ການແຂ່ງຂັນດອກປີກໄກ່ຊີງແຊມໂລກ 2013 ສິ້ນສຸດລົງ ນັກກິລາຈີນຊີງໄດ້ແຊມປຽນປະເພດດ່ຽວເພດຊາຍ 5 ຄັ້ງລຽນຕິດ
ການແຂ່ງຂັນດອກປີກໄກ່ຊີງແຊມໂລກ 2013 ໄດ້ສິ້ນສຸດລົງທີ່ນະຄອນກວາງໂຈ່ວ ແຂວງກວາງຕຸ້ງຈີນໃນວັນທີ 11 ສິງຫານີ້. ຈີນແລະອິນໂດເນເຊຍ ເປັນປະເທດທີ່ປະສົບຜົນສຳເລັດຍິ່ງໃຫຍ່ກວ່າໝູ່. ທ້າວຫຼິນຕ່ານ, ນັກກິລາດອກປີກໄກ່ປະເພດດ່ຽວຈີນຊີງໄດ້ແຊມປຽນປະເພດດ່ຽວເພດຊາຍ, ນາງອີຢາງແລະນາງຫວາງສຽວລີ, ນັກກີລາປະເພດຄູ່ເພດຍິງຈີນ ກໍຊີງໄດ້ແຊມປຽນເຊັ່ນກັນ; ນາງຣັດຊະນົກ ອິນທະນົນ, ນັກກິລາໄທ ໄດ້ເອົາຊະນະນາງຫຼີເສຣຸ້ຍ, ແຊມປຽນງານໂອລິມປິກຈີນ ແລະ ຊີງໄດ້ແຊມປຽນປະເພດດ່ຽວເພດຍິງ, ກາຍເປັນແຊມປຽນດອກປີກໄກ່ໂລກຂອງໄທຄົນທຳອິດເປັນຄັ້ງປະຫວັດສາດ. ໃນທີ່ສຸດ, ທີມກິລາຈີນຊີງໄດ້ສອງຫຼຽນຄຳໃນການແຂ່ງຂັນດອກປີກໄກ່ຊີງແຊມໂລກໃນຄັ້ງນີ້.
ໃນການແຂ່ງຂັນດອກປີກໄກ່ຊີງແຊມໂລກຄັ້ງນີ້, ອິນໂດເນເຊຍມີທ່າອ່ຽງຟື້ນຕົວຂຶ້ນ, ນັກກິລາໄທຊີງໄດ້ແຊມໂລກເປັນຄັ້ງທຳອິດ, ນັກກິລາຫວຽດນາມກໍສາມາດເຂົ້າຮອບຮອງຊະນະເລີດເພດຊາຍຄັ້ງທຳອິດ. ນາງຣັດຊະນົກ ອິນທານົນ, ນັກກິລາຍິງຂອງໄທທີ່ອາຍຸໄດ້ພຽງແຕ່ 18 ປີ ໄດ້ເອົາຊະນະນາງຫຼີເສຣຸ້ຍ, ແຊມປຽນງານໂອລິມປິກຈີນ ດ້ວຍຜົນການແຂ່ງຂັນ 2 ຕໍ່ 1, ກາຍເປັນແຊມປຽນດອກປີກໄກ່ໂລກຂອງໄທຄົນທຳອິດເປັນຄັ້ງປະຫວັດສາດ. ເມື່ອເວົ້າເຖິງງານກິລາໂອລິມປິກປີ 2016, ນາງຣັດຊະນົກ ອິນທານົນ ກ່າວວ່າ: ເວລາຮອດງານກິລາໂອລິມປິກປີ 2016, ຂ້າພະເຈົ້າພໍດີຈະຮອດກະສຽນອາຍຸລ້ຳເລີດທີ່ສຸດ. ຂ້າພະເຈົ້າຈະສືບຕໍ່ຮັກສາໃຫ້ຢູ່ໃນສະພາບປົກກະຕິ ແລະ ທຳການຝຶກຫັດຕາມປົກກະຕິ. ເທື່ອນີ້ສາມາດເອົາຊະນະ ຫຼີເສຣຸ້ຍໄດ້, ກໍໄດ້ເພີ່ມຄວາມໝັ້ນໃຈໃຫ້ຂ້າພະເຈົ້າເອງຢ່າງໃຫຍ່ຫຼວງເພື່ອເຂົ້າຮ່ວມງານກິລາໂອລິມປິກ.
