ກອງປະຊຸມບໍ່ເປັນທາງການຂອງລັດຖະມົນຕີການຕ່າງປະເທດຂອງອາຊຽນໄດ້ຈັດຂຶ້ນຢູ່ເມືອງ ຫົວຫີນຂອງປະເທດໄທ
ວັນທີ 14 ສິງຫານນີ້,ລັດຖະມົນຕີວ່າການກະຊວງການຕ່າງປະເທດຂອງບັນດາປະເທດອາຊຽນໄດ້ເດີນທາງໄປຮອດເມືອງຫົວຫີນຂອງປະ ເທດໄທເພື່ອເຂົ້າຮ່ວມກອງປະຊຸມບໍ່ເປັນທາງການຂອງລັດຖະມົນຕີການຕ່າງປະເທດອາຊຽນ.ກອງປະຊຸມຄັ້ງນີ້ໄດ້ບັນລຸຄວາມຮັບຮູ້ທີ່ເປັນເອກະສັນກັນໃນການຊຸກຍູ້ການສ້າງກົດແຫ່ງການປະພຶດໃນທະເລຈີນໃຕ້ຫລືCOC.
ທ່ານ ສຸຣະພົງ ໂຕວິຈັກໄຊກຸນ ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດໄທ, ປະທານຂອງກອງປະ ຊຸມຄັ້ງນີ້ກ່າວວ່າ,ຈີນໄດ້ມີທ່າທີອັນຕັ້ງໜ້າແລະມີລັກສະນະສ້າງສັນໃນບັນຫາທະເລຈີນໃຕ້ ຄືໄດ້ສະເໜີການປຶກສາຫາລືກັບປະເທດອາຊຽນ ກ່ຽວກັບການເຮັດແນວໃດເພື່ອສາມາດຊຸກຍູ້ການສ້າງກົດແຫ່ງການປະພຶດໃນທະເລຈີນໃຕ້,ຫວັງວ່າຈະໄດ້ຮັບຜົນທີ່ເປັນຮູບປະທໍາໂດຍໄວ.ທ່ານມາຕີ ນາຕາເລກາວາ ລັດຖະມົນຕີວ່າການກະຊວງການຕ່າງປະເທດອິນໂດເນເຊຍກ່າວວ່າ ຫວັງວ່າການສ້າງCOCຈະສາມາດເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນ,ຫລີກເວັ້ນຄວາມຂັດແຍ່ງກັນແລະສາມາດແກ້ໄຂບັນຫາທີ່ມີຢູ່ໃນປັດຈຸບັນ.
ນອກຈາກລັດຖະມົນຕີວ່າການກະຊວງການຕ່າງປະເທດກໍາປູເຈຍທີ່ບໍ່ໄດ້ເຂົ້າຮ່ວມກອງປະຊຸມຄັ້ງນີ້ຍ້ອນວຽກງານພາຍໃນປະເທດຕົນແລ້ວ,ລັດຖະມົນຕີວ່າການກະຊວງການຕ່າງປະເທດຂອງປະເທດອື່ນໆໃນອາຊຽນຕ່າງກໍໄດ້ເຂົ້າຮ່ວມກອງປະຊຸມຄັ້ງນີ້. ການຈັດກອງປະຊຸມຄັ້ງນີ້ແມ່ນເພື່ອກະກຽມໃຫ້ແກ່ກອງປະຊຸມລັດຖະມົນຕີການຕ່າງປະເທດຈີນ-ອາຊຽນສະໄໝວິສາມັນທີ່ຈະຈັດຂຶ້ນຢູ່ນະຄອນຫລວງປັກກິ່ງ.
