ນາຍົກສິງກະໂປກ່າວວ່າ ຫວັງຢາກພັດທະນາການຮ່ວມມືກັບຈີນຕື່ມອີກ
ຕາມຂ່າວສານຊິນຮວາ: ວັນທີ 25 ສິງຫານີ້, ທ່ານລີຊຽນລຸງ, ນາຍົກລັດຖະມົນຕີສິງກະໂປ ເລີ່ມດຳເນີນຢ້ຽມຢາມຈີນຢ່າງເປັນທາງການ. ໃນເວລາໃຫ້ສຳພາດຕໍ່ສື່ມວນຊົນຈີນ, ທ່ານລີຊຽນລຸງ ກ່າວວ່າ: ການພົວພັນລະຫວ່າງສິງກະໂປ-ຈີນໄດ້ມີການພັດທະນາຢ່າງສະດວກ. ຄຽງຄູ່ກັບກຳລັງແຫ່ງຊາດຈີນໄດ້ມີການພັດທະນາຢ່າງຕໍ່ເນື່ອງແລະຈະເລີນກ້າວໜ້າຂຶ້ນເລື້ອຍໆ, ການຮ່ວມມືລະຫວ່າງສອງປະເທດຈະນັບມື້ນັບແໜ້ນແຟ້ນຍິ່ງຂຶ້ນ.
ທ່ານລີຊຽນລຸງ ກ່າວຕື່ມວ່າ: ການຮ່ວມມືໃນຫຼາຍຂົງເຂດລະຫວ່າງສິງກະໂປ-ຈີນລ້ວນແຕ່ໄດ້ຮັບຜົນສຳເລັດ, ໜຶ່ງໃນນັ້ນ ເຂດນິຄົມອຸດສາຫະກຳຊູ່ໂຈ່ວ ກໍແມ່ນຕົວຢ່າງທີ່ດີຂອງການຮ່ວມມືສອງຝ່າຍ. ປີກາຍນີ້, ທະນາຄານສອງແຫ່ງຂອງຈີນໄດ້ຮັບໃບອະນຸຍາດໃຫ້ດຳເນີນທຸລະກິດຮອບດ້ານເປັນພິເສດຈາກສິງກະໂປ, ມາຮອດປີນີ້, ມີແຫ່ງໜຶ່ງໄດ້ເລີ່ມດຳເນີນທຸລະກິດທີ່ມີການຊຳລະດ້ວຍເງິນຢວນ, ນີ້ແມ່ນເນື້ອໃນສຳຄັນອັນໜຶ່ງຂອງການຮ່ວມມືລະຫວ່າງສອງປະເທດ.
ທ່ານລີຊຽນລຸງ ຫວັງຢາກຜ່ານການຢ້ຽມຢາມໃນຄັ້ງນີ້ ຈະສາມາດຊຸກຍູ້ການພົວພັນກັບຈີນຕື່ມອີກ, ເພີ່ມທະວີການແລກປ່ຽນໃນຂົງເຂດຕ່າງໆ. ພ້ອມກັນນັ້ນ, ທ່ານກໍກ່າວວ່າ: ການຮ່ວມມືລະຫວ່າງຈີນ-ອາຊຽນໄດ້ກວມໄປເຖິງຫຼາຍໆຂົງເຂດ, ເປັນຕົ້ນແມ່ນເສດຖະກິດ, ສັງຄົມ, ການສຶກສາ ແລະອື່ນໆ, ສິງກະໂປຈະພະຍາຍາມຊຸກຍູ້ການພົວພັນລະຫວ່າງອາຊຽນກັບຈີນ, ຫວັງຢາກຊຸກຍູ້ການສ້າງສາເຂດການຄ້າເສລີຈີນ-ອາຊຽນ.
