ສຳເລັດການອົບຮົມຊຸດທຳອິດຂອງສູນແລກປ່ຽນອົບຮົມບຸກຄະລາກອນຂະແໜງການບໍ່ແຮ່ຈີນ-ອາຊຽນ
ສູນແລກປ່ຽນອົບຮົມບຸກຄະລາກອນຂະແໜງການບໍ່ແຮ່ຈີນ-ອາຊຽນ ໄດ້ຈັດພິທີປິດຊຸດອົບຮົມການສຳຫຼວດທໍລະນີສາດຄົ້ນຫາບໍ່ແຮ່ໃນວັນສຸກອາທິດຜ່ານມານີ້, ໂດຍຜ່ານການຝຶກອົບຮົມເປັນເວລາ 2 ເດືອນ, ສຳມະນາກອນທຸກຖ້ວນໜ້າໄດ້ສຳເລັດການຮຽນຮູ້ເນື້ອໃນຝຶກອົບຮົມທຸກລາຍການຢ່າງຈົບງາມ, ແລະບັນລຸເປົ້າໝາຍທີ່ກຳນົດໄວ້ລ່ວງໜ້າ.
ຂ່າວແຈ້ງວ່າ, ໃນຊຸດອົບຮົມທຳອິດນີ້ມີສຳມະນາກອນລວມ 14 ຄົນເຂົ້າຮ່ວມການອົບຮົມ, ໃນນັ້ນມີສຳມະນາກອນ 7 ຄົນມາຈາກປະເທດອາຊຽນ, ເຊັ່ນ: ລາວ, ໄທ, ມຽນມາ ແລະ ມະເລເຊຍ. ຫົວຂໍ້ການຝຶກອົບຮົມເທື່ອນີ້ຕົ້ນຕໍແມ່ນການຄົ້ນຫາບໍ່ແຮ່ທໍລະນີສາດ, ໃນການຝຶກອົບຮົມໄດ້ປະສານສົມທົບກັນລະຫວ່າງການສອນດ້ານທິດສະດີກັບການລົງປະຕິບັດຕົວຈິງຢູ່ບໍ່ແຮ່, ແລະມີລັກສະນະຈຸດສຸມທີ່ສຸດ.
ໃນພິທີປິດການອົບຮົມຄັ້ງນີ້, ສຳມະນາກອນຈາກປະເທດອາຊຽນ ກ່າວວ່າ: ການເຂົ້າຮ່ວມຊຸດອົບຮົມເທື່ອນີ້ ເວົ້າສຳລັບການດຳເນີນງານແລະການຮ່ຳຮຽນຂອງຕົນແລ້ວແມ່ນປະສົບປະການອັນລ້ຳຄ່າ, ບໍ່ພຽງແຕ່ຈະນຳເອົາຄວາມຮູ້ແລະເຕັກໂນໂລຊີທີ່ຮຽນໄດ້ຢູ່ຈີນເທື່ອນີ້ກັບຄືນໄປນຳໃຊ້ຢູ່ປະເທດຕົນເທົ່ານັ້ນ, ແຕ່ຍັງຈະນຳເອົາຄວາມຮັກແພງແລະໄມຕີຈິດມິດຕະພາບອັນເລິກເຊິ່ງຈາກປະຊາຊົນຈີນທີ່ມີຕໍ່ປະຊາຊົນປະເທດອາຊຽນນັ້ນກັບຄືນປະເທດຕົນອີກດ້ວຍ.
