ນາຍົກ ສປປ ລາວ ສະເໜີໃຫ້ເພີ່ມທະວີການຮ່ວມມືລະຫວ່າງຈີນ-ອາຊຽນຈາກສາມດ້ານ
ຕາມຂ່າວສານຊິນຮວາ: ທ່ານທອງສິງ ທຳມະວົງ, ນາຍົກລັດຖະມົນຕີລາວໄດ້ເຂົ້າຮ່ວມພິທີໄຂງານວາງສະແດງສິນຄ້າຈີນ-ຊຽນຄັ້ງທີ 10 ແລະ ກອງປະຊຸມສຸດຍອດການຄ້າ-ການລົງທຶນຈີນ-ອາຊຽນຄັ້ງທີ 10 ທີ່ຈັດຂຶ້ນຢູ່ນະຄອນໜານໜິງເຂດກວາງຊີ່ຈີນໃນວັນທີ 3 ກັນຍານີ້, ທ່ານໄດ້ປະກອບຄຳຄິດຄຳເຫັນໃນພິທີ ໂດຍກ່າວວ່າ: ໃນຫຼາຍປີຜ່ານມານີ້, ການຮ່ວມມືລະຫວ່າງອາຊຽນ-ຈີນ ໄດ້ຮັບໝາກຜົນອັນໃຫຍ່ຫຼວງ, ສອງຝ່າຍສາມາດເພີ່ມທະວີການຮ່ວມມືກັນຕື່ມອີກໃນອະນາຄົດ. ທ່ານທອງສິງ ທຳມະວົງ ໄດ້ສະເໜີໃຫ້ເພີ່ມທະວີການຮ່ວມມືສອງຝ່າຍຈາກສາມດ້ານ ຄືດັ່ງນີ້:
ໜຶ່ງ, ຈີນແລະອາຊຽນເພີ່ມທະວີການຮ່ວມມືແລະພັດທະນາດ້ານການຄ້າ, ຊຸກຍູ້ການຈັດຕັ້ງປະຕິບັດເຂດການຄ້າເສລີຈີນ-ອາຊຽນໃຫ້ໄດ້ຮັບໝາກຜົນອັນໃຫຍ່ຫຼວງກວ່າເກົ່າ; ສອງ, ສອງຝ່າຍເພີ່ມທະວີການຮ່ວມມືແລະພັດທະນາດ້ານການເຊື່ອມໂຍງ, ໂດຍສະເພາະແມ່ນການຮ່ວມມືດ້ານການກໍ່ສ້າງພື້ນຖານໂຄງລ່າງ, ເພື່ອສ້າງສະພາບແວດລ້ອມອັນສະດວກໃຫ້ແກ່ບັນດາປະເທດອາຊຽນແລະຈີນພ້ອມ ດ້ວຍປະຊາຊົນຂອງສອງຝ່າຍ ໃນດ້ານການຄ້າ, ການລົງທຶນ, ການທ່ອງທ່ຽວ ແລະ ການໄປມາຫາສູ່ກັນ. ທ່ານທອງສິງ ທຳມະວົງ ຍັງສະເໜີວ່າ, ສອງຝ່າຍສາມາດສະໜອງການຊ່ວຍເຫຼືອດ້ານການພັດທະນາຊັບພະຍາກອນມະນຸດໃນຂົງເຂດຕ່າງໆໃຫ້ແກ່ປະເທດທີ່ຫາກໍ່ເຂົ້າຮ່ວມເຂດການຄ້າເສລີອາຊຽນ, ເພື່ອຮັບປະກັນການສ້າງສຳເລັດປະຊາຄົມເສດຖະກິດອາຊຽນໃນປີ 2015.
ໃນຂະນະດຽວກັນ, ທ່ານທອງສິງ ທຳມະວົງ ໄດ້ສະເໜີວ່າ: ປັດຈຸບັນນີ້, ປະເທດລາວໄດ້ປະກາດນະໂຍບາຍກ່ຽວກັບວິສາຫະກິດຕ່າງປະເທດໄປລົງທຶນຢູ່ປະເທດລາວ, ໃນນັ້ນລວມທັງ "ກົດໝາຍວ່າດ້ວຍການສົ່ງເສີມການລົງທຶນ" ແລະ ກົດໝາຍທີ່ກ່ຽວຂ້ອງອື່ນໆອີກ, ເພື່ອສົ່ງເສີມໃຫ້ວິສາຫະກິດຕ່າງປະເທດເປີດກວ້າງການລົງທຶນຢູ່ປະເທດລາວ. ທ່ານໄດ້ເຊື້ອເຊີນແລະຍິນດີຕ້ອນຮັບນັກທຸລະກິດຈີນແລະບັນດາປະເທດອາຊຽນໄປສຳຫຼວດ, ຄົ້ນຄວ້າຢູ່ລາວນັບມື້ນັບຫຼາຍຂຶ້ນ, ເພື່ອສະແຫວງຫາໂອກາດການລົງທຶນຢູ່ລາວໃຫ້ໄດ້ຫຼາຍຂຶ້ນ ກວ່າເກົ່າ. ຕົວເລກຂໍ້ມູນສະຖິຕິສະແດງໃຫ້ເຫັນວ່າ, ໃນຊຸມປີຜ່ານມານີ້, ໃນບັນດາປະເທດທີ່ໄປລົງທຶນຢູ່ລາວ, ຍອດຈຳນວນການລົງທຶນຢູ່ລາວຂອງຈີນໄດ້ຢູ່ອັນດັບແຕ່ທີ 1ຫາທີ 3 ໂດຍຕະຫຼອດ.
ທ່ານທອງສິງ ທຳມະວົງ ກ່າວວ່າ: ລາວໄດ້ກຳນົດເອົາອຸດສາຫະກຳແລະຂະແໜງການລົງທຶນທີ່ເປັນບຸລິມະສິດ ຄື: ການກໍ່ສ້າງພື້ນຖານໂຄງລ່າງ, ກະສິກຳ, ອຸດສາຫະກຳ, ການທ່ອງທ່ຽວ, ພະລັງງານ ແລະ ບໍ່ແຮ່ ແລະອື່ນໆ, ເພື່ອທຳການກະກຽມເປັນຢ່າງດີໃຫ້ແກ່ວິສາຫະກິດຂອງປະເທດຕ່າງໆທີ່ຫວັງຢາກຈະໄປລົງທຶນຢູ່ລາວ.
