ປະທານາທິບໍດີມຽນມາກ່າວເນັ້ນວ່າຈະສືບຕໍ່ຊຸກຍູ້ຂະບວນການຄວາມປອງດອງຊາດ
(GMT+08:00) 2013-08-15 14:57:25 cri
ຕາມຂ່າວCRI:ໃນເວລາກ່າວຄຳປາໄສຢູ່ນະຄອນຫຼວງເນປີດໍໃນວັນທີ14ສິງຫານີ້, ທ່ານເທນ ເຊັນ, ປະທານາທິບໍດີມຽນມາໄດ້ກ່າວເນັ້ນວ່າຈະສືບຕໍ່ຊຸກຍູ້ຂະບວນການຄວາມປອງດອງຊາດ, ເພື່ອບັນລຸສັນຕິພາບແລະຄວາມສະຫງົບດ້ານການເມືອງພາຍໃນປະເທດ.
ໂທລະພາບແຫ່ງຊາດມຽນມາລາຍງານວ່າ, ທ່ານເທັນ ເຊັນໄດ້ກ່າວໃນກິດຈະກຳເທື່ອໜຶ່ງຂອງລັດຖະບານໃນມື້ດຽວກັນວ່າ, ລັດຖະບານໄດ້ເຊັນສັນຍາຢຸດຍິງກັບກອງປະກອບອາວຸດຊົນເຜົ່າສ່ວນໜ້ອຍ13ກອງ, ແລະອີກບໍ່ດົນຂ້າງໜ້າອາດຈະເຊັນສັນຍາຢຸດຍິງກັບກອງປະກອບອາວຸດຊົນເຜົ່າສ່ວນໜ້ອຍທັງໝົດ. ເພື່ອບັນລຸສັນຕິພາບຖາວອນພາຍໃນປະເທດ, ລັດຖະບານຈະພະຍາຍາມຊຸກຍູ້ດຳເນີນການເຈລະຈາທາງການເມືອງກັບກອງປະກອບອາວຸດຊົນເຜົ່າສ່ວນໜ້ອຍ.
ທ່ານເທັນ ເຊັນກ່າວວ່າ, ໃນອາຍຸຕຳແໜ່ງທີ່ຍັງເຫຼືອເປັນເວລາ30ເດືອນໃນຕໍ່ໜ້ານີ້ລັດຖະບານສະໄໝນີ້ຈະຖືວຽກງານໃນຂົງເຂດຊີວິດການເປັນຢູ່ຂອງປະຊາຊົນເປັນວຽກງານຈຸດສຸມໃຫ້ບູລິມະສິດຕໍ່ການພັດທະນາໂຄງການນ້ຳດື່ມຂອງປະຊາຊົນ, ພະລັງງານໄຟຟ້າ, ຄົມມະນາຄົມຂົນສົ່ງແລະໂຄງການປະກອບອາຊີບ. ທ່ານຍັງເຕືອນໃຫ້ເຈົ້າໜ້າທີ່ທຸກຂັ້ນຂອງລັດຖະບານຄວນເພີ່ມທະວີຄວາມຮັບຜິດຊອບ, ລະຫວ່າງພາກສ່ວນຕ່າງໆຕ້ອງມີການແບ່ງງານຢ່າງຈະແຈ້ງ, ກໍຕ້ອງປະສານງານແລະຮ່ວມມືກັນ.