ຈີນສະໜັບສະໜູນກອງປະຊຸມສຸດຍອດກຸ່ມຈີ20ທີ່ໃຫ້ຄໍາໝັ້ນສັນຍາກ່ຽວກັບການບັນລຸສັນຍາໂດຮາ"ຜົນໄດ້ຮັບໃນໄລຍະຕົ້ນ"
ວັນທີ2ກັນຍານີ້,ໃນການສົນທະນາໂດຍຜ່ານໂທລະສັບກັບທ່ານລໍເບີໂຕ ອາເຊເວໂດ ຜູ້ອໍານວຍການໃຫຍ່ຂອງອົງການການຄ້າໂລກຄົນໃໝ່,ທ່ານກ່າວຫູເສີງ,ລັດຖະມົນຕີວ່າການກະຊວງການຄ້າຈີນກ່າວວ່າ,ຈີນສະໜັບສະໜູນຜູ້ນໍາຂອງກອງປະຊຸມສຸດຍອດກຸ່ມຈີ20ທີ່ໄດ້ໃຫ້ຄໍາໝັ້ນສັນຍາຢ່າງຈະແຈ້ງກ່ຽວກັບການບັນລຸສັນຍາ"ຜົນໄດ້ຮັບໃນໄລຍະຕົ້ນ"ໃນກອງປະຊຸມລະດັບລັດຖະມົນຕີຄັ້ງທີ9ເພື່ອສ້າງແຜນທີ່ເສັ້ນທາງຂອງຮອບໂດຮາໃຫ້ສໍາເລັດ.
"ຜົນໄດ້ຮັບໃນໄລຍະຕົ້ນ"ຂອງກອງປະຊຸມໂດຮາໝາຍເຖິງການຍົກເວັ້ນດ່ານພາສີແລະໂກຕາໃຫ້ແກ່ຜະລິດຕະພັນທີ່ມາຈາກ48ປະເທດທີ່ດ້ອຍພັດທະນາທີ່ສຸດ.ແຜນການດັ່ງກ່າວໄດ້ຮັບການຕອບສະໜອງທີ່ຕັ້ງໜ້າຈາກໜ່ວຍເສດຖະກິດໃໝ່ທີ່ສໍາຄັນເຊັ່ນຈີນ,ອິນເດຍແລະອື່ນໆ.
ທ່ານກ່າວຫູເສີງຍັງໄດ້ສະແດງຄວາມຊົມເຊີຍຕໍ່ການແນວຄິດລິເລີ່ມຂອງທ່ານລໍເບີໂຕ ອາເຊເວໂດທີ່ຊຸກຍູ້ການເຈລະຈາຮອບໂດຮາໃນໄລຍະດໍາລົງຕໍາແໜ່ງໃໝ່.ທ່ານຍັງໄດ້ກ່າວວ່າ,ຈີນຈະສະໜັບສະໜູນວຽກງານຂອງອົງການການຄ້າໂລກແລະຜູ້ອໍານວຍການໃຫຍ່ຂອງອົງການການຄ້າໂລກຢ່າງສະເໝີຕົ້ນສະເໝີປາຍ.
ທ່ານລໍເບີໂຕ ອາເຊເວໂດກ່າວວ່າ,ປັດຈຸບັນນີ້ການເຈລະຈາຮອບໂດຮາກໍາລັງຕົກຢູ່ໃນໄລຍະທີ່ຫຍຸ້ງຍາກ,ເພື່ອທັບມ້າງສະພາບທີ່ບໍ່ໄປບໍ່ມາຂອງການເຈລະຈາ,ທ່ານຈະຈັດກອງປະຊຸມປຶກສາຫາລືທີ່ມີເຈົ້າໜ້າທີ່ລະດັບລັດຖະມົນຕີເຂົ້າຮ່ວມ,ຫວັງວ່າຈີນຈະເຂົ້າຮ່ວມການເຈລະຈາແລະການປຶກສາຫາລືໃນກອງປະຊຸມຄັ້ງນີ້.
