6 ຄົນເສຍຊີວິດໃນເຫດມິນລະເບີດທີ່ກຳປູເຈຍ
ຕອນຮຸ່ງເຊົ້າວັນທີ 14 ສິງຫານີ້, ຢູ່ແຂວງແປຣວີເຮຍ ກຳປູເຈຍ ເກີດເຫດລົດຕັກເຕີຄັນໜຶ່ງຢຽບມິນແລ້ວລະເບີດຂຶ້ນ, ເຮັດໃຫ້ມີ 6 ຄົນເສຍຊີວິດ, 1 ຄົນບາດເຈັບສາຫັດ.
ຫົວໜ້າພະແນກຕຳຫຼວດແຂວງແປຣວີເຮຍກຳປູເຈຍ ກ່າວວ່າ: ບ່ອນເກີດມິນລະເບີດແຕ່ກ່ອນແມ່ນເຂດສະໜາມຮົບເກົ່າ, ທະຫານໄດ້ຝັງມິນຢູ່ໃຕ້ດິນຢ່າງຫຼວງຫຼາຍ, ຈົນຮອດປັດຈຸບັນກໍຍັງບໍ່ສາມາດເກັບກູ້ໃຫ້ໝົດໄດ້ເທື່ອ.
ກຳປູເຈຍແມ່ນໜຶ່ງໃນປະເທດທີ່ມີມິນຝັງກະຈາຍຫຼາຍທີ່ສຸດໃນໂລກຍ້ອນເກີດສົງຄາມເປັນເວລາຫຼາຍປີຕໍ່ເນື່ອງ, ສະນັ້ນຈຶ່ງໄດ້ເກີດເຫດມິນລະເບີດເປັນປະຈຳ. ຕາມຂໍ້ມູນສະຖິຕິຂອງອົງການກູ້ລະເບີດບໍ່ທັນແຕກຂອງກຳປູເຈຍສະແດງໃຫ້ເຫັນວ່າ, ແຕ່ປີ 1979 ຮອດທ້າຍເດືອນມິຖຸນາ 2013, ເຫດການມິນລະເບີດຢູ່ກຳປູເຈຍ ໄດ້ເຮັດໃຫ້ມີ 1 ໝື່ນ 9670 ຄົນເສຍຊີວິດ, 4 ໝື່ນ 4598 ຄົນໄດ້ຮັບບາດເຈັບ, ລັດຖະບານກຳປູເຈຍ ຄາດຄະເນວ່າ, ຈົນຮອດປີ 2020 ກຳປູເຈຍຈຶ່ງສາມາດກູ້ລະເບີດບໍ່ທັນແຕກໃຫ້ໝົດໄປ.
