ສື່ມວນຊົນໄທລາຍງານໃນວັນທີ 7 ສິງຫານີ້ວ່າ: ປັດຈຸບັນ, ພາກສ່ວນການຕ່າງປະເທດຂອງສອງປະເທດໄທ-ຈີນພວມດຳເນີນການປຶກສາຫາລືກັນຢ່າງເລິກເຊິ່ງກ່ຽວກັບລາຍລະອຽດ ການຍົກເວັ້ນວິຊາທ່ອງທ່ຽວໃຫ້ກັນ, ແລະອາດຈະເລີ່ມປະຕິບັດຕົວຈິງນັບແຕ່ເດືອນກັນຍາປີນີ້ເປັນຕົ້ນໄປ. ສ່ວນເວັບໄຊ ແລະ ບຼອກສັ້ນພາຍໃນປະເທດຈີນຈຳນວນຫຼາຍກໍໄດ້ລາຍງານຂ່າວດັ່ງກ່າວຢ່າງຫຼວງຫຼາຍ. ແຕ່ນັກຂ່າວໄດ້ຢືນຢັນນຳພາກສ່ວນທີ່ກ່ຽວຂ້ອງວ່າ, ຂ່າວນີ້ແມ່ນບໍ່ຖືກຕ້ອງຕາມຄວາມເປັນຈິງ.
ການທີ່ມີການລາຍງານຂ່າວດັ່ງກ່າວ, ອາດຈະແມ່ນຍ້ອນວ່າປະເທດໄທຫວັງຢາກດຶງດູດນັກທ່ອງທ່ຽວຈີນໄປທ່ຽວຢູ່ໄທໃຫ້ຫຼາຍກວ່າເກົ່າ. ນັບແຕ່ປີ 2004 ເປັນຕົ້ນມາ, ນັກທ່ອງທ່ຽວຈີນໄປທ່ຽວຢູ່ໄທໄດ້ເພີ່ມຂຶ້ນໃນແຕ່ລະປີ, ເຊິ່ງຮອດປີກາຍນີ້ໄດ້ເພີ່ມຂຶ້ນເປັນ 2 ລ້ານ 7 ແສນເທື່ອຄົນ. ໃນເວລາມາຢ້ຽມຢາມຈີນ, ເຈົ້າໜ້າທີ່ຂັ້ນສູງຂອງໄທກໍ່ໄດ້ສະແດງຄວາມປາຖະໜາຂອງຕົນຕໍ່ຝ່າຍຈີນຫຼາຍເທື່ອວ່າ ຫວັງຢາກໃຫ້ມີນັກທ່ອງທ່ຽວຈີນໄປທ່ຽວຢູ່ໄທຍິ່ງຫຼາຍກວ່າເກົ່າອີກ.
ຖ້າຈີນ-ໄທຍົກເວັ້ນວິຊາທ່ອງທ່ຽວໃຫ້ກັນແລ້ວ, ຈຳນວນນັກທ່ອງທ່ຽວຈີນໄປທ່ຽວຢູ່ໄທກໍຈະເພີ່ມຂຶ້ນທົບເທົ່າ, ຄາດວ່າໃນແຕ່ລະປີ ນັກທ່ອງທ່ຽວຈີນທີ່ໄປທ່ຽວຢູ່ໄທຈະມີເຖິງ 5 ລ້ານເທື່ອຄົນ, ເຊິ່ງຈະສາມາດສ້າງລາຍຮັບໃນຂະແໜງການທ່ອງທ່ຽວໃຫ້ແກ່ໄທໄດ້ຫຼາຍຍິ່ງຂຶ້ນ. ພ້ອມກັນນັ້ນ, ຖ້າສອງປະເທດຍົກເວັ້ນວິຊາທ່ອງທ່ຽວໃຫ້ກັນແລ້ວ, ປະຊາຊົນຈີນທີ່ໄປທ່ຽວຢູ່ໄທກໍມີທາງເລືອກຫຼາຍຢ່າງ, ເຊິ່ງນອກຈາກຈັດຕັ້ງເປັນຄະນະນັກທ່ອງທ່ຽວແລ້ວ, ຈະມີຄົນຫຼາຍກວ່າເກົ່າເລືອກທີ່ຈະໄປທ່ຽວເອງກໍໄດ້. ສະນັ້ນ, ຄາດວ່ານັກທ່ອງທ່ຽວຈີນກໍຫວັງຢ່າງຍິ່ງວ່າສອງປະເທດຈະສາມາດບັນລຸການຍົກເວັ້ນວິຊາທ່ອງທ່ຽວໃຫ້ກັນໄດ້, ສະນັ້ນຈຶ່ງຍິນດີຈຶ່ງເຊື່ອວ່າຂ່າວທີ່ສື່ມວນຊົນໄທລາຍງານນັ້ນອາດຈະແມ່ນເລື່ອງຈິງ.
© China Radio International.CRI. All Rights Reserved. 16A Shijingshan Road, Beijing, China. 100040 |