ສະຖານທູດຈີນປະຈຳອິນໂດເນເຊຍຈັດງານລ້ຽງຕ້ອນຮັບນັກຂ່າວໃນວັນອອກກຳມຸສລິມ
ຕອນຄ່ຳວັນທີ 30 ກໍລະກົດນີ້, ສະຖານເອກອັກຄະລັດຖະທູດຈີນປະຈຳອິນໂດເນເຊຍ ໄດ້ຈັດງານລ້ຽງຕ້ອນຮັບນັກຂ່າວເນື່ອງໃນໂອກາດວັນອອກກຳມຸສລິມວຽນມາເຖິງ, ທ່ານ ຫຼິວຈ້ຽນຊາວ, ເອກອັກຄະລັດຖະທູດຈີນປະຈຳອິນໂດເນເຊຍ ໄດ້ແລກປ່ຽນຄວາມຄິດຄວາມເຫັນກັບນັກຂ່າວສື່ມວນຊົນແຫ່ງຕ່າງໆທີ່ສຳຄັນຂອງອິນໂດເນເຊຍຢ່າງສະໜິດສະໜົມ ແລະ ຮັບປະທານອາຫານຮ່ວມກັນ.
ໃນໂອກາດນີ້, ທ່ານເອກອັກຄະລັດຖະທູດ ຫຼິວຈ້ຽນຊາວ ກ່າວວ່າ: ໃນ 6 ເດືອນຕົ້ນປີນີ້, ການພົວພັນລະຫວ່າງຈີນກັບອິນໂດເນເຊຍ ໄດ້ມີການຂະຫຍາຍຕົວຕື່ມອີກ, ທ່ານຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນຄົນໃໝ່ ໄດ້ຖືອິນໂດເນເຊຍເປັນໜຶ່ງໃນປະເທດທີ່ອອກຢ້ຽມຢາມຄັ້ງທຳອິດຂອງທ່ານ, ແລະໄດ້ພົບປະກັບທ່ານມາຕີ ນາຕາເລກາວາ, ລັດຖະມົນຕີວ່າການກະຊວງການຕ່າງປະເທດອິນໂດເນເຊຍຫຼາຍເທື່ອໃນກໍລະນີສາກົນ, ສອງຝ່າຍເນັ້ນໜັກຊຸກຍູ້ກົນໄກການສົນທະນາແລະການຮ່ວມມືໃນຂົງເຂດຕ່າງໆ, ເປັນຕົ້ນແມ່ນ ການເມືອງ, ການຕ່າງປະເທດ, ວຽກງານທາງທະເລ ແລະ ວຽກງານການປ້ອງກັນ, ເພີ່ມທະວີກົນໄກການສົນທະນາ, ເພີ່ມຄວາມໄວ້ເນື້ອເຊື່ອໃຈກັນລະຫວ່າງສອງຝ່າຍ.
ທ່ານຫຼິວຈ້ຽນຊາວ ກ່າວຕື່ມວ່າ: ການຮ່ວມມືລະຫວ່າງຈີນ-ອິນໂດເນເຊຍ ແມ່ນດຳເນີນໄປຢ່າງຮອບດ້ານ, ໄດ້ລວມທັງຂົງເຂດຕ່າງໆໃນທາງບົກ, ທາງທະເລ ແລະ ທາງອາກາດ. ໃນດ້ານການແລກປ່ຽນສັງຄົມແລະວັດທະນະທຳ, ທ່ານຫຼິວຈ້ຽນຊາວ ໃຫ້ຮູ້ວ່າ, ໃນ 6 ເດືອນທ້າຍປີນີ້, ຈະມີຊາວໜຸ່ມອິນໂດເນເຊຍຈຳນວນ 100 ຄົນໄປຢ້ຽມຢາມຈີນຕາມຄຳເຊີນ, ນອກນີ້, ອິນໂດເນເຊຍຍັງຈະຈັດກິດຈະກຳໂຄສະນາການທ່ອງທ່ຽວຂະໜາດໃຫຍ່ຢູ່ຈີນນຳອີກ.
