ທໍ່ສົ່ງແກັສຈີນ-ມຽນມາເລີ່ມສົ່ງແກັສສູ່ຈີນຢ່າງເປັນທາງການ
ວັນທີ 28 ກໍລະກົດນີ້, ທໍ່ສົ່ງແກັສທຳມະຊາດຈີນ-ມຽນມາເຊິ່ງຮ່ວມລົງທຶນໂດຍ 4 ປະເທດ ຄື: ຈີນ, ມຽນມາ, ສ.ເກົາຫຼີ ແລະ ອິນເດຍໄດ້ເລີ່ມສົ່ງແກັສສູ່ຈີນແລ້ວ, ນີ້ເປັນຂີດໝາຍສະແດງໃຫ້ເຫັນວ່າ, ໂຄງການທໍ່ສົ່ງນ້ຳມັນເຊື້ອໄຟແລະແກັສຈີນ-ມຽນມາໄດ້ຮັບຜົນສຳເລັດອັນສຳຄັນພາຍຫຼັງໄດ້ກໍ່ສ້າງມາເປັນເວລາ 3 ປີ.
ມື້ດຽວກັນ, ພິທີສົ່ງແກັສຂອງທໍ່ສົ່ງແກັສຈີນ-ມຽນມາໄດ້ຈັດຂຶ້ນຢູ່ເມືອງມານດາເລມຽນມາ, ຜູ້ຕາງໜ້າລັດຖະບານ 4 ປະເທດດັ່ງກ່າວ, ເຊັ່ນ: ທ່ານຢຽນຕຸນ, ຮອງປະທານາທິບໍດີມຽນມາ, ທ່ານຢາງໂຮ້ວລານ, ເອກອັກຄະລັດຖະທູດຈີນປະຈຳມຽນມາ ແລະ ທ່ານວາງຕົ່ງຈິ້ນ, ຮອງຜູ້ອຳນວຍການໃຫຍ່ກຸ່ມນ້ຳມັນເຊື້ອໄຟຈີນ ເປັນຕົ້ນ ໄດ້ຮ່ວມກົດປຸ່ມເປີດທໍ່ສົ່ງແກັສຮ່ວມກັນ.
ໂຄງການທໍ່ສົ່ງນ້ຳມັນເຊື້ອໄຟແລະແກັສຈີນ-ມຽນມາຕອນຢູ່ໃນແດນມຽນມາແມ່ນວາງທໍ່ສົ່ງນ້ຳມັນເຊື້ອໄຟແລະທໍ່ສົ່ງແກັສໄປຄຽງກັນ. ໃນນັ້ນ, ຈຸດເລີ່ມຂອງທໍ່ສົ່ງແກັສແມ່ນຢູ່ເມືອງຄະຢໍຄະປະຢູ, ມຸ່ງໜ້າໄປສູ່ລັດຍະໄຂ່, ແຂວງມາກະເວ ແລະ ແຂວງມານດາເລ, ຜ່ານເມືອງໜານຂານເຂົ້າສູ່ເມືອງຢຸ້ຍລີ້ແຂວງຢຸນນານຈີນ. ທໍ່ສົ່ງແກັສຕອນໃນແດນມຽນມາຍາວ 793 ກິໂລແມັດ, ຄວາມສາມາດການສົ່ງແກັສຕາມການອອກແບບແມ່ນ 12 ຕື້ແມັດກ້ອນຕໍ່ປີ, ໃນນັ້ນມີ 2 ຕື້ແມັດກ້ອນຕໍ່ປີແມ່ນສະໜອງໃຫ້ມຽນມາ, ເພື່ອຊຸກຍູ້ການພັດທະນາເສດຖະກິດຂອງມຽນມາ.
