ເອກອັກຄະລັດຖະທູດຫວຽດນາມປະຈຳຈີນກ່າວວ່າ ການພັດທະນາຂອງຫວຽດນາມຈະແຍກຈາກການສະໜັບສະໜູນຂອງຈີນບໍ່ໄດ້
ວັນທີ 2 ກັນຍານີ້ ແມ່ນວັນຊາດຂອງຫວຽດນາມຄົບຮອບ 68 ປີ. ໃນງານລ້ຽງສະຫຼອງວັນຊາດຫວຽດນາມທີ່ຈັດຂຶ້ນກ່ອນໜ້ານີ້, ທ່ານຫວຽນວັນໂທ, ເອກອັກຄະລັດຖະທູດຫວຽດນາມປະຈຳຈີນ ກ່າວວ່າ: ການພັດທະນາຂອງຫວຽດນາມຈະແຍກຈາກການນຳພາຂອງພັກກອມມູນິດຫວຽດນາມ ແລະ ຄວາມສາມັກຄີບາກບັ່ນສູ້ຊົນຂອງປະຊາຊົນຫວຽດນາມນັ້ນບໍ່ໄດ້, ແລະກໍແຍກຈາກການສະໜັບສະໜູນຈາກຈີນ ແລະ ປະເທດເພື່ອນມິດອື່ນໆບໍ່ໄດ້ເຊັ່ນກັນ.
ທ່ານຫວຽນວັນໂທ ກ່າວວ່າ: ໃນ 8 ປີຜ່ານມານີ້, ຈີນລ້ວນແຕ່ແມ່ນຄູ່ການຄ້າໃຫຍ່ອັນດັບໜຶ່ງຂອງຫວຽດນາມ, ຂະນະດຽວກັນ, ສອງປະເທດກໍໄດ້ແລກປ່ຽນກັນຢ່າງກວ້າງຂວາງແລະເລິກເຊິ່ງໃນດ້ານການປ້ອງກັນປະເທດ, ການສຶກສາ, ວັດທະນະທຳແລະການທ່ອງທ່ຽວ. ລະຫວ່າງສອງປະເທດຫວຽດນາມ-ຈີນ ໄດ້ແກ້ໄຂບັນຫາທີ່ຕົກທອດມາແຕ່ປະຫວັດສາດຈຳນວນໜຶ່ງເປັນຢ່າງດີ, ກ່ຽວກັບບັນຫາທີ່ຍັງມີຄວາມຂັດແຍ້ງກັນນັ້ນ, ທ່ານເຊື່ອໝັ້ນວ່າສອງປະເທດຈະສາມາດແກ້ໄຂບັນຫາທີ່ຍັງຄ້າງຢູ່ແບບມີຜົນປະໂຫຍດແກ່ກັນ ໂດຍຜ່ານການປຶກສາຫາລືກັນຢ່າງມີໄມຕີຈິດມິດຕະພາບ, ເຄົາລົບເຊິ່ງກັນແລະກັນ ແລະ ປຶກສາຫາລືກັນຢ່າງສະເໝີພາບ.
