ສິງກະໂປຈະດຳເນີນການປັບປຸງກ່ຽວກັບນະໂຍບາຍການປິ່ນປົວດ້ານສາທາລະນະສຸກແລະການປະກັນໄພ
ຕາມຂ່າວສານຊິນຮວາ: ຕອນຄ່ຳວັນທີ 18 ສິງຫານີ້, ທ່ານລີຊຽນລຸງ, ນາຍົກລັດຖະມົນຕີ ສິງກະໂປ ປະກາດວ່າ ຈະດຳເນີນການປັບປຸງນະໂຍບາຍໃນຫຼາຍຂົງເຂດ ເຊັ່ນ: ການປິ່ນປົວດ້ານສາທາລະນະສຸກ ແລະ ການປະກັນໄພ, ເພື່ອຊ່ວຍເຫຼືອຊັ້ນຄົນທີ່ມີລາຍຮັບຕ່ຳໃນການປະເຊີນກັບຄວາມກົດດັນໃນຊີວິດການເປັນຢູ່, ໂດຍສະເພາະຈະຊຸກຍູ້ແຜນການຮັກສາສຸຂະພາບແລະການປະກັນໄພດ້ານການປິ່ນປົວພະຍາດໃນກໍລະນີເຈັບໜັກ ໃຫ້ກວມເອົາຕະຫຼອດຊີວິດຂອງໝົດທຸກຄົນໃນທົ່ວປະເທດ.
ໃນງານຊຸມນຸມມະຫາຊົນສະຫຼອງວັນຊາດສິງກະໂປ, ທ່ານລີຊຽນລຸງ ກ່າວວ່າ: ຈະຍົກລະດັບແຜນການຮັກສາສຸຂະພາບແລະການປະກັນໄພດ້ານການປິ່ນປົວພະຍາດໃນກໍລະນີເຈັບໜັກ ໃຫ້ຂຶ້ນເປັນການປະກັນຕະຫຼອດຊີວິດ, ແລະຍົກເລີກຂໍ້ກຳນົດເກົ່າທີ່ພຽງແຕ່ຮັບປະກັນຮອດອາຍຸ 90 ປີ. ຂະນະດຽວກັນ, ແຜນການດັ່ງກ່າວກໍຈະກວມໄປເຖິງປະຊາຊົນທົ່ວປະເທດ, ເຊິ່ງປະຊາຊົນສິງກະໂປໝົດທຸກຄົນບໍ່ວ່າກຳລັງເຈັບເປັນຢູ່ຫຼືບໍ່ ລ້ວນແຕ່ສາມາດເຂົ້າຮ່ວມແຜນການດັ່ງກ່າວໄດ້, ແລະບໍ່ສາມາດຖອນຄືນໄດ້.
ທ່ານລີຊຽນລຸງ ກ່າວຕື່ມວ່າ: ນີ້ກໍໝາຍຄວາມວ່າ ຄ່າປະກັນກໍຈະເພີ່ມຂຶ້ນໄປຄຽງຄູ່ກັນ, ແຕ່ລັດຖະບານຈະສະໜອງເງິນອຸດໜູນໃຫ້ແກ່ຜູ້ທຸກຍາກທີ່ບໍ່ສາມາດແບກຫາບໄດ້, ເພື່ອຊ່ວຍເຫຼືອເຂົາເຈົ້າໃນການຈ່າຍຄ່າປະກັນ.
