6 ບໍລິສັດອາຊຽນກາຍເປັນຄູ່ຮ່ວມມືຂອງງານວາງສະແດງສິນຄ້າຈີນອາຊຽນຄັ້ງທີ 10
(GMT+08:00) 2013-08-24 16:02:48 cri
ກອງປະຊຸມຂ່າວກ່ຽວກັບຄູ່່ຮ່ວມມືຂອງງານວາງສະແດງສິນຄ້າຈີນອາຊຽນປີ 2013 ໄດ້ໄຂຂຶ້ນຢູ່ນະຄອນນານນິງຂອງຈີນໃນວັນທີ 23 ສິງຫານີ້.ມີ 45 ບໍລິສັດທັງພາຍໃນປະເທດແລະຕ່າງປະເທດໄດ້ກາຍເປັນຄູ່ຮ່ວມມືຂອງງານວາງສະແດງສິນຄ້າຈີນອາຊຽນຄັ້ງທີ 10 ,ໃນນັ້ນ, 6 ບໍລິສັດອາຊຽນທີ່ມາຈາກອິນໂດເນເຊຍ, ມາເລເຊຍ, ສິງກະໂປແລະຫວຽດນາມແມ່ນຈຸດຮຸ່ງໃສໃນບັນດາຄູ່ຮ່ວມມືຂອງງານວາງສະແດງໃນຄັ້ງນີ້.ນີ້ແມ່ນຄູ່ຮ່ວມມືຈາກບໍລິສັດອາຊຽນຂອງງານວາງສະແດງອີກຈຳນວນຫນຶ່ງຫລັງຈາກກຸ່ມຊິນນາແມສກຼຸບ (SinarMasGroup)ຂອງອິນໂດເນເຊຍແລະບໍລິສັດເບຍລາວກາຍເປັນຄູ່ຮ່ວມມືຂອງງານວາງສະແດງີນອາຊຽນ.
ປີນີ້, ຈຳນວນຫົວຫນ້າຄູ່ຮ່ວມມື, ຄູ່ຮ່ວມມືທາງຍຸດທະສາດ,ຄູ່ຮ່ວມມືໃນຂະແຫນງການແລະຄູ່ຮ່ວມມືຂອງງານວາງສະແດງສິນຄ້າຈີນອາຊຽນຄັ້ງທີ 10 ລວມມີ 64 ບໍລິສັດ,ເຊິ່ງຫລາຍກວ່າປີກາຍນີ້.
ໃນກອງປະຊຸມຂ່າວ, ທ່ານຫວງຜິງຊີ, ຮອງເລຂາກອງເລຂາງານວາງສະແດງສິນຄ້າຈີນອາຊຽນກ່າວວ່າ, ໃນ 10 ປີແຫ່ງການຈັດງານວາງສະແດງສິນຄ້າຈີນອາຊຽນ, ໄດ້ສຸມໃສ່ການຈັດກິດຈະກຳຕ່າງໆເຊັ່ນການຮ່ວມມືດ້ານສິນຄ້າ, ການລົງທຶນແລະການຄ້າລະຫວ່າງຈີນກັບບັນດາປະເທດອາຊຽນ, ໄດ້ສ້າງແບບຢ່າງໃຫ້ການພົວພັນລະຫວ່າງຈີນກັບອາຊຽນ,ແລະການພົວພັນລະຫວ່າງປະເທດພວມພັດທະນາກັບປະເທດພວມພັດທະນາ.ຄູ່ຮ່ວມມືເຫລົ່ານີ້ໄດ້ເກາະແຂນກັບງານວາງສະແດງແລະກ້າວໄປຫນ້າຮ່ວມກັນ,ເຕີບໂຕຂະຫຍາຍຕົວ,ໄດ້ປະກອບສ່ວນອັນສຳຄັນເຂົ້າໃນການພັດທະນາຂອງງານວາງສະແດງ.
ທ່ານຫວງຜິງຊີກ່າວວ່າ, ງານວາງສະແດງສິນຄ້າຈີນອາຊຽນຄັ້ງທີ 10 ຈະປັບປຸງເນື້ອໃນວາງສະແດງໃຫ້ດີຂຶ້ນຕື່ມອີກ,ໃນດ້ານການຄ້າສິນຄ້າຈະວາງສະແດງສິນຄ້າທີ່ມີເອກະລັກພິເສດຂອງບັນດາປະເທດອາຊຽນຫລາຍກວ່າເກົ່າ.
