກັນທີ່ຈີນແລະຣັດເຊຍໄດ້ຕົກລົງຮ່ວມກັນ, ກອງກຳປັ່ນຂອງກອງທັບເຮືອຈີນແລະຣັດເຊຍໄດ້ຕົກລົງຈັດການຊ້ອມຮົບຮ່ວມທາງທະເລທີ່ມີຊື່ວ່າ"ປະຕິບັດການຮ່ວມດ້ານການທະຫານທາງທະເລ2013"ຢູ່ເຂດທະເລໃກ້ກັບອ່າວເຕີມະຫາລາດຂອງຣັດເຊຍແຕ່ວັນທີ5ຫາວັນທີ12ກໍລະກົດນີ້. ຫຼັງຈາກນັ້ນ, ສອງປະເທດຍັງຈະຈັດການຊ້ອມຮົບຮ່ວມເພື່ອຕ້ານການກໍ່ການຮ້າຍຢູ່ເຊວຢາບິນສເຄີ ຂອງຣັດເຊຍແຕ່ວັນທີ27ກໍລະກົດຫາວັນທີ15ສິງຫາໜ້ານີ້. ຊ່ຽວຊານຈີນເຫັນວ່າ, ການຊ້ອມຮົບສອງເທື່ອດັ່ງກ່າວນີ້ບໍ່ພຽງແຕ່ໄດ້ສະແດງໃຫ້ເຫັນວ່າການຮ່ວມມືດ້ານການທະຫານລະຫວ່າງຈີນກັບຣັດເຊຍໄດ້ກ້າວໄປສູ່ການຫັນເປັນແບບກົນໄກແລະເປັນປົກກະຕິເທົ່ານັ້ນ, ແລະຍັງໄດ້ສະແດງໃຫ້ເຫັນເຖິງຄວາມຕັດສິນໃຈແລະຄວາມສາມາດຂອງກອງທັບຈີນແລະຣັດເຊຍໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນອາຊີອາຊີຟິກ.
ກຳປັ່ນຈີນທີ່ຈະເຂົ້າຮ່ວມການຊ້ອມຮົບຮ່ວມທາງທະເລຈີນ-ຣັດເຊຍໃນຄັ້ງນີ້ໄດ້ດຳເນີນທາງໄປເຖິງທ່າກຳປັ່ນວຼາດີວົສຕົກຂອງຣັດເຊຍແລ້ວໃນວັນທີ5ກໍລະກົດນີ້. ມາຮອດເວລານີ້, ກຳປັ່ນທັງສອງຝ່າຍຈີນແລະຣັດເຊຍໄດ້ເຕົ້າໂຮມກັນຢ່າງພ້ອມພຽງແລ້ວເພື່ອຈະດຳເນີນການຊ້ອມຮົບໃນຄັ້ງນີ້.
ມີສື່ມວນຊົນຕ່າງປະເທດໄດ້ລາຍງານບົດວິຈານວ່າ, ການຊ້ອມຣົບຮ່ວມຈີນຣັດເຊຍມີຈຸດປະສົງຢາກຕ້ານຢັນການເພີ່ມແຮງກົດດັນຈາກດ້ານຍຸດທະສາດຂອງອາເມລິກາແລະສ້າງຄວາມເກງຂາມໃຫ້ແກ່ການທ້າທາຍດ້ານການທະຫານຂອງຍີ່ປຸ່ນ. ກ່ຽວກັບເລື່ອງນີ້, ທ່ານຢາງຈຸ້ນເຟີຍ, ຜູ້ບັນຊາການກອງກຳປັ່ນຝ່າຍຈີນ, ຮອງຜູ້ບັນຊາການກອງກຳປັ່ນທະເລເໜືອກອງທັບເຮືອຈີນກ່າວວ່າ, ການຊ້ອມຮົບຮ່ວມໃນເທື່ອນີ້ມີຈຸດປະສົງ3ຢ່າງຄື: ໜຶ່ງແມ່ນເພື່ອປັກປຸງແລະເສີມຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບຣັດເຊຍໃຫ້ໝັ້ນຄົງ, ຍົກສູງລະດັບການປະສານງານດ້ານຍຸດທະສາດລະຫວ່າງສອງປະເທດ;ອັນທີສອງແມ່ນເພື່ອເພີ່ມທະວີຄວາມໄວ້ເນື້ອເຊື່ອໃຈກັນດ້ານຍຸດທະສາດລະຫວ່າງສອງກອງທັບຈີນຣັດເຊຍ, ລົງເລິກການຮ່ວມມືຕົວຈິງລະຫວ່າງສອງກອງທັບ, ອັນທີສາມແມ່ນເພື່ອໃຫ້ກອງທັບເຮືອຂອງສອງຝ່າຍໄດ້ເຝິກຊ້ອມໃນການປະສານສົມທົບກັນໃນການບັນຊາການປະຕິບັດການເຄື່ອນໄຫວຮ່ວມດ້ານການທະຫານທາງທະເລ, ຍົກສູງຄວາມສາມາດຂອງສອງກອງທັບເຮືອໃນການຮ່ວມກັນຮັບມືກັນໄພຂົ່ມຂູ່ຕໍ່ຄວາມປອດໄພທາງທະເລ. ທ່ານຢາງຈຸ້ນເຟີຍຍັງກ່າວວ່າ, ສິ່ງທີ່ຕ້ອງຊີ້ໃຫ້ເຫັນນັ້ນແມ່ນການເຝິກຊ້ອມໃນເທື່ອນີ້ບໍ່ໄດ້ແນໃສ່ຝ່າຍທີ3, ຍຸດທະສາດປ້ອງກັນທະເລໃກ້ຂອງກອງທັບເຮືອຈີນບໍ່ໄດ້ມີການປ່ຽນແປງ.
ທ່ານຈ່າງຈຸ່ນເຊີ້ ຮອງນັກຄົ້ນຄວ້າ ຂອງພະແນກໝາຍເລກ1ຂອງສະຖາບັນຄົ້ນຄວ້າວິຊາການທະຫານກອງທັບເຮືອຈີນໄດ້ກ່າວວ່າ, ຄວາມຂັດແຍ່ງທາງທະເລຢູ່ເຂດອາຊີໃນປະຈຸບັນໄດ້ຮຸນແຮງຂຶ້ນ, ຄວາມຮັບຜິດຊອບບໍ່ແມ່ນຢູ່ນຳຝ່າຍຈີນ, ການຊ້ອມຮົບຮ່ວມທາງທະເລຈີນຣັດເຊຽມີຜົນດີຈະສາມາດຊ່ວຍຍົກສູງຄວາມສາມາດຂອງສອງກອງທັບໃນການຮ່ວມກັນຮັບມືກັບສິ່ງທ້າທາຍແລະໄພຂົ່ມຂູ່ຕ່າງໆ, ແລະມີຜົນດີຕໍ່ການຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງພາກພື້ນແຫ່ງນີ້.
