ປະທານປະເທດລາວຕ້ອນຮັບການເຂົ້າຢ້ຽມຂ່ຳນັບຂອງລັດຖະມົນຕີການຕ່າງປະເທດຈີນ
ວັນທີ 3 ສິງຫານີ້, ຢູ່ທີ່ນຳທຽບປະທານປະເທດທີ່ນະຄອນຫຼວງວຽງຈັນ, ທ່ານຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນ ໃນໂອກາດເດີນທາງໄປຢ້ຽມຢາມລາວຢ່າງເປັນທາງການ.
ທ່ານຈູມມາລີ ໄຊຍະສອນ ກ່າວວ່າ: ຈີນໄດ້ຮັບໝາກຜົນອັນໃຫຍ່ຫຼວງໃນພາລະກິດສ້າງສາສັງຄົມນິຍົມ, ມີຖານະບົດບາດນັບມື້ນັບສູງຂຶ້ນໃນເວທີສາກົນ. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນໄຂຂຶ້ນຢ່າງສຳເລັດຜົນ ໄດ້ຊີ້ບອກທິດທາງການພັດທະນາຂອງຈີນໃນໄລຍະໃໝ່, ນີ້ໄດ້ເປັນການເຊີດຊູກຳລັງໃຈແກ່ປະເທດລາວທີ່ຍຶດໝັ້ນເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງປະເທດຕົນ. ພັກ ແລະ ລັດຖະບານລາວຫວັງຢາກຮ່ວມກັນກັບຄະນະນຳສູນກາງຊຸດໃໝ່ຂອງຈີນ, ລົງເລິກການພົວພັນຖານສະຫາຍ ແລະ ເພື່ອນມິດທີ່ໄວ້ເນື້ອເຊື່ອໃຈໃນລະດັບສູງ ແລະ ສະໜິດສະໜົມລະຫວ່າງສອງຝ່າຍ.
ທ່ານຫວາງອີ້ ກ່າວວ່າ: ການພົວພັນລະຫວ່າງຈີນ-ລາວແມ່ນການພົວພັນທີ່ມີຄວາມໝາຍທາງຍຸດທະສາດອັນພິເສດ. ໂດຍປະເຊີນກັບສະຖານະການສາກົນທີ່ສັບສົນແລະມີການປ່ຽນແປງເລື້ອຍໆ, ຄະນະນຳສູນກາງຊຸດໃໝ່ຂອງຈີນຍິນດີຮ່ວມກັນກັບຝ່າຍລາວເພີ່ມທະວີການແລກປ່ຽນທາງຍຸດທະສາດ, ລົງເລິກການຮ່ວມມືທາງດ້ານຍຸດທະສາດ ບົນພື້ນຖານການພົວພັນໄມຕີຈິດມິດຕະພາບລະຫວ່າງຈີນ-ລາວທີ່ລິເລີ່ມສ້າງໂດຍຜູ້ນຳລຸ້ນອາວຸໂສຂອງສອງປະເທດ, ປົກປັກຮັກສາຜົນປະໂຫຍດຮ່ວມທາງດ້ານຍຸດທະສາດຂອງສອງຝ່າຍ, ຜ່ານການລົງເລິກການຮ່ວມມືແທ້ຈິງໃນຂົງເຂດຕ່າງໆ, ເພີ່ມເນື້ອໃຈອັນໃໝ່ເຂົ້າໃນການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ລາວ ຢ່າງບໍ່ຢຸດຢັ້ງ.
