ກະຊວງການຕ່າງປະເທດສິງກະໂປໃຫ້ຄວາມກະຈ່າງແຈ້ງກ່ຽວກັບຄຳເວົ້າຂອງທ່ານລີຊຽນລຸງທີ່ກ່ຽວພັນກັບຈີນ
ຕາມຂ່າວສານຊິນຮວາ: ວັນທີ 23 ສິງຫານີ້, ກະຊວງການຕ່າງປະເທດສິງກະໂປ ໄດ້ອອກຖະແຫຼງການ, ໂດຍໄດ້ໃຫ້ຄວາມກະຈ່າງແຈ້ງກ່ຽວກັບຄຳເວົ້າຂອງທ່ານລີຊຽນລຸງ, ນາຍົກລັດ ຖະມົນຕີສິງກະໂປ ທີ່ໄດ້ກ່າວໃນກອງປະຊຸມກ່ຽວກັບອະນາຄົດຂອງອາຊີຂອງເວທີປຶກສາຫາລືສາກົນນີເກອີ (Nikkei Global Management Forum) ຄັ້ງທີ 19 ທີ່ໄດ້ຈັດຂຶ້ນໃນເດືອນພຶດສະພາປີ 2013.
ຖະແຫຼງການຊີ້ອອກວ່າ, ໃນກອງປະຊຸມຄັ້ງນີ້, ໃນເວລາຖືກຖາມວ່າປະເທດອ້ອມຂ້າງມີຄວາມຈຳເປັນຫຼືບໍ່ທີ່ດຳເນີນການຮ່ວມມືເພື່ອປິດລ້ອມຈີນ, ທ່ານລີຊຽນລຸງ ໄດ້ປະຕິເສດຄຳສະເໜີດັ່ງກ່າວໃນທັນທີ, ແລະກ່າວວ່າການກະທຳຄືແບບນີ້ແມ່ນບໍ່ມີຜົນປະໂຫຍດແຕ່ຢ່າງໃດ, ສ່ວນທ່ານເອງກໍຈະບໍ່ກ່າວຕຳນິຈີນ.
ຖະແຫຼງການໄດ້ອ້າງຕາມຄຳເວົ້າຂອງທ່ານລີຊຽນລຸງວ່າ: ປະເທດໃນພາກພື້ນໄດ້ຮັບຜົນປະໂຫຍດຈາກການພັດທະນາຂອງຈີນ; ຈີນເອງກໍເຫັນວ່າມີຄວາມຈຳເປັນໃນການພັດທະນາໂດຍສັນຕິ ໂດຍອີງຕາມຮູບແບບທີ່ບໍ່ເປັນການຂົ່ມຂູ່ຕໍ່ປະເທດໃກ້ຄຽງ; ຈີນກໍຈະພິຈາລະນາເຖິງກຽດຊື່ສຽງແລະຖານະຂອງຕົນໃນສາກົນຢ່າງຮອບດ້ານ ໃນເວລາຊັ່ງຊາຜົນປະໂຫຍດໃນການແກ້ໄຂຄວາມຂັດແຍ່ງດ້ານດິນແດນດ້ວຍຮູບແບບບໍ່ແມ່ນທາງສັນຕິວິທີ. ສະນັ້ນ, ຄືຄຳເວົ້າທີ່ວ່າ "ໃຫ້ປະເທດທີ່ຢ້ານກົວຈີນຄືປະເທດພວກເຮົານີ້ຜູກເປັນມິດສາ" ແມ່ນຄຳເວົ້າທີ່ບໍ່ມີລັກສະນະສ້າງສັນ.
ຖະແຫຼງການຍັງຂຽນວ່າ: ທ່ານລີຊຽນລຸງໄດ້ກ່າວຄຳປາໄສໃນຈຸດຢືນເປັນເພື່ອນມິດທີ່ດີຂອງຈີນ, ຄຳວິຈານຂອງທ່ານມີຈຸດຢືນດຸນດ່ຽງກັນ, ກໍບໍ່ມີເຈດຕະນາຢາກເຮັດໃຫ້ສະຖານະການເຄັ່ງຕຶງຂຶ້ນ.
