ທ່ານກິມ ຈົງ ອຸນຕ້ອນຮັບການເຂົ້າຢ້ຽມຂໍ່ານັບຂອງທ່ານຫຼີ ຢວນ ຊາວ, ຮອງປະທານປະເທດຈີນ
ຕາມຂ່າວCRI: ຕອນແລງວັນທີ29ກໍລະກົດນີ້, ທ່ານ ກິມ ຈົງ ອຸນ, ຜູ້ນຳສູງສຸດສ.ປ.ປເກົາຫຼີໄດ້ຕ້ອນຮັບການເຂົ້າຢ້ຽມຂຳນັບຂອງທ່ານ ຫຼີ ຢວນ ຊາວ, ຮອງປະທານປະເທດຈີນທີ່ໄປຢ້ຽມຢາມສ.ປ.ປເກົາຫຼີແລະເຂົ້າຮ່ວມກິດຈະກຳລະລຶກການຢຸດຕິສົງຄາມເກົາຫຼີຄົບຮອບ60ປີ. ກ່ອນອື່ນທ່ານຫຼີ ຢວນ ຊາວ ໄດ້ຝາກຄວາມເວົ້າຂອງທ່ານປະທານປະເທດສີ ຈິ້ງ ຜິງໄປຍັງທ່ານກິມ ຈົງ ອຸນ.
ທ່ານຫຼີ ຢວນ ຊາວກ່າວວ່າ, ພວກເຮົາລະລຶກການຢຸດຕິສົງຄາມເກົາຫຼີຄົບຮອບ60ປີ, ແມ່ນເພື່ອໄວ້ອາໄລຢ່າງເລິກເຊິ່ງເຖິງດວງວິນຍານຂອງລູກຮັກຫຼານປະເສີດຂອງຈີນແລະສ.ປ.ປເກົາຫຼີທີ່ໄດ້ເສຍສະຫຼະຢ່າງກ້າຫານເພື່ອປ້ອງກັນປະເທດຊາດ. ຈີນຍິນດີຮ່ວມກັນກັບສ.ປ.ປເກົາຫຼີ, ຊຸກຍູ້ການພົວພັນລະຫວ່າງສອງປະເທດໃຫ້ພັດທະນາໄປໜ້າຢ່າງໝັ້ນທ່ຽງແລະຕໍ່ເນື່ອງ. ພ້ອມກັນນັ້ນ, ຈີນຍິນດີຮ່ວມກັນກັບຝ່າຍຕ່າງໆທີ່ກ່ຽວຂ້ອງ, ຊຸກຍູ້ການຟື້ນຟູການເຈລະຈາ6ຝ່າຍຄືນໃໝ່, ພະຍາຍາມຊຸກຍູ້ຂະບວນການປອດນິວເຄຼຍຂອງແຫຼມເກົາຫຼີ, ບັນລຸສັນຕິພາບຢູ່ແຫຼມເກົາຫຼີແລະມີຄວາມໝັ້ນຄົງຍາວນານຢູ່ອາຊີຕາເວັນອອກ.
ທ່ານກິມ ຈົງ ອຸນກ່າວວ່າ, ພັກແລະປະຊາຊົນສ.ປ.ປເກົາຫຼີຈະຈື່ຈຳຜູ້ເສຍສະຫຼະຂອງຈີນແລະສ.ປ.ປເກົາຫຼີໃນສົງຄາມໂດຍບໍ່ມີວັນຈະຫຼົງລືມ. ສ.ປ.ປເກົາຫຼີຕີລາຄາສູງຕໍ່ຜົນງານອັນໃຫຍ່ຫຼວງທີ່ຈີນຍາດມາໄດ້ໃນພາລະກິດສ້າງສັງຄົມນິຍົມ, ທະນຸຖະໜອມມິດຕະພາບອັນເປັນມູນເຊື້ອກັບຈີນ, ຍິນດີຊຸກຍູ້ໃຫ້ການພົວພັນລະຫວ່າງສອງປະເທດສືບຕໍ່ພັດທະນາກ້າວໄປໜ້າ. ພ້ອມກັນນັ້ນ, ສ.ປ.ປເກົາຫຼີກໍສະໜັບສະໜູນຄວາມພະຍາຍາມຂອງຈີນໃນການຟື້ນຟູການເຈລະຈາ6ຝ່າຍຄືນໃໝ່, ຍິນດີພະຍາຍາມຮ່ວມກັນກັບບັນດາຝ່າຍທີ່ກ່ຽວຂ້ອງເພື່ອປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ.
