ທ່ານໂອບາມາກ່າວວ່າ,ຈະສະແຫວງຫາການມອບສິດຈາກລັດຖະສະພາກ່ຽວກັບໃຊ້ກຳລັງອາວຸດຕໍ່ຊີຣີ
ວັນທີ 31 ສິງຫາແລ້ວນີ້, ທ່ານບາຣັກ ໂອບາມາ ປະທານາທິບໍດີອາເມລິກາໄດ້ກ່າວຄຳປາໄສຢູ່ທຳນຽບຂາວໂດຍກ່າວວ່າ, ທ່ານຈະສະແຫວງຫາການມອບສິດຈາກລັດຖະສະພາກ່ຽວກັບໃຊ້ການກະທຳທາງການທະຫານຕໍ່ຊີຣີ. ປັດຈຸບັນ, ສະພາຕ່ຳອາເມລິກາກຳລັງພັກຜ່ອນຢູ່, ແລະຈະຟື້ນຟູການເຮັດວຽກໃນວັນທີ 9 ກັນຍານີ້. ທ່ານຈອນ ໂປເນີ ປະທານສະພາຕ່ຳອາເມລິກາກ່າວວ່າ, ຫຼັງຈາກຟື້ນຟູເຮັດວຽກແລ້ວ, ທ່ານຈະຈັດສັນສະພາຕ່ຳເລິ່ມພິຈາລະນາມະຕິກ່ຽວກັບການໃຊ້ກຳລັງອາວຸດຕໍ່ຊີຣີ.
ນອກນີ້, ມື້ດຽວກັນ, ທ່ານໂອບາມາຍັງໄດ້ໂທລະສັບລົມກັບທ່ານຟຼານຊົຍສ໌ ໂຮລານເດ ປະທານາທິບໍດີຝຣັ່ງ 40 ນາທີ, ສອງຄົນໄດ້ກ່າວຢ້ຳຄວາມຕັດສິນໃຈທີ່ລົງໂທດລັດຖະບານຊີຣີ.
ມື້ດຽວກັນ, ທ່ານມາດິນ ເນເຊຍກີ ໂຄສົກເລຂາທິການໃຫຍ່ສະຫະປະຊາຊາດກ່າວວ່າ, ໜ່ວຍສຳຫຼວດຂອງສະຫະປະຊາຊາດໄດ້ເອົາແບບຢ່າງທີ່ໄດ້ຮັບຢູ່ຊີຣີນັ້ນ ເດີນທາງຮອດລາໄຮແຫ່ງໂຮນລັງ ເຊິ່ງເປັນທີ່ຕັ້ງຂອງສຳນັກງານໃຫຍ່ອົງການຫ້າມໃຊ້ອາວຸດເຄມີ ໃນມື້ດຽວກັນ, ໜ່ວຍສຳຫຼວດຈະທຳຄວາມພະຍາຍາມສຸດຂີດເລັ່ງລັດວິເຄາະແບບຢ່າງ, ຕາບໃດຫາກໄດ້ຮັບຜົນວິເຄາະຈາກຫ້ອງທົດລອງ, ໜ່ວຍສຳຫຼວດຈະສະເໜີຜົນການສຳຫຼວດທີ່ຢູ່ຊີຣີຕໍ່ທ່ານບັນກີມູນໂດຍໄວ.
ວັນທີ 31 ສິງຫາແລ້ວນີ້, ໃນກອງປະຊຸມທີ່ຈັດຂຶ້ນຢູ່ສຳນັກງານນາຍົກລັດຖະມົນຕີ, ທ່ານອັບດູລາ ເອນໂຊ ນາຍົກລັດຖະມົນຕີຊອກດານີກ່າວວ່າ, ຊອກດານີບໍ່ແມ່ນຝ່າຍທີ່ກ່ຽວພັນເຖິງວິກິດການຊີຣີ, ຊອກດານີຈະບໍ່ແມ່ນເວທີທີ່ໃຊ້ການກະທຳທາງທະຫານຕໍ່ຊີຣີ. ມື້ດຽວກັນ, ທ່ານໂມຮາມດ໌ ອາລີ ຈາຟາຣີ ຜູ້ບັນຊາການກອງທັບປ້ອງກັນປະຕິວັດອິສຣາມອີຣານກໍ່ກ່າວວ່າ, ອາເມລິກາບໍ່ມີຄວາມສາມາດຄວບຄຸມຜົນຢ້ອນຫຼັງອັນໜັກໜ່ວງຫຼັງໂຈມຕີຊີຣີທາງການທະຫານ.
