ອາເມລິກາແລະຫວຽດນາມປະກາດສ້າງສາຍພົວພັນຄູ່ຮ່ວມມືຮອບດ້ານ
ຕາມຂ່າວCRI: ວັນທີ25ກໍລະກົດນີ້, ທ່ານບາຣັກ ໂອບາມາ, ປະທານາທິບໍດີອາເມລິກາແລະທ່ານເຈືອງ ເຕີນ ຊາງ, ປະທານປະເທດຫວຽດນາມໄດ້ປະກາດຢູ່ນະຄອນຫຼວງວໍຊິງຕັນວ່າຈະສ້າງ"ສາຍພົວພັນຄູ່ຮ່ວມມືຮອບດ້ານ"ລະຫວ່າງສອງປະເທດ, ເພື່ອຊຸກຍູ້ການຮ່ວມມືໃນຂົງເຂດເສດຖະກິດການຄ້າ, ວິທະຍາສາດເຕັກໂນໂລຊີ, ວຽກງານປ້ອງກັນ, ຄວາມປອດໄພແລະຂົງເຂດອື່ນໆລະຫວ່າງສອງປະເທດ.
ຜູ້ນຳສອງທ່ານໄດ້ອອກຖະແຫຼງການຮ່ວມຫຼັງຈາກການພົບປະທີ່ມີຂຶ້ນຢູ່ທຳນຽບຂາວອາເມລິກາໃນມື້ດຽວກັນ, ໂດຍກ່າວເນັ້ນວ່າສອງຝ່າຍຈະພະຍາຍາມສ້າງ"ໄລຍະໃໝ່"ດ້ານສາຍພົວພັນລະ ຫວ່າງສອງປະເທດບົນພື້ນຖານທີ່ເຄົາລົບນັບຖືເຊິ່ງກັນແລະກັນແລະສະແຫວງຫາຜົນປະໂຫຍດຮ່ວມກັນ, ສ່ວນການພົວພັນຄູ່ຮ່ວມມືຮອບດ້ານຈະກຳນົດກົນໄກການຮ່ວມມືລະຫວ່າງສອງປະເທດໃນຂົງເຂດຕ່າງໆ, ເຊັ່ນ: ການເມືອງ, ການຕ່າງປະເທດ, ການຄ້າ, ເສດຖະກິດ, ວິທະຍາສາດ, ເຕັກໂນໂລຊີ, ການສຶກສາ, ການເຝິກອົບຮົມ, ສິ່ງແວດລ້ອມ, ສາທາລະນະສຸກ, ບັນຫາທີ່ຕົກຄ້າງມາແຕ່ສະໄໝສົງຄາມ, ວຽກງານປ້ອງກັນ, ຄວາມປອດໄພ, ສິດທິມະນຸດ, ວັດທະນະທຳ, ກິລາ, ການທ່ອງທ່ຽວແລະອື່ນໆ.
ທ່ານເຈືອງ ເຕີນ ຊາງແມ່ນປະມຸກລັດຫວຽດນາມຜູ້ທີສອງທີ່ເດີນທາງໄປຢ້ຽມຢາມອາເມລິກາຫຼັງຈາກການການພົວພັນລະຫວ່າງສອງປະເທດໄດ້ຄືນສູ່ສະພາບປົກກະຕິເມື່ອປີ1995ເປັນຕົ້ນມາ. ທ່ານບາຣັກ ໂອບາມາກ່າວຕໍ່ສື່ມວນຊົນຫຼັງຈາກການພົບປະວ່າ, ການຢ້ຽມຢາມຄັ້ງນີ້ເປັນຂີດໝາຍສະແດງໃຫ້ເຫັນວ່າການພົວພັນລະຫວ່າງສອງປະເທດ"ໄດ້ຮັບການພັດທະນາແລະມີການປັບ
ປຸງຢ່າງບໍ່ຢຸດຢັ້ງ", ໝາຍຄວາມວ່າການພົວພັນລະຫວ່າງອາເມລິກາ-ຫວຽດນາມໄດ້ພັດທະນາໃຫ້ສຸກງອມຂຶ້ນແລະເຂົ້າສູ່ໄລຍະໃໝ່.
ທ່ານບາຣັກ ໂອບາມາໄດ້ໃຫ້ຄວາມກົດດັນຕໍ່ຫວຽດນາມໃນບັນຫາສິດທິມະນຸດ, ທ່ານເຈືອງ ເຕີນ ຊາງກ່າວວ່າ ລະຫວ່າງສອງປະເທດຍັງມີຢູ່ຄວາມເຫັນທີ່ແຕກຕ່າງກັນ.
ທ່ານເຈຶອງ ເຕີນ ຊາງແມ່ນຜູ້ນຳຂອງປະເທດອາຊຽນຜູ້ທີ4ທີ່ທ່ານບາຣັກ ໂອບາມາໄດ້ພົບປະຢູ່ທຳນຽບຂາວອາເມລິກາໃນປີນີ້, ເຊິ່ງກ່ອນໜ້ານີ້, ທ່ານບາຣັກ ໂອບາມາໄດ້ພົບປະກັບຜູ້ນຳຂອງບຣຸໄນ, ສິງກະໂປແລະມຽນມາແລ້ວ. ໃນຍຸດທະສາດການສ້າງຄວາມສົມດຸນຄືນໃໝ່ຢູ່ເຂດອາຊີປາຊີຟິກຂອງລັດຖະບານບາຣັກ ໂອບາມາ, ການປັບປຸງແລະຍົກສູງການພົວພັນທີ່ເປັນພັນທະມິດກັນໃນພາກພື້ນນີ້ຂອງອາເມລິກາຖືກຖືເປັນເສົາຄ້ຳໜຶ່ງ.
