ປະເທດລາວກາຍເປັນໜຶ່ງໃນປະເທດທີ່ໄດ້ທຶນການສຶກສາຈາກລັດຖະບານຈີນຫຼາຍກວ່າໝູ່
(ນັກສຶກສາລາວທີ່ຈະໄປຮຽນຢູ່ຈີນຖ່າຍຮູບຮ່ວມກັນກັບຜູ່ນຳຈີນແລະລາວ)
ຕາມຂ່າວCRI：ວັນທີ 23 ສິງຫານີ້, ແຫລ່ງຂ່າວຈາກສະຖານທູດຈີນປະຈຳລາວແຈ້ງໃຫ້ຮູ້ວ່າ, ປີນີ້, ມີນັກສຶກສາລາວຈຳນວນ 68 ຄົນໄດ້ຮັບທຶນການສຶກສາຈາກລັດຖະບານຈີນ. ປະຈຸບັນ, ລາວໄດ້ກາຍເປັນໜຶ່ງໃນບັນດາປະເທດທີ່ໄດ້ທຶນການສຶກສາຈາກລັດຖະບານຈີນຫຼາຍກວ່າໝູ່.
ໃນງານລ້ຽງສົ່ງນັກສືກສາລາວທີ່ໄດ້ທຶນການສຶກສາລັດຖະບານຈີນທີ່ຈັດຂຶ້ນຢູ່ສະຖານທູດຈີນປະຈຳລາວ, ທ່ານກ່ວນ ຮວາປິ່ງ, ເອກອັກຄະລັດຖະທູດຈີນປະຈຳລາວກ່າວວ່າ, ນັບແຕ່ຈີນ-ລາວສ້າງສາຍພົວພັນທາງການທູດເປັນເວລາ 52 ປີມານີ້, ຈີນໄດ້ໃຫ້ຄວາມສຳຄັນໃນລະດັບສູງຕໍ່ການແລກປ່ຽນຮ່ວມມືດ້ານການສຶກສາລະຫວ່າງສອງປະເທດ, ໃນຊຸມປີທີ່ຜ່ານມາ, ຈໍານວນນັກສຶກສາລາວທີ່ໄດ້ທຶນການສຶກສາລັດຖະບານຈີນໄດ້ກາຍພັນກວ່າທຶນແລ້ວ, ວິຊາສະເພາະການຮ່ຳຮຽນມີການທູດ, ການຄ້າ, ກະສິກຳ, ການກໍ່ສ້າງ, ສາທາລະນະສຸກແລະອື່ນໆ.
ໃນງານລ້ຽງດັ່ງກ່າວ, ທ່ານລີຕູ້ ບົວປາວ ລັດຖະມົນຕີຊ່ວຍວ່າການກະຊວງສຶກສາທິການແລະກິລາລາວໄດ້ຕາງໜ້າລັດຖະບານລາວສະແດງຄວາມຂອບໃຈແລະຄວາມຮູ້ບຸນຄຸນຢ່າງຈິງໃຈມາຍັງລັດຖະບານຈີນທີ່ໄດ້ໃຫ້ທຶນແກ່ນັກສຶກສາລາວເພື່ອໄປຮຽນຕໍ່ຢູ່ຈີນ, ທ່ານໄດ້ລະດົມນັກສຶກສາລາວພະຍາຍາມຮ່ຳຮຽນ, ເມື່ອກັບຄືນປະເທດແລ້ວກໍ່ປະກອບສ່ວນຢ່າງຕັ້ງໜ້າເຂົ້າໃນການສ້າງສາປະເທດຊາດ, ເພື່ອສ້າງສາໃຫ້ປະເທດລາວກາຍເປັນປະເທດອຸດສາຫະກຳທີ່ທັນສະໄໝຈາກປະເທດກະສິກຳເທື່ອລະກ້າວ, ປະກອບສ່ວນເຂົ້າໃນການພັດທະນາຂອງພາກພື້ນກໍ່ຄືຂອງໂລກ.
ປີນີ້, ໃນນັກສຶກສາລາວທີ່ໄດ້ທຶນສຶກສາຈາກລັດຖະບານຈີນຈຳນວນ 68 ຄົນນັ້ນ, ມີທຶນປະລິນຍາຕີ 20 ຄົນ, ປະລິນຍາໂທ 40 ຄົນແລະປະລິນຍາເອກ 8 ຄົນ.
