ໄທເກີດອຸບັດເຫດນ້ຳມັນດິບຮົ່ວໄຫຼແຜ່ກະຈາຍໄປຮອດແຫຼ່ງທ່ອງທ່ຽວ
ວັນທີ 27 ກໍລະກົດນີ້ຕາມເວລາທ້ອງຖິ່ນ, ຢູ່ເຂດທະເລພາກຕາເວັນອອກຂອງໄທໄດ້ເກີດອຸບັດເຫດນ້ຳມັນດິບຮົ່ວໄຫຼ, ມີນ້ຳມັນດິບປະມານ 5 ໝື່ນລິດຮົ່ວໄຫຼລົງທະເລ, ເຮັດໃຫ້ຫາດຊາຍຝັ່ງທະເລຍາວ 20 ກິໂລແມັດທີ່ໃກ້ກັບຈັງຫວັດຣະຍອງຖືກເປິເປື້ອນ. ຂ່າວແຈ້ງວ່າ, ມາຮອດວັນທີ 29 ກໍລະກົດນີ້, ນ້ຳມັນດິບທີ່ຮົ່ວໄຫຼລົງທະເລນັ້ນ ໄດ້ແຜ່ກະຈາຍໄປຮອດເກາະສະເໝັດ ເຊິ່ງແມ່ນແຫຼ່ງທ່ອງທ່ຽວທີ່ມີຊື່ສຽງທີ່ອ່າວໄທ.
ຕາມສະພາບຫຼ້າສຸດທີ່ນັກຂ່າວໄດ້ຮັບຊາບ, ນ້ຳມັນດິບທີ່ຮົ່ວໄຫຼລົງທະເລຍັງແຜ່ກະຈາຍກວ້າງອອກຕື່ມອີກ, ຢູ່ບໍລິເວນໃກ້ຝັ່ງທະເລເກາະສະເໝັດ ຈັງຫວັດຣະຍອງ, ເຊິ່ງແມ່ນແຫຼ່ງທ່ອງທ່ຽວທີ່ມີຊື່ສຽງທີ່ພາກຕາເວັນອອກອ່າວໄທ ໄດ້ປະກົດເຫັນຄາບນ້ຳມັນໃນບໍລິເວນກວ້າງ, ປັດຈຸບັນ, ອົງການທ່ອງທ່ຽວທ້ອງຖິ່ນ ໄດ້ປິດຫາດຊາຍສ່ວນໜຶ່ງແລ້ວ, ເພື່ອແກ້ໄຂບັນຫາຄາບນ້ຳມັນດັ່ງກ່າວ.
ວັນທີ 29 ກໍລະກົດນີ້, ທ່ານ ອານົນ ສິຣິແສງທັກສິນ, ຜູ້ບໍລິຫານສູງສຸດ ຫຼື CEO ຂອງບໍລິສັດອຸດສາຫະກຳເຄມີທົ່ວໂລກ ທີ່ສັງກັດບໍລິສັດນ້ຳມັນເຊື້ອໄຟແຫ່ງຊາດໄທ ກ່າວວ່າ: ໃນຖານະເປັນຜູ້ຮັບຜິດຊອບສູງສຸດຂອງບໍລິສັດ, ທ່ານຮູ້ສຶກຄືວ່າເປັນການກະທຳຕ້ອງໂທດໃນເຫດການນ້ຳມັນດິບຮົ່ວໄຫຼຄັ້ງນີ້, ແລະກ່າວວ່າຈະໃຊ້ແທນຄວາມເສຍຫາຍທັງໝົດ. ທ່ານກ່າວຕື່ມວ່າ: ທາງບໍລິສັດຈະສຳຫຼວດສາເຫດທີ່ພາໃຫ້ເກີດເຫດການເທື່ອນີ້ຢ່າງເຖິງຖອງ.
