ເວັບໄຊທາງສັງຄົມມຽນມາຍັງຕ້ອງມີການຕິດຕາມຄຸ້ມຄອງຢ່າງເຂັ້ມງວດຕື່ມອີກ
ຫວ່າງບໍ່ດົນມານີ້, ນັກຂ່າວໄດ້ໄປສຳພາດຂ່າວຢູ່ເມືອງເມັກຕີລາມຽນມາທີ່ເຄີຍເກີດເຫດການວຸ້ນວາຍທາງສາສະໜາໃນແຕ່ກ່ອນ, ແລະໄດ້ພົບວ່າ, ເຖິງວ່າລັດຖະບານມຽນມາໄດ້ຍົກເລີກຄຳສັ່ງຫ້າມການສັນຈອນໃນຍາມກາງຄືນຜ່ານມາ 4 ເດືອນແລ້ວ ແລະລະບຽບຊີວິດການເປັນຢູ່ຂອງປະຊາຊົນທ້ອງຖິ່ນກໍໄດ້ຟື້ນຟູຄືນສູ່ປົກກະຕິເປັນກ້າວໆກໍຕາມ, ແຕ່ກໍຍັງມີຊາວມຸສລິມພັນກວ່າຄົນຍັງພັກຢູ່ໃນຄ້າຍຊາວອົບພະຍົບທີ່ສ້າງຂຶ້ນຊົ່ວຄາວ. ໃນເຫດການປັ່ນປ່ວນວຸ້ນວາຍຄັ້ງນັ້ນ, ການປຸກລະດົມຈາກເວັບໄຊທາງສັງຄົມ ໄດ້ເຮັດໃຫ້ສອງກຸ່ມຄົນ ຄື ຊາວພຸດແລະຊາວມຸສລິມ ມີຄວາມລະເວງສົງໄສແລະເປັນປໍລະປັກກັນຮຸນແຮງຂຶ້ນຕື່ມ. ທີ່ຈິງແລ້ວ, ບໍ່ວ່າເຫດການວຸ້ນວາຍທີ່ເກີດຂຶ້ນຢູ່ລັດຍະໄຂ່ມຽນມາໃນປີກາຍນີ້ ຫຼືວ່າ ເຫດການປະທະກັນທາງສາສະໜາທີ່ເກີດຂຶ້ນຢູ່ຫຼາຍແຫ່ງຂອງມຽນມາໃນປີນີ້, ເວັບໄຊທາງສັງຄົມກໍແມ່ນສິ່ງທີ່ເບິ່ງຂ້າມບໍ່ໄດ້. ການເພີ່ມທະວີການຄຸ້ມຄອງເວັບໄຊທາງສັງຄົມ ນັບມື້ນັບກາຍເປັນຂໍ້ສົນທະນາທີ່ສຳຄັນໃນການສຳນຶກຄືນຂອງສັງຄົມມຽນມາ, ການເພີ່ມທະວີການຄຸ້ມຄອງແລະການຊີ້ນຳຕໍ່ເວັບໄຊທາງສັງຄົມກໍມີຄວາມຈຳເປັນແລະມີຄວາມຮີບດ່ວນນັບມື້ນັບພົ້ນເດັ່ນຂຶ້ນ.
ນອກຈາກນີ້ແລ້ວ, ກ່ຽວກັບສາເຫດຕົ້ນຕໍທີ່ພາໃຫ້ເກີດການປະທະກັນທາງສາສະໜາພາຍໃນປະເທດມຽນມາທີ່ຖືກເວັບໄຊທາງສັງຄົມປັ່ນຂ່າວຫຼາຍເທື່ອແລ້ວນັ້ນ, ນັກຄົ້ນຄວ້າຊັ້ນສູງສະຖາບັນຄົ້ນຄວ້າອາຊີໃຕ້ສິງກະໂປ, ນັກວິຊາການເຊື້ອສາຍມຽນມາ ໄດ້ໃຫ້ສຳພາດຕໍ່ນັກຂ່າວ ໂດຍຊີ້ອອກວ່າ: ລັດຖະບານມຽນມາຕ້ອງປະຕິບັດຕໍ່ເຫດການຄ້າຍຄືກັນນີ້ຢ່າງເຂັ້ມງວດ, ບໍ່ວ່າການປະທະກັນຈະເກີດຂຶ້ນຢູ່ບ່ອນໃດກໍຕາມ, ລັດຖະບານມຽນມາກໍຕ້ອງລົງໂທດຜູ້ກະທຳຜິດຢ່າງເຂັ້ມງວດຕາມກົດໝາຍ. ເມື່ອເບິ່ງຈາກໄລຍະຍາວນານແລ້ວເຫັນວ່າ, ລະຫວ່າງສອງກຸ່ມຄົນ ຄື ຊາວພຸດແລະຊາວມຸສລິມຂອງມຽນມາກໍຕ້ອງມີການສົນທະນາກັນ, ລັດຖະບານຕ້ອງໃຫ້ການໂຄສະນາແລະສຶກສາອົບຮົມ, ເພີ່ມທະວີຄວາມເຂົ້າໃຈແລະຄວາມໄວ້ເນື້ອເຊື່ອໃຈກັນລະຫວ່າງສອງກຸ່ມຄົນດັ່ງກ່າວ.
