ງານວາງສະແດງສິນຄ້າຈີນ-ອາຊຽນຈະຫລຸດຜ່ອນໄລຍະການຈັດງານວາງສະແດງແລະຍົກເລີກພິທີປິດງານ
ເລຂາຂອງງານວາງສະແດງສິນຄ້າຈີນ-ອາຊຽນກ່າວວ່າ,ງານວາງສະແດງສິນຄ້າຈີນ-ອາຊຽນຄັ້ງທີ10ຈະຫລຸດຜ່ອນງົບປະມານລົງເພື່ອເຮັດໃຫ້ງານວາງສະແດງສິນຄ້າຈີນ-ອາຊຽນເປັນງານວາງສະແດງທີ່ມີຊີວິດຊີວາແລະຕິດແທດກັບຕົວຈິງໂດຍຜ່ານວິທີຕ່າງໆເຊັ່ນຫລຸດຜ່ອນການເຄື່ອນໄຫວກິດຈະກໍາແລະຫລຸດເວລາໄລຍະຈັດງານວາງສະແດງແລະຍົກເລີກພິທີປິດງານ.
ຜູ້ອໍານວຍການທີ່ກ່ຽວຂ້ອງຂອງກອງເລຂາງານວາງສະແດງສິນຄ້າຈີນ-ອາຊຽນສະເໜີໃຫ້ຮູ້ວ່າ,ຫລັງຈາກໄດ້ປຶກສາຫາລືກັບຄະນະຮັບຜິດຊອບຈັດງານຂອງບັນດາປະເທດອາຊຽນ,ບົນພື້ນຖານເຄົາລົບນັບຖືຫລັກການງານວາງສະແດງສາກົນ,ງານວາງສະແດງສິນຄ້າຈີນ-ອາຊຽນຄັ້ງທີ10ໄດ້ປັບປຸງຮູບການຈັດງານວາງສະແດງ,ຄືເຮັດໃຫ້ພິທີໄຂງານວາງສະແດງສິນຄ້າຈີນ-ອາຊຽນແລະກອງປະຊຸມສຸດຍອດການຄ້າແລະການລົງທຶນຈີນ-ອາຊຽນເປັນພິທີດຽວກັນຄືປ່ຽນເປັນການຈັດພິທີໄຂກອງປະຊຸມໂດຍບໍ່ມີພິທີປິດງານແຕ່ຢ່າງໃດ.
ງານວາງສະແດງສິນຄ້າຈີນ-ອາຊຽນຄັ້ງທີ10ຈະຈັດຂຶ້ນໃນວັນທີ3ຫາວັນທີ6ກັນຍານີ້ທີ່ເມືອງໜານໜິງເຂດກວາງຊີ.ປີນີ້ເປັນປີທີ່ສ້າງຕັ້ງສາຍພົວພັນຄູ່ຍຸດທະສາດຈີນ-ອາຊຽນຄົບຮອບ10ປີແລະການຈັດງານວາງສະແດງສິນຄ້າຈີນ-ອາຊຽນຄົບຮອບ10ປີ.ງານວາງສະແດງສິນຄ້າຈີນ-ອາຊຽນຄັ້ງທີ10ຈະປິ່ນອ້ອມສະຖານະການໃໝ່ຢ່າງໜັກແໜ້ນ,ເສີມຂະຫຍາຍບົດບາດເວທີທີ່ດີກວ່າເກົ່າແລະຊຸກຍູ້ການຮ່ວມມືແບບມີໄມຕິຈິດມິດຕະພາບລະຫວ່າງຈີນແລະອາຊຽນ.
