ທ່ານນາຍົກລັດຖະມົນຕີ ແລະ ທ່ານລັດຖະມົນຕີການຕ່າງປະເທດ ສປປ ລາວ ໄດ້ສົ່ງໂທລະເລກສະແດງຄວາມເຫັນໃຈມາຍັງທ່ານນາຍົກລັດຖະມົນຕີ ແລະ ທ່ານລັດຖະມົນຕີການຕ່າງປະເທດ ສປ ຈີນ ໃນເຫດການແຜນດິນໄຫວແຂວງການຊູ
ຕອນເຊົ້າວັນທີ 22 ກໍລະກົດນີ້, ຢູ່ນະຄອນຕິ້ງຊີ ແຂວງການຊູ, ທາງພາກຕາເວັນຕົກສຽງເໜືອຂອງຈີນ ໄດ້ເກີດແຜ່ນດິນໄຫວທີ່ມີແຮງສັ່ນສະເທືອນ 6,6 ລິກເຕີ, ເຊິ່ງໄດ້ສ້າງຄວາມເສຍຫາຍໃຫ້ແກ່ຊີວິດແລະຊັບສິນຂອງປະຊາຊົນຢ່າງຫຼວງຫຼາຍ.
ວັນທີ 23 ກໍລະກົດນີ້, ທ່ານທອງສິງ ທຳມະວົງ, ນາຍົກລັດຖະມົນຕີລາວ ໄດ້ສົ່ງໂທລະເລກສະແດງຄວາມເຫັນໃຈມາຍັງທ່ານລີເຄິສຽງ, ນາຍົກລັດຖະມົນຕີຈີນ, ເຊິ່ງໃນໂລທະເລກໄດ້ຂຽນວ່າ:
ໃນນາມຕາງໜ້າລັດຖະບານ ແລະ ປະຊາຊົນລາວບັນດາເຜົ່າ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈມາຍັງລັດຖະບານ ແລະ ປະຊາຊົນຈີນ ໂດຍສະເພາະຕໍ່ຄອບຄົວຂອງຜູ້ທີ່ໄດ້ຮັບຜົນກະທົບຈາກເຫດການແຜ່ນດິນໄຫວ ທີ່ເກີດຂຶ້ນຢູ່ພາກຕາເວັນຕົກສຽງເໜືອຂອງສາທາລະນະລັດປະຊາຊົນຈີນ(ແຂວງການຊູ) ໃນຕອນເຊົ້າຂອງວັນທີ 22 ກໍລະກົດ 2013, ຊຶ່ງໄດ້ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສິນຂອງປະຊາຊົນທີ່ຢູ່ອາໄສໃນເຂດດັ່ງກ່າວຢ່າງຫຼວງຫຼາຍ.
ຂ້າພະເຈົ້າເຊື່ອໝັ້ນວ່າ ພາຍໃຕ້ການຊີ້ນຳ ນຳພາ ແລະ ເອົາໃຈໃສ່ຢ່າງໃກ້ຊິດຂອງບັນດາສະຫາຍການນຳສູນກາງ ກໍຄືທ້ອງຖິ່ນ ຂອງສາທາລະນະລັດປະຊາຊົນຈີນ, ເຫດການໄພພິບັດທາງທຳມະຊາດດັ່ງກ່າວຈະໄດ້ຮັບການແກ້ໄຂ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນກັບເຂົ້າສູ່ສະພາບປົກກະຕິໂດຍໄວ.
ມື້ດຽວກັນ, ທ່ານທອງລຸນ ສີສຸລິດ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດລາວ ກໍໄດ້ສົ່ງໂທລະເລກສະແດງຄວາມເຫັນໃຈມາຍັງທ່ານຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນ, ເຊິ່ງໃນໂລທະເລກໄດ້ຂຽນວ່າ:
ຂ້າພະເຈົ້າໄດ້ຮັບຊາບຂ່າວວ່າ, ໃນຕອນເຊົ້າຂອງວັນທີ 22 ກໍລະກົດ 2013 ໄດ້ເກີດເຫດການແຜ່ນດິນໄຫວຢູ່ພາກຕາເວັນຕົກສຽງເໜືອຂອງສາທາລະນະລັດປະຊາຊົນຈີນ(ແຂວງການຊູ) ອັນໄດ້ສ້າງຄວາມເສຍຫາຍໃຫ້ແກ່ຊີວິດແລະຊັບສິນຂອງປະຊາຊົນທີ່ອາໄສຢູ່ເຂດດັ່ງກ່າວຢ່າງຫຼວງຫຼາຍ.
ໃນທ່າມກາງຄວາມໂສກເສົ້າເສຍໃຈນີ້, ຂ້າພະເຈົ້າໃນນາມສ່ວນຕົວແລະຕາງໜ້າພະນັກງານກະຊວງການຕ່າງປະເທດແຫ່ງ ສປປ ລາວ, ຂໍສະແດງຄວາມເຫັນໃຈຢ່າງສຸດຊຶ້ງມາຍັງລັດຖະບານແລະປະຊາຊົນຈີນ, ໂດຍສະເພາະຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍ, ແລະຂໍແບ່ງເບົາຄວາມທຸກໂສກດັ່ງກ່າວ ນຳບັນດາຄອບຄົວຜູ້ທີ່ໄດ້ຮັບເຄາະຮ້າຍຈາກເຫດການໄພພິບັດທາງທຳມະຊາດໃນຄັ້ງນີ້ດ້ວຍ.
ຂ້າພະເຈົ້າເຊື່ອໝັ້ນວ່າ, ພາຍໃຕ້ການຊີ້ນຳ ນຳພາ ແລະ ເອົາໃຈໃສ່ຢ່າງໃກ້ຊິດຂອງບັນດາສະຫາຍການນຳຂອງ ສປ ຈີນ, ເຫດການດັ່ງກ່າວຈະໄດ້ຮັບການແກ້ໄຂໃກ້ກັບເຂົ້າສູ່ສະພາບປົກກະຕິໂດຍໄວ.
