ລັດຖະມົນຕີການຕ່າງປະເທດຈີນໃຫ້ສຳພາດກ່ຽວກັບຂະບວນການສ້າງ "ກົດບັດແຫ່ງການປະພຶດໃນທະເລຈີນໃຕ້"
ວັນທີ 5 ສິງຫານີ້, ຢູ່ທີ່ນະຄອນຫຼວງຮ່າໂນຍ, ທ່ານຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນທີ່ພ້ວມຢ້ຽມຢາມຢູ່ຫວຽດນາມໄດ້ໃຫ້ສຳພາດຕໍ່ນັກຂ່າວ, ໂດຍກ່າວວ່າ: ຈີນແລະບັນດາປະເທດອາຊຽນໄດ້ເຫັນດີປຶກສາຫາລືກັນກ່ຽວກັບການຊຸກຍູ້ຂະບວນການສ້າງ "ກົດບັດແຫ່ງການປະພຶດໃນທະເລຈີນໃຕ້" ພາຍໃຕ້ຂອບການປະຕິບັດ "ຖະແຫລງການແຫ່ງການປະພຶດຂອງບັນດາ ຝ່າຍໃນທະເລຈີນໃຕ້", ເພື່ອຮ່ວມກັນປົກປັກຮັກສາສັນຕິພາບແລະສະຖຽນລະພາບໃນເຂດທະເລຈີນໃຕ້.
ທ່ານຫວາງອີ້ ກ່າວວ່າ: ຈີນຍຶດຖືທ່າທີອັນຕັ້ງໜ້າ ແລະ ເປີດປະຕູໃນການສ້າງ "ກົດບັດແຫ່ງການປະພຶດໃນທະເລຈີນໃຕ້", ໃນຂະນະດຽວກັນກໍໄດ້ສົນໃຈວ່າ ໃນເມື່ອບໍ່ດົນມານີ້ ຝ່າຍຕ່າງໆໄດ້ມີຄວາມເຫັນຫຼາຍຢ່າງກ່ຽວກັບການເຮັດແນວໃດຈຶ່ງສາມາດຊຸກຍູ້ຂະບວນການດັ່ງກ່າວ, ກ່ຽວກັບເລື່ອງນີ້, ຄວາມເຫັນຂອງຈີນມີດັ່ງນີ້:
ໜຶ່ງ, ຕ້ອງມີໄລຍະກະກຽມທີ່ສົມເຫດສົມຜົນ. ມີບາງປະເທດໄດ້ສະເໜີວ່າ "ຄວນເຮັດສຳເລັດໂດຍໄວ", ໂດຍຫວັງວ່າສາມາດປຶກສາຫາລືຕົກລົງກັນໄດ້ໃນໄລຍະອັນສັ້ນໆ, ນີ້ບໍ່ສອດຄ່ອງກັບເລື່ອງຄວາມເປັນຈິງ, ກໍບໍ່ແມ່ນທ່າທີອັນໜັກແໜ້ນແລະຕັ້ງໜ້າ. "ກົດບັດແຫ່ງການປະພຶດໃນທະເລຈີນໃຕ້" ໄດ້ກ່ຽວພັນເຖິງຜົນປະໂຫຍດຂອງຫຼາຍຝ່າຍ, ຕ້ອງດຳເນີນການປະສານງານຢ່າງລະອຽດແລະສັບສົນກ່ອນ ການວາງອອກ.
ສອງ, ຕ້ອງປຶກສາຫາລືໃຫ້ເປັນເອກະພາບກັນ. ການຊຸກຍູ້ການສ້າງ "ກົດບັດແຫ່ງການປະພຶດໃນທະເລຈີນໃຕ້" ຄວນພິຈາລະນາບົດຮຽນຂອງການວາງ "ຖະແຫລງການແຫ່ງການປະພຶດຂອງ ບັນດາຝ່າຍໃນທະເລຈີນໃຕ້", ສະແຫວງຫາຄວາມຮັບຮູ້ທີ່ເປັນເອກະພາບກັນອັນ ກວ້າງຂວາງທີ່ສຸດ, ຄຳນຶງເຖິງຄວາມສະບາຍໃຈຂອງຝ່າຍຕ່າງໆ. ບໍ່ຄວນເອົາຈິດໃຈຂອງປະເທດໃດໜຶ່ງ ຫຼື ປະເທດຈຳນວນໜ້ອຍຂຶນເຕັງໃສ່ປະເທດອື່ນ, ຖ້າບໍ່ດັ່ງນັ້ນກໍຈະບໍ່ໄດ້ຮັບຜົນແຕ່ຢ່າງໃດ.
ສາມ, ຕ້ອງກຳຈັດສິ່ງລົບກວນຕ່າງໆ. ແຕ່ກ່ອນ, ຈີນກັບປະເທດອາຊຽນເຄີຍໄດ້ປຶກສາຫາລືກັນກ່ຽວກັບ "ກົດບັດແຫ່ງການປະພຶດໃນທະເລຈີນໃຕ້" ຫຼາຍເທື່ອແລ້ວ, ແຕ່ໄດ້ຢຸດຕິການປຶກສາຫາລືຍ້ອນຖືກລົບກວນ. ຝ່າຍຕ່າງໆຄວນກະທຳແຕ່ໃນສິ່ງທີ່ມີຜົນດີຕໍ່ການຊຸກຍູ້ຂະບວນການສ້າງ "ກົດບັດແຫ່ງການປະພຶດໃນທະເລຈີນໃຕ້", ສ້າງເງື່ອນໄຂແລະສະພາບແວດລ້ອມອັນຈຳເປັນ, ບໍ່ຄວນກະທຳໃນສິ່ງທີ່ມີຜົນກົງກັນຂ້າມ.
ສີ່, ຄວນຄ່ອຍເປັນຄ່ອຍໄປ. ການສ້າງ "ກົດບັດແຫ່ງການປະພຶດໃນທະເລຈີນໃຕ້" ແມ່ນການກຳນົດທີ່ລະບຸໄວ້ໃນ "ຖະແຫລງການແຫ່ງ ການປະພຶດຂອງບັນດາຝ່າຍໃນທະເລຈີນໃຕ້", ຈະເອົາ "ກົດບັດແຫ່ງການປະພຶດໃນທະເລຈີນໃຕ້" ເຂົ້າແທນ "ຖະແຫລງການແຫ່ງ ການປະພຶດຂອງບັນດາຝ່າຍໃນທະເລຈີນໃຕ້" ບໍ່ໄດ້, ຍິ່ງບໍ່ຄວນປະຖິ້ມ "ຖະແຫລງການ" ແລະ ໄປເຮັດແນວອື່ນຕ່າງຫາກ. ວຽກງານອັນຮີບດ່ວນທີ່ສຸດໃນປັດຈຸບັນແມ່ນສືບຕໍ່ປະຕິບັດຕາມ "ຖະແຫຼງການ", ໂດຍສະເພາະແມ່ນຄວນຕັ້ງໜ້າຊຸກຍູ້ການຮ່ວມມືທາງທະເລ, ແລະໃນໄລຍະນີ້ ກໍປຶກສາຫາລືກັນເພື່ອກຳນົດແຜນການແຫ່ງການສ້າງ "ກົດບັດແຫ່ງການປະພຶດໃນທະເລຈີນໃຕ້", ກ້າວເດີນໄປໜ້າເທື່ອລະກ້າວ.
