ທ່ານຫວາງອີ້ ກ່າວວ່າ ການແກ້ໄຂຄວາມຂັດແຍ້ງໃນບັນຫາທະເລຈີນໃຕ້ສາມາດດຳເນີນໄປຄຽງກັນໄດ້ໃນສາມດ້ານ
ທ່ານຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນໄດ້ພົບປະທ່ານສຸລະກຽດ ສະຖຽນໄທ, ອະດີດຮອງນາຍົກລັດຖະມົນຕີໄທ, ປະທານສະພາມົນຕີສັນຕິພາບແລະຄວາມປອງດອງອາຊີ ທີ່ນະຄອນຫຼວງບາງກອກໃນວັນທີ 2 ສິງຫານີ້, ສອງຝ່າຍໄດ້ແລກ ປ່ຽນຄວາມຄິດຄວາມເຫັນກ່ຽວກັບການເຮັດແນວໃດຈຶ່ງສາມາດແກ້ໄຂຄວາມຂັດແຍ່ງລະຫວ່າງປະເທດທີ່ກ່ຽວຂ້ອງໃນບັນຫາທະເລຈີນໃຕ້ໄດ້ຢ່າງເໝາະສົມ.
ທ່ານຫວາງອີ້ ກ່າວວ່າ: ການແກ້ໄຂຄວາມຂັດແຍ່ງກ່ຽວກັບເກາະດອນໜານຊ່າທີ່ກ່ຽວຂ້ອງ ສາມາດດຳເນີນໄປຄຽງກັນໄດ້ໃນສາມດ້ານ. ໜຶ່ງ, ຍຶດໝັ້ນໃຫ້ຝ່າຍທີ່ມີຄວາມຂັດແຍ່ງກັນດຳເນີນການປຶກສາຫາລືກັນເພື່ອບັນລຸແຜນການແກ້ໄຂ. ນີ້ແມ່ນຊ່ອງທາງພື້ນຖານທີ່ສຸດ, ກໍແມ່ນຊ່ອງທາງແກ້ໄຂບັນຫາໃນຂັ້ນສຸດທ້າຍ. ຈີນເປີດປະຕູການສົນທະນາຕໍ່ບັນດາຝ່າຍທີ່ມີຄວາມຂັດແຍ່ງກັນມາໂດຍຕະຫຼອດ, ຄຳເວົ້າທີ່ວ່າການເຈລະຈາລະຫວ່າງສອງຝ່າຍບໍ່ສາມາດດຳເນີນຕໍ່ໄປໄດ້ອີກແລ້ວນັ້ນ ບໍ່ຖືກຕາມມູນຄວາມຈິງ ແລະ ກໍບໍ່ມີຫຼັກອ້າງອີງ. ສອງ, ສືບຕໍ່ປະຕິບັດຕາມ"ຖະແຫລງການແຫ່ງການປະພຶດຂອງບັນດາຝ່າຍໃນທະເລຈີນໃຕ້", ພ້ອມທັງຊຸກຍູ້ການປຶກສາຫາລືກ່ຽວກັບ "ກົດແຫ່ງການປະພຶດໃນທະເລຈີນໃຕ້" ຫຼື COC ເປັນກ້າວໆ. ສ່ວນ "ຖະແຫລງການແຫ່ງການ ປະພຶດຂອງບັນດາຝ່າຍໃນທະເລຈີນໃຕ້" ແລະ COC ບໍ່ແມ່ນເພື່ອແກ້ໄຂຂໍ້ຂັດແຍ່ງທີ່ລະອຽດ, ຫາກແມ່ນເພື່ອສຸມໃສ່ການຮ່ວມກັນປົກປ້ອງສັນຕິພາບແລະສະຖຽນລະພາບຂອງເຂດທະເລຈີນໃຕ້. ມາຮອດປັດຈຸບັນ, ການຊຸກຍູ້ COC ເຄີຍຖືກລົບກວນຍ້ອນການກະທຳບໍ່ຮ່ວມມືຂອງຝ່າຍໃດໜຶ່ງ, ຝ່າຍຈີນບໍ່ຢາກໄດ້ເຫັນການກະທຳແບບນີ້ມີຂຶນອີກ. ສາມ, ຕັ້ງໜ້າຊອກຄົ້ນ "ການບຸກເບີກພັດທະນາຮ່ວມກັນ". ການແກ້ໄຂຄວາມຂັດແຍ່ງກັນໃນທະເລຈີນໃຕ້ໃຫ້ຕົກໃນທີ່ສຸດຍັງຕ້ອງການເວລາຍາວສົມຄວນ, ກ່ອນໄດ້ຮັບການແກ້ໄຂ, ບັນດາຝ່າຍທີ່ກ່ຽວຂ້ອງຄວນເລີ່ມຈາກການບັນລຸການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຮ່ວມກັນຊອກຄົ້ນຊ່ອງທາງຊຸກຍູ້ "ການບຸກເບີກພັດທະນາຮ່ວມກັນ". "ການບຸກເບີກພັດທະນາຮ່ວມກັນ" ມີຄວາມໝາຍບໍ່ພຽງແຕ່ໃນດ້ານຜົນປະໂຫຍດທາງເສດຖະກິດເທົ່ານັ້ນ, ແຕ່ຍັງຈະເປັນການສົ່ງສັນຍານອັນຈະແຈ້ງຕໍ່ພາຍນອກວ່າ, ປະເທດໃນພາກພື້ນນີ້ຍິນດີແກ້ໄຂຄວາມຂັດແຍ່ງ ລະຫວ່າງຝ່າຍຕ່າງໆຢ່າງເໝາະສົມດ້ວຍຮູບແບບການຮ່ວມມື.
