ບາງກອກຈະປະຕິບັດກົດລະບຽບຄວາມປອດໄພພາຍໃນປະເທດເພື່ອຮັບມືກັບການຊຸມນຸມຕ້ານລັດຖະບານ
ວັນທີ 31 ກໍລະກົດຜ່ານມານີ້, ລັດຖະບານໄທໄດ້ຕົກລົງວ່າ, ນັບແຕ່ວັນທີ 1 ສິງຫານີ້ເປັນຕົ້ນໄປ, ຈະປະຕິບັດກົດລະບຽບຄວາມປອດໄພພາຍໃນປະເທດເປັນການຊົ່ວຄາວ ຢູ່ສາມເຂດຂອງນະຄອນຫຼວງບາງກອກ ເພື່ອຮັບມືກັບການຊຸມນຸມຕ້ານລັດຖະບານຂະໜາດໃຫຍ່ທີ່ອາດຈະມີຂຶ້ນໃນໄລຍະມໍ່ໆນີ້.
ຕາມແຜນການທີ່ວາງໄວ້, ລັດຖະສະພາໄທຈະປຶກສາຫາລືຮ່າງກົດໝາຍອະໄພໂທດສະບັບໜຶ່ງແຕ່ວັນທີ 7-8 ສິງຫານີ້, ເຊິ່ງມີເນື້ອໃນຕົ້ນຕໍກ່ຽວກັບການອະໄພໂທດຜູ້ຄົນທີ່ໄດ້ຮັບຜົນກະທົບຈາກການຊຸມນຸມທາງການເມືອງ, ເພື່ອຊຸກຍູ້ຄວາມປອງດອງຊາດ ແລະ ກຳຈັດຄວາມຂັດແຍ່ງພາຍໃນປະເທດ. ແຕ່ອົງການຕໍ່ຕ້ານລັດຖະບານເຫັນວ່າ, ຮ່າງກົດໝາຍສະບັບນີ້ມີຜົນດີຕໍ່ທ່ານທັກສິນ ຊິນນະວັດ, ອະດີດນາຍົກລັດຖະມົນຕີໄທທີ່ພັດຖິ່ນຢູ່ຕ່າງປະເທດ ກັບຄືນປະເທດໄທແລະຍົກເລີກໂທດຂອງຕົນເອງ, ສະນັ້ນໄດ້ວາງແຜນຈະຈັດການຊຸມນຸມ ຕ່າງໆແຕ່ວັນທີ 4-8 ສິງຫານີ້, ເພື່ອຕໍ່ຕ້ານລັດຖະສະພາຄົ້ນຄວ້າພິຈາລະນາຮ່າງກົດໝາຍດັ່ງກ່າວ. ພ້ອມກັນນັ້ນ, ກຸ່ມເສື້ອແດງທີ່ສະໜັບສະໜູນລັດຖະບານກໍມີແຜນຈັດການຊຸມນຸມໃນວັນທີ 3 ສິງຫານີ້, ເພື່ອສະໜັບສະໜູນການຮັບຮອງຮ່າງກົດໝາຍອະໄພໂທດສະບັບນີ້.
ພາກສ່ວນປ້ອງກັນຄວາມປອດໄພຂອງໄທເປັນຫ່ວງວ່າ, ຖ້າສອງຝ່າຍເກີດການປະທະກັນ, ຈະມີຜົນກະທົບເຖິງຂະບວນການນິຕິບັນຍັດຂອງລັດຖະສະພາ.
