ກິດຈະກຳຄູສອນພາສາຈີນຜູ້ອາວຸໂສຂອງລາວໄປທັດສະນະສຶກສາຢູ່ຈີນ 2013 ໄດ້ສຳເລັດລົງຢູ່ແຂວງຢຸນນານ
ກິດຈະກຳຄູສອນພາສາຈີນຜູ້ອາວຸໂສຂອງລາວໄປທັດສະນະສຶກສາຢູ່ຈີນ 2013 ເຊິ່ງແມ່ນສະມາຄົມແລກປ່ຽນກັບພາຍນອກແຂວງຢຸນນານເປັນເຈົ້າພາບ, ສູນສຶກສາວັດທະນະທຳແລກປ່ຽນກັບພາຍນອກແຂວງຢຸນນານ ເປັນຜູ້ຮັບຜິດຊອບຈັດຂຶ້ນນັ້ນ ໄດ້ສຳເລັດລົງແລ້ວໃນຫວ່າງບໍ່ດົນນີ້, ເຊິ່ງມີຫົວໜ້າອຳນວຍການໂຮງຮຽນ ແລະ ຄູສອນພາສາຈີນຜູ້ອາວຸໂສທີ່ມາຈາກລາວ 11 ທ່ານໄດ້ເຂົ້າຮ່ວມກິດຈະກຳໃນຄັ້ງນີ້.
ຫົວໜ້າອຳນວຍການໂຮງຮຽນ ແລະ ຄູສອນພາສາຈີນຜູ້ອາວຸໂສ 11 ທ່ານດັ່ງກ່າວແມ່ນມາຈາກໂຮງຮຽນຫຼຽວໂຕນະຄອນຫຼວງວຽງຈັນ, ໂຮງຮຽນຈົງເຕັກແຂວງສະຫວັນນະເຂດ ແລະ ໂຮງຮຽນຫຼຽວເປແຂວງອຸດົມໄຊ. ໃນໄລຍະຈັດກິດຈະກຳເທື່ອນີ້, ຄະນະຜູ້ແທນໄດ້ໄປທັດສະນະສຶກສາຢູ່ຫ້ອງການວຽກງານຊາວຈີນຕ່າງດ້າວແຂວງຢຸນນານ ແລະ ວິທະຍາໄລວັດທະນະທຳຈີນຢຸນນານ ແລະ ເຂົ້າຮ່ວມກອງປະຊຸມສຳມະນາວຽກງານການສຶກສາວັດທະນະທຳ ເພື່ອແລກປ່ຽນຄວາມຄິດຄວາມເຫັນຢ່າງເລິກເຊິ່ງ ກ່ຽວກັບການສຶກສາວັດທະນະທຳຈີນຂອງລາວ, ລູກຫຼານຂອງຊາວລາວເຊື້ອສາຍຈີນແລະຈີນຕ່າງດ້າວທີ່ມາຮຽນຕໍ່ຢູ່ຈີນ, ການຮ່ວມມືດ້ານວຽກງານການສິດສອນ ແລະອື່ນໆ. ພາຍຫຼັງໄດ້ສຳເລັດການທັດສະນະສຶກສາຢູ່ແຂວງຢຸນນານແລ້ວ, ຄະນະຜູ້ແທນກໍໄດ້ໄປທັດສະນະສຶກສາດ້ານວັດທະນະທຳຢູ່ນະຄອນສາງຊ່າ, ນະຄອນຊາວຊ່ານ, ນະຄອນເຢ້ຢາງ ແຂວງຫູໜານ ແລະ ນະຄອນອູຮ້ານແຂວງຫູເປີຍ, ເພື່ອຮຽນຮູ້ຮີດຄອງປະເພນີແລະວັດທະນະທຳຊົນເຜົ່າຂອງທ້ອງຖິ່ນດັ່ງກ່າວຢ່າງເລິກເຊິ່ງ.
ຮອງຫົວໜ້າອຳນວຍການໂຮງຮຽນຈົງເຕັກ ໄດ້ມາທັດສະນະສຶກສາຢູ່ຈີນເປັນຄັ້ງທຳອິດ, ນາງກ່າວວ່າ: ກິດຈະກຳເທື່ອນີ້ເຮັດໃຫ້ນາງເອງມີຄວາມຮັບຮູ້ຕໍ່ປະເທດບັນພະຊົນຂອງຕົນເລິກເຊິ່ງຍິ່ງຂຶ້ນ. ນາງຍັງກ່າວຕື່ມວ່າ: ເມື່ອກັບຄືນເມືອຮອດປະເທດລາວແລ້ວຈະພະຍາຍາມເຮັດວຽກງານດ້ານການສຶກສາວັດທະນະທຳຈີນໃຫ້ດີກວ່າເກົ່າ, ໃຫ້ລູກຫຼານຂອງຊາວລາວເຊື້ອສາຍຈີນແລະຈີນຕ່າງດ້າວມີໂອກາດໄປຮຽນຕໍ່ຢູ່ຈີນທີ່ເປັນປະເທດບັນພະຊົນນັ້ນ ຫຼາຍກວ່າເກົ່າ, ເພື່ອເປັນການຮັດແໜ້ນໄມຕິຈິດມິດຕະພາບລະຫວ່າງຈີນ-ລາວໃຫ້ດີຂຶ້ນເທື່ອລະກ້າວ.
