ນ້ຳມັນດິບຮົ່ວໄຫຼຢູ່ໄທສືບຕໍ່ແຜ່ກະຈາຍ ຈະຂໍຊ່ວຍເຫຼືອນຳປະເທດໃກ້ຄຽງ
ໜັງສືພິມຫຼຽນເຫີຈາວປ້າວ ຂອງສິງກະໂປລາຍງານວ່າ: ຫວ່າງມໍ່ໆນີ້, ລັດຖະບານໄທກ່າວວ່າ, ໃນອຸບັດຕິເຫດນ້ຳມັນດິບຮົ່ວໄຫຼທີ່ເກີດຂຶ້ນຢູ່ອ່າວໄທນັ້ນ, ປັດຈຸບັນ ຄາບນ້ຳມັນໄດ້ແຜ່ກະຈາຍໄປຮອດເກາະດອນນ້ອຍທີ່ຢູ່ບໍລິເວນອ້ອມຂ້າງເກາະສະເໝັດ ເຊິ່ງແມ່ນແຫຼ່ງທ່ອງທ່ຽວທີ່ມີຊື່ສຽງຂອງໄທ. ທ່ານປອດປະສົບ ສຸລັດສະວະດີ, ຮອງນາຍົກລັດຖະມົນຕີໄທເຫັນວ່າ, ເຄື່ອງອຸປະກອນຂອງໄທທີ່ມີຢູ່ໃນປັດຈຸບັນບໍ່ພໍທີ່ສາມາດຮັບມືກັບວິກິດການນ້ຳມັນຮົ່ວໄຫຼໃນຄັ້ງນີ້, ລັດຖະບານຄວນຂໍຊ່ວຍເຫຼືອນຳສິງກະໂປປະເທດໃກ້ຄຽງ ທີ່ມີເຄື່ອງອຸປະກອນທີ່ກ່ຽວຂ້ອງ.
ທ່ານນາງຍິ່ງລັກ ຊິນນະວັດ, ນາຍົກລັດຖະມົນຕີໄທ ກໍ່ກ່າວວ່າ, ນາງເອງໄດ້ອອກຄຳສົ່ງຕໍ່ອົງການທີ່ກ່ຽວຂ້ອງວ່າ, ຖ້າມີຄວາມຈຳເປັນກໍຂໍຊ່ວຍເຫຼືອນຳປະເທດໃກ້ຄຽງທີ່ມີເຄື່ອງອຸປະກອນທີ່ກ່ຽວຂ້ອງ. ບໍລິສັດນ້ຳມັນເຊື້ອໄຟແຫ່ງຊາດໄທຈະເປັນຜູ້ຮັບຜິດຊອບຄ່າໃຊ້ຈ່າຍທັງໝົດໃນການກຳຈັດຄາບນ້ຳມັນໃນອຸບັດຕິເຫດຄັ້ງນີ້.
