ພັກຝ່າຍຄ້ານກຳປູເຈຍຈະຈັດງານຊຸມນຸມເພື່ອປະທ້ວງຜົນການເລືອກຕັ້ງທົ່ວໄປ
ຕາມຂ່າວສານຊິນຮວາ: ວັນທີ 28 ສິງຫານີ້, ພັກກູ້ຊາດ ເຊິ່ງແມ່ນພັກຝ່າຍຄ້ານຂອງກຳປູເຈຍໄດ້ປະກາດວ່າ ຈະຈັດງານຊຸມນຸມປະທ້ວງແບບບໍ່ໃຊ້ຄວາມຮຸນແຮງໃນວັນທີ 7 ກັນຍານີ້, ເພື່ອປະທ້ວງຜົນການເລືອກຕັ້ງສະພາແຫ່ງຊາດໃນເບື້ອງຕົ້ນທີ່ຄະນະກຳມະການເລືອກຕັ້ງແຫ່ງຊາດກຳປູເຈຍປະກາດໃນວັນທີ 12 ສິງຫານີ້ ແລະ ວິທີແກ້ໄຂຄຳຮ້ອງຟ້ອງຂອງພັກກູ້ຊາດ.
ວັນທີ 12 ສິງຫານີ້, ຄະນະກຳມະການເລືອກຕັ້ງແຫ່ງຊາດກຳປູເຈຍ ກ່າວວ່າ: ພັກປະຊາຊົນ ເຊິ່ງເປັນພັກກຳອຳນາດຊີງໄດ້ 68 ບ່ອນນັ່ງໃນຈຳນວນ 123 ບ່ອນນັ່ງ. ແຕ່ພັກກູ້ຊາດ ເຊິ່ງເປັນພັກຝ່າຍຄ້ານ ປະຕິເສດບໍ່ຍອມຮັບຜົນດັ່ງກ່າວ, ແລະຮຽກຮ້ອງໃຫ້ສ້າງຕັ້ງຄະນະກຳມະການກວດກາອິດສະຫຼະ ເພື່ອດຳເນີນການກວດກາຕໍ່ບັນຫາທີ່ກ່ຽວຂ້ອງໃນການເລືອກຕັ້ງສະພາແຫ່ງຊາດໃນຄັ້ງນີ້. ທ່ານເຕັບນີທາ, ເລຂາທິການຄະນະກຳມະການເລືອກຕັ້ງສະພາແຫ່ງຊາດກຳປູເຈຍ ກ່າວວ່າ: ຜົນການເລືອກຕັ້ງໃນເບື້ອງຕົ້ນໄດ້ປະກາດອອກມາແລ້ວ, ບໍ່ມີຄວາມຈຳເປັນທີ່ຈະປຶກສາຫາລືກ່ຽວກັບການສ້າງຕັ້ງຄະນະກຳມະການກວດກາອິດສະຫຼະ, ຜົນຂອງການເລືອກຕັ້ງທົ່ວໄປໃນຄັ້ງນີ້ຈະປະກາດຢ່າງເປັນທາງການໃນວັນທີ 8 ກັນຍາໜ້ານີ້.
ພາຍຫຼັງການເລືອກຕັ້ງສະພາແຫ່ງຊາດໄດ້ສິ້ນສຸດລົງແລ້ວ, ພັກກູ້ຊາດໄດ້ກ່າວຫຼາຍເທື່ອວ່າ: ຖ້າບໍ່ສາມາດສ້າງຕັ້ງຄະນະກຳມະການກວດກາອິດສະຫຼະເພື່ອດຳເນີນການກວດກາການກະທຳຜິດກົດລະບຽບໃນການເລືອກຕັ້ງທົ່ວໄປໃນຄັ້ງນີ້ແລ້ວ, ພັກດັ່ງກ່າວຈະເຄື່ອນໄຫວຕໍ່ຕ້ານກັບສະພາແຫ່ງຊາດຊຸດໃໝ່, ແລະປຸກລະດົມກໍ່ການເຄື່ອນໄຫວປະທ້ວງໃນທົ່ວປະເທດກຳປູເຈຍ, ພ້ອມກັນນັ້ນກໍຈະຮຽກຮ້ອງໃຫ້ປະຊາຄົມໂລກປະຕິເສດບໍ່ຮັບຮອງລັດຖະບານຊຸດໃໝ່.
