ຜູ້ປະສົບເຄາະຮ້າຍໃນເຫດການຊາວຮົງກົງຈີນຖືກກັກເປັນຕົວປະກັນທີ່ມານີລາເລີ່ມທວງຄ່າທົດແທນນຳຟິລິບປິນໂດຍຜ່ານສານຮົງກົງ
ຕາມຂ່າວສານຊິນຮວາ: ວັນທີ 22 ສິງຫານີ້ແມ່ນວັນສຸດທ້າຍໃນເວລາກຳນົດ 3 ປີທີ່ການທວງຄ່າທົດແທນໃນເຫດການຊາວຮົງກົງຈີນຖືກກັກເປັນຕົວປະກັນທີ່ເກີດຂຶ້ນຢູ່ມານີລາ. ໃນມື້ດຽວກັນ, ແມ່ຂອງທ້າວເຊຖິງຈິ້ນທີ່ໄດ້ເສຍຊີວິດໃນເຫດການ ແລະຜູ້ລອດຊີວິດສອງຄົນ ຄື: ນາງອີ້ສຽວຫຼິງ ແລະ ທ້າວເສີນໂກຈູ້ ໄດ້ມອບໝາຍໃຫ້ທະນາຍຄວາມທຳຄວາມຮ້ອງຟ້ອງນຳສານຂັ້ນສູງຂອງຮົງກົງຈີນ, ເພື່ອທວງຄ່າທົດແທນທີ່ກ່ຽວຂ້ອງ.
ຕອນບ່າຍມື້ດຽວກັນ, ທະນາຍຄວາມທີ່ຕາງໜ້າຜູ້ເສຍຊີວິດແລະຜູ້ລອດຊີວິດໃນເຫດການກັກຕົວປະກັນທີ່ມານີລາ ໄດ້ໄປຮອດສານຂັ້ນສູງຂອງຮົງກົງ, ເພື່ອຮ້ອງຟ້ອງລັດຖະບານຟິລິບປິນ, ອະດີດເຈົ້າຄອງນະຄອນຫຼວງມານີລາ ແລະ ຕຳຫຼວດຟິລິບປິນ 7 ຄົນ, ໃນນັ້ນ 8 ຄົນດັ່ງກ່າວ ຄື ອະດີດເຈົ້າຄອງນະຄອນຫຼວງມານີລາ ແລະ ຕຳຫຼວດຟິລິບປິນ 7 ຄົນໄດ້ຖືກຊີ້ອອກໃນບົດລາຍງານການສຳຫຼວດຂອງລັດຖະ ບານຟິລິບປິນວ່າຕ້ອງເປັນຜູ້ຮັບຜິດຊອບໃນເຫດການນີ້. ພາຍຫຼັງຮ້ອງຟ້ອງຕໍ່ສານແລ້ວ, ຄອບຄົວຂອງຜູ້ເສຍຊີວິດແລະຜູ້ໄດ້ຮັບບາດເຈັບໃນເຫດການຈະໄປຍື່ນຄຳຮ້ອງໃຫ້ສະຖານກົງສຸນໃຫຍ່ຟິລິບປິນປະຈຳຮົງກົງໂດຍກົງໃນວັນທີ 23 ສິງຫານີ້.
ມື້ດຽວກັນ, ທ່ານລີໂກໂຕ້ງ, ຫົວໜ້າພະແນກຮັກສາຄວາມໝັ້ນຄົງຂອງອຳນາດການປົກຄອງເຂດພິເສດຮົງກົງ ກ່າວວ່າ: ໃນຫຼາຍປີຜ່ານ ມານີ້, ອຳນາດການປົກຄອງເຂດພິເສດຮົງກົງກໍໄດ້ໃຫ້ຄຳຕອບທີ່ເໝາະສົມແລະສົມເຫດສົມຜົນຕໍ່ຄວາມຮຽກຮ້ອງຕ້ອງການຂອງຄອບຄົວຂອງຜູ້ກ່ຽວແລ້ວ, ແຕ່ຈົນຮອດປັດຈຸບັນກໍຍັງບໍ່ທັນໄດ້ຮັບຄຳຕອບທີ່ຈະແຈ້ງຈາກຝ່າຍຟິລິບປິນເທື່ອ, ທາງການຮົງກົງຈະສືບຕໍ່ຕິດຕາມເຫດການນີ້ດ້ວຍຄວາມພະຍາຍາມຈົນສຸດຄວາມສາມາດ. ຫວ່າງມໍ່ໆນີ້, ທ່ານຫຼຽງເຈີ້ນອິ່ງ, ຜູ້ບໍລິຫານເຂດບໍລິຫານພິເສດຮົງກົງ ກໍກ່າວວ່າ: ອຳນາດການປົກຄອງເຂດພິເສດຈະສືບຕໍ່ຕິດຕາມເຫດການນີ້, ແລະຕິດຕາມເຫດການດ້ວຍວິທີທີ່ຕ່າງກັນ, ຊ່ອງທາງທີ່ຕ່າງກັນ ແລະ ໃນສະຖານທີ່ທີ່ຕ່າງກັນ, ເພື່ອຮັບປະກັນໃຫ້ລັດຖະບານຟິລິບປິນຕ້ອງຄືນຄວາມຍຸດຕິທຳແກ່ຜູ້ເສຍຊີວິດແລະຄອບຄົວ ແລະຜູ້ໄດ້ຮັບບາດເຈັບໃນເຫດການຕົວປະກັນທີ່ມານີລາຟິລິບປິນ.
