ຫວຽດນາມແລະຍີ່ປຸ່ນບັນລຸຄວາມຮັບຮູ້ທີ່ເປັນເອກະສັນກັນກ່ຽວກັບການຊຸກຍູ້ການຂະຫຍາຍການພົວພັນຄູ່ຮ່ວມມືຍຸດທະສາດລະຫວ່າງສອງຝ່າຍ
ວັນທີ 1 ສິງຫານີ້, ທ່ານຫງວຽນເຕີນຢຸງ, ນາຍົກລັດຖະມົນຕີຫວຽດນາມໄດ້ໂທລະສັບ ສົນທະນາກັບທ່ານຊິນໂຈ ອາເບະ, ນາຍົກລັດຖະ ມົນຕີຍີ່ປຸ່ນ, ສອງຝ່າຍໄດ້ບັນລຸຄວາມຮັບຮູ້ທີ່ເປັນເອກະສັນກັນກ່ຽວກັບການຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ-ຍີ່ ປຸ່ນໃຫ້ໄດ້ຮັບການຂະຫຍາຍຕົວຢ່າງຮອບດ້ານ.
ຂ່າວສານຫວຽດນາມລາຍງານວ່າ: ຫົວໜ້າລັດຖະບານສອງປະເທດໄດ້ກ່າວເນັ້ນວ່າ ຈະສືບຕໍ່ປະສານສົມທົບກັນຢ່າງແໜ້ນແຟ້ນ, ຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ-ຍີ່ປຸ່ນນັບມື້ນັບຂະຫຍາຍຕົວຢ່າງຮອບດ້ານ, ສ້າງຄວາມຜາສຸກໃຫ້ແກ່ປະຊາຊົນສອງຊາດ, ປະກອບສ່ວນອັນຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຂອງພາກພື້ນອາຊີປາຊີຟິກ ກໍຄືຂອງໂລກ. ສອງຝ່າຍເປັນເອກະສັນກັນເຫັນດີຮັກສາການຢ້ຽມຢາມແລະຕິດຕໍ່ກັນລະຫວ່າງຄະນະຜູ້ແທນຂັ້ນສູງສອງປະເທດ, ປະຕິບັດກົນໄກສົນທະນາໃນຂົງເຂດການຮ່ວມມືທີ່ລະອຽດຢ່າງມີປະສິດທິຜົນ, ທຳຄວາມພະຍາຍາມເພື່ອຈັດກອງປະຊຸມຄະນະກຳມະການການຮ່ວມມືລະຫວ່າງຫວຽດນາມ-ຍີ່ປຸ່ນຢ່າງສຳເລັດຜົນ, ຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະສັນກັນລະຫວ່າງສອງຝ່າຍໃນຂົງເຂດຕ່າງໆ, ເຊັ່ນ: ເສດຖະກິດການຄ້າ, ການລົງທຶນ ແລະ ການຊ່ວຍເຫຼືອທາງການເພື່ອການພັດທະນາ ຫຼື ODA.
