ຈີນຮຽກຮ້ອງໃຫ້ຍີ່ປຸ່ນເຄົາລົບຄຳໝັ້ນສັນຍາຂອງຕົນໃນບັນຫາປະຫວັດສາດ
ວັນທີ 31 ກໍລະກົດຜ່ານມານີ້, ທ່ານຫົງເຫຼີຍ, ໂຄສົກກະຊວງການຕ່າງປະເທດຈີນ ໄດ້ໃຫ້ຄຳຕອບຂອງນັກຂ່າວກ່ຽວກັບຖ້ອຍຄວາມຂອງທ່ານຕາໂຣ ອາໂຊ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການເງິນຍີ່ປຸ່ນ ໂດຍກ່າວວ່າ: ຈີນຮຽກຮ້ອງໃຫ້ຍີ່ປຸ່ນ ຕັ້ງໜ້າສຳນຶກຄືນການກະທຳຄວາມຜິດຂອງຕົນໃນປະຫວັດສາດ, ເຄົາລົບຄຳໝັ້ນສັນຍາຂອງຕົນໃນບັນຫາປະຫວັດສາດ.
ນັກຂ່າວຖາມວ່າ: ວັນທີ 29 ກໍລະກົດຜ່ານມານີ້, ທ່ານຕາໂຣ ອາໂຊ, ຮອງນາຍົກລັດຖະມົນຕີຍີ່ປຸ່ນໄດ້ກ່າວຄຳປາໄສວ່າ: ຍີ່ປຸ່ນຄວນຮ່ຳ ຮຽນນຳການກະທຳຂອງນາຊີເຢຍລະມັນກ່ອນສົງຄາມໂລກຄັ້ງທີ 2, ຊຸກຍູ້ໃຫ້ບັນລຸການດັດແກ້ລັດຖະທຳມະນູນໃນສະພາບແວດລ້ອມທີ່ມິດງຽບ. ທ່ານຕາໂຣ ອາໂຊ ຍັງກ່າວວ່າ: ບໍ່ສະແດງຄວາມເຄົາລົບນັບຖືແລະຄວາມຂອບໃຈຕໍ່ຜູ້ເສຍສະຫຼະເພື່ອຊາດນັ້ນແມ່ນບໍ່ປົກກະຕິ, ຄວນໄປເຄົາລົບຫໍໄຫວ້ຢາຊູຄູນີແບບມິດງຽບ. ຝ່າຍຈີນມີການວິຈານແນວໃດຕໍ່ຖ້ອຍຄວາມນີ້?
ທ່ານຫົງເຫຼີຍ ກ່າວວ່າ: ຜູ້ນຳສຳຄັນຂອງຍີ່ປຸ່ນກ່າວຄຳປາໄສຢ່າງບັງອາດວ່າຄວນຮ່ຳຮຽນນຳການກະທຳຂອງນາຊີເພື່ອຊຸກຍູ້ຂະບວນການດັດແກ້ລັດຖະທຳມະນູນ, ນີ້ເຮັດໃຫ້ປະເທດໃກ້ຄຽງໃນອາຊີ ແລະ ປະຊາຄົມໂລກໃຫ້ຄວາມສົນໃຈ ແລະ ມີຄວາມລະມັດລະວັງຕໍ່ທິດທາງຂະຫຍາຍຕົວຂອງຍີ່ປຸ່ນ. ບັນຫາຫໍໄຫວຢາຊູຄູນີ ໄດ້ກ່ຽວພັນເຖິງຍີ່ປຸ່ນຈະສາມາດປະເຊີນກັບປະຫວັດຮັກຮານຢ່າງຖືກຕ້ອງຫຼືບໍ່, ເຄົາລົບ ຈິດໃຈຂອງປະຊາຊົນຂອງປະເທດທີ່ປະສົບຄວາມເສຍຫາຍໃນອາຊີ ຫຼືບໍ່. ພວກຂ້າພະເຈົ້າຮຽກຮ້ອງໃຫ້ຍີ່ປຸ່ນຕັ້ງໜ້າສຳນຶກຄືນການກະທຳ ຄວາມຜິດຂອງຕົນໃນປະຫວັດສາດ, ເຄົາລົບຄຳໝັ້ນສັນຍາຂອງຕົນໃນບັນຫາປະຫວັດສາດ, ສ້າງຄວາມເຊື່ອໝັ້ນໃຫ້ແກ່ປະເທດໃກ້ຄຽງໃນອາຊີ ແລະ ປະຊາຄົມໂລກດ້ວຍການກະທຳຕົວຈິງ.
ໂດຍແນໃສ່ຖ້ອຍຄວາມຂອງທ່ານຕາໂຣ ອາໂຊ, ວັນທີ 31 ກໍລະກົດຜ່ານມານີ້,ທ່ານ ມາຕາອີຊີ ເຊອີຈີ, ເລຂາທິການໃຫຍ່ພັກສັງຄົມປະຊາທິປະໄຕ ເຊິ່ງແມ່ນພັກບໍ່ກຳອຳນາດຂອງຍີ່ປຸ່ນ ໄດ້ໃຫ້ສຳພາດ ໂດຍຮຽກຮ້ອງໃຫ້ທ່ານຕາໂຣ ອາໂຊ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການເງິນຍີ່ປຸ່ນ ຈົ່ງຖອນຄືນຄຳເວົ້າຂອງຕົນທີ່ເວົ້າຍ້ອມການກະທຳດັດແກ້ລັດຖະທຳມະນູນຂອງນາຊີເຢຍລະມັນ ແລະ ລາອອກຈາກຕຳແໜ່ງ.
ວັນທີ 30 ກໍລະກົດແລ້ວນີ້, ທ່ານໂຈເທຢົງ, ໂຄສົກກະຊວງການຕ່າງປະເທດ ສ.ເກົາຫຼີ ຊີ້ອອກວ່າ: ຖ້ອຍຄວາມຂອງທ່ານຕາໂຣ ອາໂຊ ຈະເປັນການທຳຮ້າຍຈິດໃຈຂອງຄົນຈຳນວນຫຼວງຫຼາຍຢ່າງຈະແຈ້ງ, ຜູ້ນຳຍີ່ປຸ່ນຄວນພິຈາລະນາເຖິງຈິດໃຈຂອງປະຊາຊົນປະເທດອ້ອມຂ້າງທີ່ຖືກຍີ່ປຸ່ນຮຸກຮານໃນປະຫວັດສາດ, ຄຳເວົ້າແລະການປະພຶດຕ້ອງມີຄວາມລະມັດລະວັງ.
