ລັດຖະມົນຕີການຕ່າງປະເທດຈີນພົບປະກັບລັດຖະມົນຕີການຕ່າງປະເທດແລະການຄ້າບຼູໄນ
ວັນທີ27ສິງຫານີ້ ,ທ່ານຫວາງຢີ້,ລັດຖະມົນຕີວ່າການກະຊວງການຕ່າງປະເທດຈີນໄດ້ພົບປະກັບສົມເດັດໂມຮາເມັກ ໂບນເກຍຮ໌ ລັດຖະມົນຕີວ່າການກະຊວງການຕ່າງປະເທດແລະການຄ້າບຼູໄນທີ່ເດີນທາງມາຈີນເພື່ອເຂົ້າຮ່ວມກອງປະຊຸມພິເສດລັດຖະມົນຕີການຕ່າງປະເທດຈີນ-ອາຊຽນ.
ທ່ານຫວາງຢີ້ກ່າວວ່າ,ປິນີ້ແມ່ນປີທີ່ສ້າງຕັ້ງສາຍພົວພັນຄູ່ຮ່ວມມືຍຸດທະສາດຈີນ-ອາຊຽນຄົບຮອບ10ປີ.ໃນ10ປີທີ່ຜ່ານມາ,ພາຍໃຕ້ຄວາມພະຍາຍາມຂອງບັນດາຝ່າຍ,ຈີນແລະອາຊຽນໄດ້ມີຄວາມໄວ້ເນື້ອເຊື່ອໃຈກັນດ້ານການເມືອງເພີ່ມຂຶ້ນແລະໄດ້ຮັບການພັດທະນາຢ່າງໃຫຍ່ໃນການຮ່ວມມືໃນຂົງເຂດຕ່າງໆ ເຊິ່ງໄດ້ນໍາມາແຫ່ງຜົນປະໂຫຍດແທ້ຈິງແກ່ບັນດາປະເທດແລະປະຊາຊົນຂອງປະເທດຕົນ,ໄດ້ຊຸກຍູ້ສັນຕິພາບແລະການພັດທະນາຂອງພາກພື້ນ.ການພົວພັນສອງຝ່າຍລະຫວ່າງຈີນແລະບຼູໄນໄດ້ພັດທະນາໄປພ້ອມກັນກັບການພົວພັນລະຫວ່າງຈີນແລະອາຊຽນແລະກໍາລັງຢູ່ໃນໄລຍະທີ່ດີທີ່ສຸດໃນປະຫວັດສາດ.ຈີນຫວັງວ່າຈະຮ່ວມກັບບຼູໄນ,ຊຸກຍູ້ການພົວພັນສອງຝ່າຍໃຫ້ມີຄວາມຄືບໜ້າໃໝ່ຢ່າງຕໍ່ເນື່ອງ.
ສົມເດັດໂມຮາເມັກ ໂບນເກຍຮ໌ໄດ້ສະແດງຄວາມຂອບໃຈນໍາຝ່າຍຈີນທີ່ໄດ້ໃຫ້ຄວາມສໍາຄັນເປັນຢ່າງສູງຕໍ່ການພົວພັນລະຫວ່າງຈີນແລະບຼູໄນແລະໄດ້ປະກອບສ່ວນຢ່າງຈິງຈັງເຂົ້າໃນການພົວພັນລະຫວ່າງຈີນແລະອາຊຽນ.ຈີນເປັນເພື່ອນມິດທີ່ແທ້ຈິງຂອງອາຊຽນ.ໃນຖານະທີ່ເປັນປະເທດປະທານໝູນວຽນຂອງອາຊຽນໃນປີນີ້,ບຼູໄນຈະສືບຕໍ່ເພີ່ມທະວີການປະສານສົມທົບກັນກັບຈີນໃນວຽກງານພາກພື້ນແລະສາກົນ,ຈະຊຸກຍູ້ການພົວພັນລະຫວ່າງຈີນແລະບຼູໄນແລະການພົວພັນລະຫວ່າງຈີນແລະອາຊຽນໃຫ້ນັບມື້ນັບດີຂຶ້ນກວ່າເກົ່າ.
