ທ່ານລີເຄີ້ສຽງພົບປະເຈລະຈາກັບທ່ານລີຊຽນລຸງ
ຕາມຂ່າວສານຊິນຮວາ: ຕອນເຊົ້າວັນທີ 26 ສິງຫານີ້ ຢູ່ທີ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານລີເຄີ້ສຽງ, ນາຍົກລັດຖະມົນຕີ ຈີນໄດ້ພົບປະເຈລະຈາກັບທ່ານລີຊຽນລຸງ, ນາຍົກລັດຖະມົນຕີສິງກະໂປທີ່ມາຢ້ຽມຢາມຈີນ.
ທ່ານລີເຄີ້ສຽງ ຊີ້ອອກວ່າ: ລັດຖະບານຊຸດໃໝ່ຂອງຈີນໄດ້ຖືການພັດທະນາການຮ່ວມມືແບບໄມຕີຈິດມິດຕະພາບກັບອາຊຽນເປັນທິດທາງບູລິມະສິດດ້ານການຕ່າງປະເທດກັບປະເທດໃກ້ຄຽງ, ຍິນດີປັບປຸງແລະລົງເລິກການພົວພັນຄູ່ຮ່ວມມືຍຸດທະສາດກັບອາຊຽນຕື່ມອີກ, ຂະນະດຽວກັນກໍຊຳລະແກ້ໄຂບັນຫາທີ່ຕົກທອດມາແຕ່ປະຫວັດສາດລະຫວ່າງຈີນກັບບາງປະເທດອາຊຽນຢ່າງເໝາະສົມ, ຮ່ວມກັນຮັກສາພາກສ່ວນໃຫຍ່ຂອງການຮ່ວມມືລະຫວ່າງຈີນ-ອາຊຽນ.
ທ່ານລີເຄີ້ສຽງ ຍັງກ່າວເນັ້ນວ່າ: ລັດຖະບານຈີນມີຄວາມຕັດສິນໃຈອັນເດັດດ່ຽວໜຽວແໜ້ນທີ່ຢາກເດີນໄປຕາມເສັ້ນທາງພັດທະນາໂດຍສັນຕິ, ແລະມີມານະຈິດທີ່ບໍ່ຫວັ່ນໄຫວຄອນແຄນໃນການປົກປັກຮັກສາອະທິປະໄຕແລະຜືນແຜ່ນດິນອັນຄົບຖ້ວນ. ກ່ຽວກັບລະຫວ່າງບາງປະເທດໃນພາກພື້ນນີ້ມີຄວາມຂັດແຍ່ງກັນບາງດ້ານ, ພວກຂ້າພະເຈົ້າມີຈຸດຢືນມາໂດຍຕະຫຼອດທີ່ໃຫ້ສອງຝ່າຍທີ່ມີຄວາມຂັດແຍ່ງກັນປຶກສາຫາລືແລະດຳເນີນການເຈລະຈາໂດຍກົງເພື່ອບັນລຸແຜນການແກ້ໄຂບັນຫາ, ບໍ່ວ່າການກະທຳໃດໆທີ່ອາດຈະເຮັດໃຫ້ສະຖານະການສັບສົນຂຶ້ນແລະຂະຫຍາຍອອກນັ້ນລ້ວນແຕ່ຈະດຳເນີນຕໍ່ໄປບໍ່ໄດ້.
ທ່ານລີຊຽນລຸງ ກ່າວວ່າ: ການພົວພັນລະຫວ່າງອາຊຽນ-ຈີນມີເນື້ອໃນອຸດົມສົນບູນ, ກະແສຕົ້ນຕໍແມ່ນການຮ່ວມມືແບບໄມຕີຈິດມິດຕະ ພາບຢ່າງສະເໝີຕົ້ນສະເໝີປາຍ, ສິງກະໂປຍ້ອງຍໍຊົມເຊີຍຝ່າຍຈີນທີ່ໃຫ້ການສະໜັບສະໜູນແກ່ອາຊຽນ ແລະ ໄດ້ເສີມຂະຫຍາຍບົດບາດອັນຕັ້ງໜ້າເພື່ອສັນຕິພາບ, ສະຖຽນລະພາບ ແລະການພັດທະນາຂອງພາກພື້ນ, ສິງກະໂປສະໜັບສະໜູນໃຫ້ຝ່າຍທີ່ມີຄວາມຂັດແຍ່ງກັນທີ່ກ່ຽວຂ້ອງຈົ່ງປຶກສາຫາລືກັນເພື່ອແກ້ໄຂຄວາມຂັດແຍ່ງກັນ. ສິງກະໂປຍິນດີພະຍາຍາມຮ່ວມກັນກັບຈີນ, ຊຸກຍູ້ໃຫ້ການພົວພັນລະຫວ່າງອາຊຽນ-ຈີນ ແລະ ການຮ່ວມມືໃນພາກພື້ນກ້າວຂຶ້ນສູ່ລະດັບໃໝ່.
