ທ່ານຮຸນແຊນກ່າວວ່າ ກຳປູເຈຍຈະບໍ່ຕົກຢູ່ໃນສະພາບທາງຕັນທາງການເມືອງ
ວັນທີ 2 ສິງຫານີ້, ທ່ານຮຸນແຊນ, ນາຍົກລັດຖະມົນຕີກຳປູເຈຍ ກ່າວວ່າ: ພັກປະຊາຊົນຊີງໄດ້ບ່ອນນັ່ງຂອງສະພາແຫ່ງຊາດກວ່າເຄິ່ງໜຶ່ງແລ້ວ, ການເລືອກຕັ້ງທົ່ວໄປໃນປີນີ້ຈະບໍ່ຕົກຢູ່ໃນສະພາບທາງຕັນທາງການເມືອງ, ປະຊາຊົນຄວນສືບຕໍ່ດຳລົງຊີວິດຕາມສະພາບປົກກະຕິ.
ທ່ານຮຸນແຊນ ກ່າວວ່າ: ພາຍຫຼັງການເລືອກຕັ້ງທົ່ວໄປ 60 ວັນ, ສົມເດັດໂນໂຣດົມ ສີຫາໂມນີ, ມະຫາກະສັດກຳປູເຈຍ ຈະຮຽກໄຂກອງປະຊຸມຄັ້ງປະຖົມມະເລີກຂອງສະພາແຫ່ງຊາດສະໄໝໃໝ່ດ ຖ້າສະມາຊິກສະພາທີ່ສັງກັດພັກຝ່າຍຄ້ານບໍ່ເຂົ້າຮ່ວມກອງປະຊຸມ, ກໍໝາຍຄວາມວ່າໄດ້ປະລະບ່ອນນັ່ງຂອງຕົນ, ຄະນະກຳມະການເລືອກຕັ້ງແຫ່ງຊາດ ຈະແບ່ງປັນບ່ອນນັ່ງທີ່ຖືກປະນັ້ນໃຫ້ພັກການເມືອງອື່ນໆທີ່ຊີງໄດ້ບ່ອນນັ່ງໃນການເລືອກຕັ້ງ.
ໂດຍແນໃສ່ເລື່ອງທີ່ສະມາຊິກສະພາສູງອາເມລິກາກ່າວເຕືອນວ່າຈະຢຸດຕິການຊ່ວຍເຫຼືອກຳປູເຈຍນັ້ນ, ທ່ານຮຸນແຊນ ໃຫ້ຄຳຕອບວ່າ: ກຳປູເຈຍມີເງິນສົດ, ຄຳ ແລະ ເງິນຕາຕ່າງປະເທດໃນຄັງສຳຮອງຢ່າງພຽງພໍ, ຈະບໍ່ໄດ້ຮັບຜົນສະທ້ອນຈາກການຢຸດຕິການຊ່ວຍເຫຼືອ.
ກຳປູເຈຍໄດ້ຈັດການເລືອກຕັ້ງສະພາແຫ່ງຊາດສະໄໝທີ 5 ໃນວັນທີ 28 ກໍລະກົດຜ່ານມານີ້. ຜົນການນັບບັດໃນເບື້ອງຕົ້ນສະແດງໃຫ້ເຫັນວ່າ, ພັກປະຊາຊົນ ເຊິ່ງແມ່ນພັກກຳອຳນາດ ທີ່ນຳພາໂດຍທ່ານຮຸນແຊນ ຊີງໄດ້ 68 ບ່ອນນັ່ງໃນຈຳນວນທັງໝົດ 123 ບ່ອນນັ່ງໃນສະພາແຫ່ງຊາດ, ພັກກູ້ຊາດ ເຊິ່ງແມ່ນພັກຝ່າຍຄ້ານຊີງໄດ້ 55 ບ່ອນນັ່ງ. ແຕ່ພັກກູ້ຊາດໄດ້ປະຕິເສດຜົນການເລືອກຕັ້ງນີ້. ປັດຈຸບັນ, ຄະນະກຳມະການເລືອກຕັ້ງແຫ່ງຊາດກຳປູເຈຍຍັງບໍ່ທັນໄດ້ເປີດເຜີຍຜົນການເລືອກຕັ້ງຢ່າງເປັນທາງການເທື່ອ.
