ຟິລິບປິນແລະອາເມລິກາຜູກເປັນກຸ່ມເປັນການຂັດຂວາງສະຖຽນລະພາບຂອງພາກພື້ນ
ຫວ່າງມໍ່ໆນີ້, ຟິລິບປິນໄດ້ຊື້ກຳປັ່ນຮົບຈາກອາເມລິກາ ແລະ ຍີ່ປຸ່ນ, ແລະຈະຍ້າຍກອງທັບເຮືອແລະກອງທັບອາກາດໄປປະຈຳຢູ່ອ່າວຊູບິກອີກ, ອະນຸຍາດໃຫ້ກຳປັ່ນແລະທະຫານອາເມລິກາຫຼາຍກວ່າເກົ່າເຂົ້າປະຈຳຖານທັບຂອງຕົນ, ພິຈາລະນາດຳເນີນການຊ້ອມຮົບຮ່ວມໃຫ້ມີຂຶ້ນຖີ່ກວ່າເກົ່າ ແລະອື່ນໆ. ນັກວິເຄາະເຫັນວ່າ, ພາຍໃຕ້ການຊ່ວຍເຫຼືອຈາກປະເທດທີ່ວ່າ "ຄູ່ຍຸດທະສາດ" ແລະ "ພັນທະມິດຍຸດທະສາດ" ຄື ຍີ່ປຸ່ນ ແລະ ອາເມລິກາ, ຟິລິບປິນພວມຂຸ້ນຂ້ຽວຂະຫຍາຍກຳລັງທະຫານຂອງຕົນ, ເພື່ອສາມາດນາບຂູ່ຈີນໃນບັນຫາທະເລຈີນໃຕ້. ຜູ້ຊ່ຽວຊານຂອງບາງປະເທດອາຊີຕາເວັນອອກສຽງໃຕ້ ເຫັນວ່າ, ການກະທຳຂອງຟິລິບປິນອາດຈະພາໃຫ້ຄວາມຂັດແຍ່ງກັນດຸເດືອດຂຶ້ນຕື່ມອີກ, ບໍ່ມີຜົນດີຕໍ່ການແກ້ໄຂບັນຫາທະເລຈີນໃຕ້ ແລະ ສັນຕິພາບແລະສະຖຽນລະພາບຂອງພາກພື້ນ.
ທ່ານເມິ້ງສຽງຊິ່ງ, ຮອງຫົວໜ້າສະຖາບັນຄົ້ນຄວ້າຍຸດທະສາດ ມະຫາວິທະຍາໄລປ້ອງກັນປະເທດຈີນ ກ່າວວ່າ: ໃນສອງປີຜ່ານມານີ້, ອາເມລິກາກັບຄືນສູ່ອ່າວຊູບິກອີກ, ແລະເພີ່ມທະວີການຮ່ວມມືດ້ານການທະຫານກັບຟິລິບປິນຢ່າງບໍ່ຢຸດຢັ້ງ, ນີ້ສອດຄ່ອງກັບຜົນປະໂຫຍດ ຂອງອາເມລິກາ.
ທ່ານທິຕິນັນ ພົງສຸດີຣັກ, ຫົວໜ້າພະແນກການເມືອງ ມະຫາວິທະຍາໄລຈຸລາລົງກອນໄທ ກ່າວວ່າ: ການກະທຳຂອງຟິລິບປິນໃນໄລຍະຜ່ານມານີ້ກໍເປັນສິ່ງທ້າທາຍຕໍ່ຄວາມສາມັກຄີຂອງອາຊຽນ, ເມື່ອເບິ່ງໂດຍລວມແລ້ວ, ຍ້ອນຜົນປະໂຫຍດມີຄວາມຂັດແຍ່ງກັນ, ອາຊຽນຈະຍິ່ງແຕກແຍກກັນໃນບັນຫາທະເລຈີນໃຕ້.
ທ່ານທິຕິນັນ ພົງສຸດີຣັກ ເຫັນວ່າ, ການເຈລະຈາລະຫວ່າງຈີນ-ອາຊຽນໂດຍປິ່ນອ້ອມກົດບັດແຫ່ງການປະພຶດໃນທະເລຈີນໃຕ້ ຫຼື COC ໄດ້ຮັບຄວາມຄືບໜ້າຢ່າງຕັ້ງໜ້າ. ເມື່ອເບິ່ງຈາກອາຊຽນແລ້ວ, ໄທ, ອິນໂດເນເຊຍ ແລະ ປະເທດອື່ນ ຄວນເຕືອນໃຫ້ຟິລິບປິນໃຊ້ທ່າທີ ລະມັດລະວັງກວ່າເກົ່າໃນບັນຫາທະເລຈີນໃຕ້, ແກ້ໄຂບັນຫາຄວາມຂັດແຍ່ງດ້ວຍຮູບແບບການເຈລະຈາ; ສ່ວນອາເມລິກາຄວນຊ່ວຍເຫຼືອປະເທດທີ່ກ່ຽວຂ້ອງໃຊ້ຮູບແບບການສົນທະນາເພື່ອຊຸກຍູ້ການເຈລະຈາກົດບັດແຫ່ງການປະພຶດໃນທະເລຈີນໃຕ້ ຫຼື COC.
ທ່ານລີມິງຈຽງ, ຜູ້ຮັບຜິດຊອບໂຄງການອາຊີສະຖາບັນຄົ້ນຄວ້າສາກົນຣາຈາຣັດນາມ ມະຫາວິທະຍາໄລວິທະຍາສາດເຕັກນິກນານຢາງ ຫຼື NTU ສິງກະໂປ ກ່າວວ່າ: ປັດຈຸບັນ, ຝ່າຍຕ່າງໆລ້ວນແຕ່ຕ້ອງຫຼີກເວັ້ນບໍ່ໃຫ້ຄວາມຂັດແຍ່ງດຸເດືອດຂຶ້ນ, ຄວນບັນລຸຄວາມເຫັນທີ່ເປັນເອກະພາບກັນເປັນກ້າວໆ, ເພື່ອຊຸກຍູ້ສັນຕິພາບແລະສະຖຽນລະພາບຂອງທະເລຈີນໃຕ້.
