ເກີດເຫດລະເບີດທີ່ນະຄອນຫຼວງກຳປູເຈຍ
ຕອນຮຸ່ງເຊົ້າວັນທີ 7 ສິງຫານີ້, ຢູ່ບ່ອນໃກ້ສານນະຄອນຫຼວງພະນົມເປັນຂອງກຳປູເຈຍ ໄດ້ເກີດເຫດລູກລະເບີດແບບງ່າຍໆລະເບີດ, ແຕ່ບໍ່ມີຄົນເສຍຊີວິດ ຫຼື ບາດເຈັບ.
ທ່ານຈູນໂສວັນ, ຫົວໜ້າກົມຕະຫຼວດພະນົມເປັນ ກ່າວວ່າ: ເຫດລະເບີດໄດ້ເກີດຢູ່ບ່ອນໃກ້ຖັງຂີ້ເຫຍື້ອທີ່ຢູ່ນອກສານພະນົມເປັນ, ໂດຍມີຈຸດປະສົງຢາກສ້າງຄວາມບໍ່ສະຫງົບໃນສັງຄົມໃນໄລຍະດຳເນີນການເລືອກຕັ້ງສະພາແຫ່ງຊາດ ເຊິ່ງເປັນໄລຍະທີ່ບໍ່ທຳມະດານີ້. ປັດຈຸບັນ ເຈົ້າໜ້າທີ່ຕຳຫຼວດພວມດຳເນີນການສືບສວນສອບສວນເຫດການດັ່ງກ່າວ, ແຕ່ຍັງບໍ່ສາມາດກຳນົດຜູ້ຕ້ອງສົງໄສໄດ້ເທື່ອ.
ກຳປູເຈຍໄດ້ດຳເນີນການເລືອກຕັ້ງສະພາແຫ່ງຊາດໃນວັນທີ 28 ກໍລະກົດຜ່ານມານີ້. ອີງຕາມຜົນສະຖິຕິເບື້ອງຕົ້ນທີ່ບໍ່ແມ່ນທາງການທີ່ປະກາດໂດຍລັດຖະມົນຕີຖະແຫຼງຂ່າວກຳປູເຊຍ, ພັກປະຊາຊົນ ເຊິ່ງແມ່ນພັກກຳອຳນາດກຳປູເຈຍຊີງໄດ້ 68 ບ່ອນນັ່ງໃນຈຳນວນທັງໝົດ 123 ບ່ອນນັ່ງໃນສະພາແຫ່ງຊາດກຳປູເຈຍ, ພັກກູ້ຊາດກຳປູເຈຍ ເຊິ່ງແມ່ນພັກຝ່າຍຄ້ານຊີງໄດ້ 55 ບ່ອນນັ່ງ. ແຕ່ພັກກູ້ຊາດກຳປູເຈຍປະຕິເສດບໍ່ຮັບຮອງຜົນການເລືອກຕັ້ງດັ່ງກ່າວ, ໂດຍກ່າວວ່າພັກກູ້ຊາດຊີງໄດ້ 63 ບ່ອນນັ່ງ, ແລະຮຽກຮ້ອງໃຫ້ໜ່ວຍກວດກາປະສົມຫຼາຍຝ່າຍທີ່ເປັນອິດສະຫຼະເຊິ່ງແມ່ນອົງການສະຫະປະຊາຊາດເປັນແກນນຳ ດຳເນີນການກວດກາການເລືອກຕັ້ງສະພາແຫ່ງຊາດກຳປູເຈຍໃນຄັ້ງນີ້, ແລະຂົ່ມຂູ່ວ່າຖ້າບໍ່ດຳເນີນການກວດກາ ກໍຈະກໍ່ການເຄື່ອນໄຫວປະທ້ວງຂະໜາດໃຫຍ່ໃນທົ່ວປະເທດ.
