ລັດຖະມົນຕີປ້ອງກັນປະເທດຂອງ10ປະເທດອາຊຽນຕົກລົງເພີ່ມທະວີການຮ່ວມມືດ້ານການປ້ອງກັນແລະຄວາມໝັ້ນຄົງ
(GMT+08:00) 2013-08-29 14:24:38 cri
ຕາມຂ່າວCRI:ວັນທີ28ສິງຫານີ້, ລັດຖະມົນຕີວ່າການກະຊວງປ້ອງກັນປະເທດຫຼືຜູ້ຕາງໜ້າຂອງ10ປະເທດອາຊຽນໄດ້ຈັດກອງປະຊຸມຢູ່ນະຄອນຫຼວງບັນດາເຊຣີເບກາວັນຂອງບຼູໄນ, ໂດຍໄດ້ຕົກລົງສືບຕໍ່ເພີ່ມທະວີການຮ່ວມມືທາງການທະຫານແລະຄວາມໝັ້ນຄົງຂອງພາກພື້ນ.
ຜູ້ຮັບຜິດຊອບກອງປະຊຸມໄດ້ອອກຖະແຫຼງການສະບັບໜຶ່ງໂດຍກ່າວວ່າ, ລັດຖະມົນຕີກະຊວງປ້ອງກັນປະເທດຂອງປະເທດອາຊຽນທີ່ເຂົ້າຮ່ວມກອງປະຊຸມໄດ້ກ່າວເນັ້ນເຖິງຄວາມສຳຄັນຂອງການຮ່ວມມືດ້ານການປ້ອງກັນໃນການສ້າງປະຊາຄົມການເມືອງແລະຄວາມໝັ້ນຄົງຂອງອາຊຽນ, ໂດຍກ່າວຢ້ຳການຮ່ວມມືພາຍໃຕ້ກົນໄກຂອງກອງປະຊຸມລັດຖະມົນຕີປ້ອງກັນປະເທດອາຊຽນແລະ ກອງປະຊຸມເປີດກວ້າງລັດຖະມົນຕີປ້ອງກັນປະເທດອາຊຽນ, ເພື່ອຮັບມືກັບສິ່ງທ້າທາຍດ້ານຄວາມໝັ້ນຄົງແລະການປ້ອງກັນຮ່ວມກັນ. ລັດຖະມົນຕີປ້ອງກັນປະເທດຂອງອາຊຽນໄດ້ຕົກລົງສືບຕໍ່ຮ່ວມກັນຮັບມືກັບສິ່ງທ້າທາຍໃນຂົງເຂດຄວາມປອດໄພບໍ່ເປັນມູນເຊື້ອເຊັ່ນ: ການຊ່ວຍເຫຼືອດ້ານລັດທິມະນຸດສະທຳ, ການຊ່ອຍເຫຼືອກູ້ໄພແລະຄວາມປອດໄພທາງທະເລ.
ລັດຖະມົນຕີປ້ອງກັນປະເທດອາຊຽນຍັງໄດ້ປຶກສາຫາລືກັນກ່ຽວກັບການພັດທະນາແລະເພີ່ມທະວີກົນໄກກອງປະຊຸມລັດຖະມົນຕີປ້ອງກັນປະເທດອາຊຽນແລະກອງປະຊຸມເປີດກວ້າງລັດຖະມົນຕີປ້ອງກັນປະເທດອາຊຽນແນວໃດ, ພ້ອມກັນນັ້ນ, ຍັງໄດ້ກ່າວເນັ້ນເຖິງຄວາມສຳຄັນຂອງການຍຶດໝັ້ນຖານະແກນນຳຂອງອາຊຽນໃນການຊຸກຍູ້ກົນໄກກອງປະຊຸມລັດຖະມົນຕີປ້ອງກັນປະເທດ.
ນອກນີ້, ລັດຖະມົນຕີປ້ອງກັນປະເທດອາຊຽນກັບເຈົ້າໜ້າທີ່ອາວຸໂສອາຊຽນທີ່ເຂົ້າຮ່ວມກອງປະຊຸມຍັງໄດ້ປຶກສາຫາລືຢ່າງເລິກເຊິ່ງກ່ຽວກັບຫົວຂໍ້ການປ້ອງກັນຄວາມປອດໄພໃນພາກພື້ນແລະທົ່ວໂລກ.
ລັດຖະມົນຕີປ້ອງກັນປະເທດຫຼືຜູ້ຕາງໜ້າຂອງ10ປະເທດອາຊຽນແລະອົສຕຼາລີ, ຈີນ, ອິນເດຍ, ຍີ່ປຸ່ນ, ນູແວນເຊລັງ, ຣັດເຊຍ, ສ.ເກົາຫຼີແລະອາເມລິກາຈະເຂົ້າຮ່ວມກອງປະຊຸມເປີດກວ້າງລະດັບລັດຖະມົນຕີປ້ອງກັນປະເທດອາຊຽນຄັ້ງທີ2ຢູ່ນະຄອນຫຼວງບັນດາເຊຣີເບກາວັນຂອງບຼູໄນ. ທ່ານສາງ ວ້ານ ຊວນ, ທີ່ປຶກສາແຫ່ງລັດຈີນທັງເປັນລັດຖະມົນຕີວ່າການກະຊວງປ້ອງກັນປະເທດຈີນຈະນຳພາຄະນະຜູ້ແທນເຂົ້າຮ່ວມກອງປະຊຸມດັ່ງກ່າວແລະພົບປະກັບລັດຖະມົນຕີກະຊວງປ້ອງກັນປະເທດຈຳນວນໜຶ່ງໃນໄລຍະຈັດກອງປະຊຸມ.