ການຄ້າສອງຝ່າຍຈີນ-ອາຊຽນຈະບັນລຸ 500 ຕື້ໂດລາເມື່ອຮອດປີ 2015
ໃນກອງປະຊຸມຖະແຫຼງຂ່າວທີ່ຫ້ອງວ່າການຄະນະລັດຖະບານຈີນຈັດຂຶ້ນໃນວັນທີ 23 ກໍລະກົດນີ້, ທ່ານນາງກາວຢ້ຽນ, ລັດຖະມົນຕີຊ່ວຍວ່າການກະຊວງການຄ້າຈີນ ກ່າວວ່າ: ຈີນແລະອາຊຽນໄດ້ສ້າງການພົວພັນຄູ່ຮ່ວມມືຍຸດທະສາດເປັນເວລາ 10 ປີມານີ້, ການຮ່ວມມືດ້ານເສດຖະກິດການຄ້າລະຫວ່າງສອງຝ່າຍໄດ້ຮັບການພັດທະນາຢ່າງວ່ອງໄວ, ຕາມທ່າອ່ຽງການພັດທະນາໃນປັດຈຸບັນແລ້ວ, ເມື່ອຮອດປີ 2015, ມູນຄ່າການຄ້າລະຫວ່າງສອງຝ່າຍຈະບັນລຸເຖິງ 500 ຕື້ໂດລາສະຫະລັດ.
ຕາມຕົວເລກຂໍ້ມູນສະຖິຕິຂອງຝ່າຍຈີນ, ມູນຄ່າການຄ້າສອງຝ່າຍລະຫວ່າງຈີນ-ອາຊຽນ ໄດ້ເພີ່ມຈາກ 54 ຕື້ 767 ລ້ານໂດລາໃນປີ 2002 ຂຶ້ນເປັນ 400 ຕື້ 100 ລ້ານໂດລາໃນປີ 2012, ສະເລ່ຍແລ້ວ ໄດ້ເພີ່ມຂຶ້ນ 22% ຕໍ່ປີ. ໃນ 6 ເດືອນຕົ້ນປີນີ້, ມູນຄ່າການຄ້າລະຫວ່າງສອງຝ່າຍໄດ້ບັນລຸ 210 ຕື້ 560 ລ້ານໂດລາ, ເພີ່ມຂຶ້ນ 12,2% ເມື່ອທຽບກັບໄລຍະດຽວກັນຂອງປີກາຍ. ປັດຈຸບັນ, ຈີນແມ່ນຄູ່ການຄ້າໃຫຍ່ອັນດັບໜຶ່ງຂອງອາຊຽນ, ຂະນະທີ່ອາຊຽນແມ່ນຄູ່ການຄ້າໃຫຍ່ອັນດັບສາມຂອງຈີນ.
ຕົວເລກຂໍ້ມູນສະແດງໃຫ້ເຫັນວ່າ, ໃນໄລຍະດົນນານມານີ້, ຈີນໄດ້ຂາດດຸນການຄ້າກັບອາຊຽນມາໂດຍຕະຫຼອດ, ແຕ່ສະພາບດັ່ງກ່າວໄດ້ມີການປ່ຽນແປງໄປໃນປີ 2012, ໂດຍຈີນໄດ້ປຽບດຸນການຄ້າກັບອາຊຽນ 8 ຕື້ 500 ລ້ານໂດລາ. ທ່ານນາງກາວຢ້ຽນ, ລັດຖະມົນຕີຊ່ວຍວ່າການກະຊວງການຄ້າຈີນ ກ່າວວ່າ: ຈີນຈະໃຊ້ມາດຕະການຕ່າງໆ, ເປັນຕົ້ນແມ່ນເພີ່ມຄວາມສະດວກໃນການຄ້າລະຫວ່າງສອງຝ່າຍ, ເພື່ອເປີດກວ້າງການນຳເຂົ້າຈາກປະເທດອາຊຽນ.
ນັບມາຮອດທ້າຍເດືອນມິຖຸນາປີນີ້, ນັບລວມແລ້ວ, ຈີນລົງທຶນໂດຍກົງຕໍ່ປະເທດອາຊຽນບັນລຸເກືອບ 30 ຕື້ໂດລາ, ກວມການລົງທຶນໂດຍກົງຕໍ່ພາຍນອກຂອງຈີນປະມານ 5,1%. ອາຊຽນໄດ້ກາຍເປັນອົງກອນເສດຖະກິດອັນດັບ 4 ທີ່ຈີນໄປລົງທຶນໂດຍກົງຫຼາຍກວ່າໝູ່. ໃນໄລຍະດຽວກັນ, ນັບລວມແລ້ວ, ອາຊຽນໄດ້ລົງທຶນຢູ່ຈີນຫຼາຍກວ່າ 80 ຕື້ໂດລາ, ກວມທຶນຕ່າງປະເທດຢູ່ຈີນ 6,6%, ເຊິ່ງໄດ້ກາຍເປັນແຫຼ່ງທຶນພາຍນອກໃຫຍ່ອັນດັບ 3 ຂອງຈີນ.
ໃນເວລາຕອບຄຳຖາມຂອງນັກຂ່າວ ກ່ຽວກັບບັນຫາທີ່ວ່າ: ຄວາມຂັດແຍ່ງລະຫວ່າງຈີນ-ຟິລິບປິນໃນບັນຫາທະເລຈີນໃຕ້ຈະສົ່ງຜົນສະທ້ອນເຖິງການພົວພັນດ້ານເສດຖະກິດການຄ້າລະຫວ່າງຈີນກັບປະເທດອາຊຽນຫຼືບໍ່? ທ່ານນາງ ກາວຢ້ຽນ ກ່າວວ່າ: ຟິລິບປິນຈະເປັນປະເທດກຽດຕິຍົດໃນງານວາງສະແດງສິນຄ້າຈີນ-ອາຊຽນຄັ້ງທີ 10, ຕໍ່ເລື່ອງນີ້, ຝ່າຍຟິລິບປິນ ໄດ້ໃຫ້ຄວາມຢືນຢັນແລ້ວ, ພວກຂ້າພະເຈົ້າຫວັງວ່າ ປະເທດຕ່າງໆລ້ວນແຕ່ຈະສ້າງບັນຍາກາດອັນດີງາມໂດຍປິ່ນອ້ອມສະພາບລວມຂອງການຮ່ວມມືລະຫວ່າງຈີນ-ອາຊຽນ. ທ່ານນາງ ກາວຢ້ຽນ ກ່າວຕື່ມວ່າ: ລັດຖະບານຈີນໄດ້ສະໜັບສະໜູນແລະໃຫ້ຄວາມສຳຄັນຕໍ່ວຽກງານການເຈລະຈາເຂດການຄ້າເສລີຮົງກົງ-ອາຊຽນ ໂດຍຕະຫຼອດ, ປັດຈຸບັນ ການເຈລະຈາໄດ້ມີຄວາມຄືບໜ້າຫຼາຍແລ້ວ.
